الجواب الأوّل لكُرُنْتُس
من جوابات الرسول بولس
مقدمة
الحمْدُ للّٰه، اللّه رسّل المسيح في الأرْض أشان كل الناس يلْقوا النجاة و السلام. و اللّه هو صبور و كريم.
و الجواب دا، الرسول بُولُس كتبه بقُدْرة الروح القُدّوس للناس البِقوا مُؤمِنين بالمسيح في حِلّة كُرُنْتُس في بلد يُونَان. الرسول بُولُس هو أوّل نادم البلّغ كلام المسيح في كُرُنْتُس. و تاريخ هنا زيارْته دي قاعد في كتاب أعمال الرُسُل فصُل 18.
و هو كتب الجواب دا للمُؤمِنين أشان يشجِّعهم و يعلِّمهم كلام مُهِمّ. و الجواب يقول لينا كلام كتير في الحال الواجْبة للمُؤمِنين و لملمّات المُؤمِنين. و بِحجّي في الفِكِر الواجِب و الفِكِر الما واجِب. و عِنْده تعْليم اليحجّي في قُدْرة الروح القُدّوس و البُعاث. و من كتبه، مُؤمِنين كتيرين في أيِّ بكان لِقوا مِنّه فايْدة كتيرة.
و قبُل الرسول ما يكْتِب ليهم، المُؤمِنين الفي كُرُنْتُس كتبوا للرسول و سألوه في الكلام الما واضِح ليهم. و خلاص الرسول ردّ ليهم في الجواب دا. و بتان في نفْس الوكت، هو سِمِع خبر المشاكِل القمّوا أمْبَيْنات المُؤمِنين و هو دوّر يحِلّ المشاكِل دَوْل بجوابه. هو سِمِع خبر هنا ناس واحِدين القمّوا يعلُّموا كلام ما صحيح و هو دوّر يقبِّلهم للناس دَوْل في الدرِب. و كتب كلام كتير البُخُصّ وِحْدة المُؤمِنين و المحبّة الأخويّة و الحال الصالْحة و العِشة مع المُذْنِبين و مُشْكِلة اللحم الأوّل دبحوه للأصْنام و بعد دا، باعوه في السوق.
و الكلام البُولُس كتبه ليهم في الحال الواجْبة للمُؤمِنين الساكْنين في أُسْط المُذْنِبين عِنْده فايْدة للمُؤمِنين في أيِّ وكت و في أيِّ بكان. خلّي اللّه يبارِك اليقْري الكلام دا. آمين.