أعمال الرُسُل i

أعمال الرُسُل

مقدمة

اللّه هو أكْبر! زمان اللّه قال لسيِّدنا إِبْرَاهِيم كدر هو ينْطي بركة كبيرة بذُرّيّته و البركة دي تبْقى لكل الأُمم. و بعد دا، اللّه حجّى لأنبياء كتيرين و أوْراهم بالنادم اليرسِّله اليجيب البركة دي. و المسيح هو بس الجاب البركة الاللّه حجّى بيها لإِبْرَاهِيم و للأنبياء الآخرين. المسيح مات في الصليب لذُنوب الناس و بعث من أُسْط المَيْتين. و المسيح عزل 12 رجال من تلاميذه و جعلاهم رُسُل. و قُبّال اللّه ما رفعه فَوْق في السماء، المسيح أمراهم للرُسُل دَوْل و رسّلاهم أشان يبلُّغوا البِشارة لكل الناس.

و أعمال الرُسُل يأوْرينا بككيف رُسُل المسيح بدوا الخِدْمة الهو كلّفاهم بيها. اللّه رسّل المسيح لليَهُود و أوّل، كل تلاميذه من اليَهُود. و في فِكِر المسيحيّين الأوّلانيّين، الناس ما يقْدروا يلْقوا بركة المسيح إلّا كن أوّل دخلوا في دين اليَهُود. و أعمال الرُسُل يوصِّفنا ككيف اللّه علّماهم و وضّح ليهم كدر هو يدَوْر ينْطي بركة المسيح لكل الناس. هو ينادي كل الناس في درِب واحِد و الدرِب دا جديد. اللّه ينْطي للمُؤمِنين المن الأُمم الآخرين نفْس البركة الأنْطاها لليَهُود. و الناس يلْقوا البركة دي كن يآمُنوا بالمسيح و هي البركة الاللّه أوّل واعد بيها إِبْرَاهِيم و الحمْدُ للّٰه.

النادم الربِّنا عزله أشان يكْتِب أعمال الرُسُل، هو السيِّد لُوقا و هو كتبه بقُدْرة الروح القُدّوس. و قُبّال هو ما كتبه، هو كتب جُزُء آخر هنا إنجيل المسيح و دا معْروف بكتاب لُوقا.

خلّي اللّه يفْتح قلِب هنا أيِّ نادم اليقْري أعمال الرُسُل أشان يآمِن تمام و يلْقى البركة العجيبة الاللّه يدَوْر ينزِّلها. آمين.