٢١
١ قَلِبْ الْمَلِكْ مِثِلْ أَلْمِي الْجَارِي،
هُو تِحِتْ مُرَاقَبَةْ اللّٰهْ
وَ اللّٰهْ يِوَدِّيهْ
فِي أَيِّ بَكَانْ الْيِدَوْرَهْ.
٢ أَيِّ نَادُمْ يَحْسِبْ هُو مَاشِي عَدِيلْ
وَ لَاكِنْ اللّٰهْ بَسْ يَكْشِفْ الْفِي الْقَلِبْ.
٣ طَبِّقِينْ الْحَقّ وَ الْعَدَالَةْ
أَخَيْر لِلّٰهْ مِنْ قَدِّمِينْ الضَّحَايَا.
٤ الْعَيْن الْقَوِيَّةْ
وَ الْقَلِبْ الْمُتَكَبِّرْ
وَ شَرَفْ الْعَاصِيِينْ،
هُمَّنْ دَوْل كُلُّهُمْ ذُنُوبْ.
٥ هَدَفْ الرَّاجِلْ النَّشِيطْ،
أَكِيدْ يِلْحَقَّقْ
وَ لَاكِنْ قِلَّةْ الصَّبُرْ
تِوَدِّي لِلْفَقُرْ.
٦ الْمَالْ الْيَكْسَبَوْه بِكِدِبْ
مِثِلْ ضُلّ الضَّحَى الزَّوَّالْ
وَ أَكِيدْ هُو شَرَكْ الْيِجِيبْ الْمَوْت.
٧ عُنُفْ الْعَاصِيِينْ يَخْرِبْهُمْ مَالَا؟
أَشَانْ أَبَوْا مَا كَرَّمَوْا الْعَدَالَةْ.
٨ الْمُجْرِمْ دَرْبَهْ أَعْوَجْ
وَ الصَّافِي عَمَلَهْ عَدِيلْ.
٩ أَخَيْر تَسْكُنْ وِحَيْدَكْ فِي رَاسْ بَيْتَكْ
مِنْ تِعِيشْ مَعَ الْمَرَةْ التِّخَالِفَكْ.
١٠ قَلِبْ الْعَاصِي يِحِبّ الْفَسَالَةْ
وَ رَفِيقَهْ كُلَ مَا يَلْقَى مِنَّهْ مَحَنَّةْ.
١١ عِقَابْ الشَّمَّاتِي يِعَلِّمْ الْجَاهِلْ.
كَنْ تِكَلِّمْ لِلْحَكِيمْ،
يِزِيدَهْ عِلِمْ.
١٢ اللّٰهْ عَادِلْ.
هُو يِرَاقِبْ بَيْت الْعَاصِي
وَ يَرْمِيهْ فِي مَصِيبَةْ.
١٣ الْمَا يُخُطّ أَدَانَهْ
لِكُرَوْرَاكْ الْفَقْرَانْ،
هُو كُلَ يَوْم وَاحِدْ يِنَادِي
وَ مَا يَلْقَى فَزَعَانْ.
١٤ الْهَدِيَّةْ بِالْعَشِيرْ،
تِوَقِّفْ الزَّعَلْ
وَ الرَّشْوَةْ فِي الْجَيْب،
تِبَرِّدْ الْغَضَبْ الشَّدِيدْ.
١٥ سَوِّيِّنْ الْعَدَالَةْ يِفَرِّحْ الصَّالِحِينْ
وَ لَاكِنْ يِخَوِّفْ الظَّالِمِينْ.
١٦ أَيِّ نَادُمْ الْيَطْلِقْ طَرِيقْ الْعَاقْلِينْ
بِسُرْعَةْ يِنْجَمَّ مَعَ الْمَيْتِينْ.
١٧ الْيِحِبّ يِعِيشْ فِي الْحَلُو،
دَايْماً فَقْرِي
وَ الْيِحِبّ الْمَرِيسَةْ وَ اللَّحَمْ،
مَا يَبْقَى غَنِيْ.
١٨ الْعَاصِي يَتْعَبْ فِي بَدَلْ الصَّالِحْ
وَ الْغَدَّارْ فِي بَدَلْ الزَّيْن.
١٩ أَخَيْر تَسْكُنْ وِحَيْدَكْ فِي الْخَلَاءْ
مِنْ تِعِيشْ بِخِلَافْ وَ هُرَاجْ مَعَ الْمَرَةْ.
٢٠ فِي بَيْت الْحَكِيمْ فِيَّهْ مَالْ مَضْمُومْ
وَ دِهِنْ مَخْزُونْ
وَ لَاكِنْ الْمَطْمُوسْ
يِشَتِّتْ الْيَلْقَاهْ.
٢١ الْيِفَتِّشْ الْعَدَالَةْ وَ الْخَيْر
يَلْقَى الْحَيَاةْ وَ الْعَدَالَةْ وَ الشَّرَفْ.
٢٢ الْحَكِيمْ يُقُمّ ضِدّ مَدِينَةْ الْفُرَّاسْ
وَ يَرْمِي دُرْدُرْهَا الْيِأَمِّنْهُمْ.
٢٣ الْحَفَضْ خَشْمَهْ وَ لِسَانَهْ
حَفَضْ نَفْسَهْ بَعِيدْ مِنْ التَّعَبْ.
٢٤ الْمُسْتَكْبِرْ الْفَشَّارْ أُسْمَهْ شَمَّاتِي
أَشَانْ كُلَّ عَمَلَهْ إِسْتِكْبَارْ.
٢٥ مُنَى الْكَسْلَانْ يَكْتُلَهْ
أَشَانْ إِيدَيْنَهْ أَبَوْا الْخِدْمَةْ.
٢٦ الْكَسْلَانْ دَايْماً يَطْمَعْ
وَ لَاكِنْ الصَّالِحْ يَنْطِي بِجُودْ.
٢٧ ضَحِيَّةْ الْعَاصِي اللّٰهْ حَرَّمْهَا.
وَ كَنْ يِقَدِّمْهَا بِنِيَّةْ فَسْلَةْ،
مَا تَبْقَى حَرَامَةْ زِيَادَةْ وَلَّا؟
٢٨ الْيَشْهَدْ بِكِدِبْ يِدَّمَّرْ
وَ لَاكِنْ الْيَسْمَعْ،
دَايْماً عِنْدَهْ حَقّ يِكَلِّمْ.
٢٩ الرَّاجِلْ الْعَاصِي يِوَصِّفْ نَفْسَهْ
وَ لَاكِنْ النَّادُمْ الْعَدِيلْ يِثَبِّتْ دَرْبَهْ.
٣٠ كُلَّ الْحِكْمَةْ وَ الْوَصِيَّةْ وَ الْفِهِمْ الْإِنْسَانِي
مَا عِنْدَهْ قِيمَةْ قِدَّامْ اللّٰهْ.
٣١ تَقْدَرْ تِجَهِّزْ خَيْلَكْ لِيَوْم الْحَرِبْ
وَ لَاكِنْ النَّصُرْ جَايِ مِنْ اللّٰهْ.