٢٢
١ الْأُسُمْ الطَّالِعْ أَخَيْر مِنْ الْغُنَى الْكَتِيرْ
وَ إِحْتِرَامْ الْآخَرِينْ أَخَيْر مِنْ الْفُضَّةْ وَ الدَّهَبْ.
٢ الْغَنِيْ وَ الْفَقْرِي،
هُمَّنْ سَوَا سَوَا
أَشَانْ اللّٰهْ بَسْ خَلَقَاهُمْ.
٣ الْعَاقِلْ يِشِيفْ الشَّرّ وَ يِبَارِيهْ
وَ لَاكِنْ الْجَاهِلْ يَقَعْ فَوْقَهْ وَ يِآذِيهْ.
٤ الْيِمَسْكِنْ نَفْسَهْ
وَ يَخَافْ مِنْ اللّٰهْ
يَلْقَى الْغُنَى وَ الشَّرَفْ
وَ يِزِيدْ عُمْرَهْ.
٥ فِي دَرِبْ الْقَلْبَهْ أَزْرَقْ،
فِيَّهْ شَوْك وَ شَرَكْ
وَ لَاكِنْ الْيَحْفَضْ نَفْسَهْ
يِبَعِّدْ مِنْهُمْ.
٦ أَدِّبْ الصَّغِيرْ وَكِتْ هُو صَغَيَّرْ
وَ كَنْ بِقِي شَايِبْ كُلَ،
مَا يِخَلِّي أَدَبَهْ.
٧ الْغَنِيْ يَحْكِمْ فِي الْمَسَاكِينْ
وَ الْيِشِيلْ الدَّيْن يَبْقَى عَبِدْ لِلْيِدَيِّنَهْ.
٨ الْيَزْرَعْ الظُّلُمْ يَنْتِجْ الْفَسَالَةْ
وَ عَصَاةْ مُلْكَهْ الْيِعَذِّبْ بَيْهَا تِدَّمَّرْ.
٩ الْإِجْوَادِي يَلْقَى بَرَكَةْ
أَشَانْ يِأَكِّلْ الْمِسْكِينْ.
١٠ أَطْرُدْ الشَّمَّاتِي وَ الْهُرَاجْ يَقِيفْ
وَ الْخِلَافْ وَ الْمُعْيَارْ كُلَ يِكَمُّلُوا.
١١ الْقَلْبَهْ طَاهِرْ
وَ يِحَجِّي بِالْخَيْر،
الْمَلِكْ يَبْقَى رَفِيقَهْ.
١٢ اللّٰهْ يَحْفَضْ الْمَعْرَفَةْ
لَاكِنْ يِبَرْجِلْ كَلَامْ الْغَدَّارِينْ.
١٣ الْكَسْلَانْ بُقُولْ كَيْ:
«فِيَّهْ دُودْ بَرَّا.
كَنْ مَرَقْت فِي الشَّارِعْ،
يِشَرِّطْ بَطْنِي!»
١٤ لِسَانْ الزَّانِيَةْ،
هَوِيرَةْ مَسْدُودَةْ بِقَشّ.
الْاللّٰهْ غِضِبْ عَلَيَّهْ
يَقَعْ فَوْقهَا كُشّ.
١٥ قِلَّةْ الْفِهِمْ مَرْبُوطَةْ بِقَلْب الْعِيَالْ
لَاكِنْ سَوْط الْأَدَبْ يِبَعِّدْهَا مِنْهُمْ.
١٦ الْيَظْلُمْ الْفَقْرَانْ لِيَغْنَى
أَوْ يَنْطِي هَدَايَا لِلْغَنِيْ،
النَّادُمْ دَا يِفَقِّرْ نَفْسَهْ.
أمْثال تلاتين هنا الحكمة
١٧ فُكّ أَدَانَكْ
وَ أَسْمَعْ كَلَامْ الْحَكِيمِينْ
وَ خُطّ قَلْبَكْ لِلْمَعْرَفَةْ الْعِنْدِي.
١٨ أَخَيْر كَنْ تَحْفَضْهُمْ فِي قَلْبَكْ
وَ خَشْمَكْ دَايْماً جَاهِزْ يِكَلِّمْ بَيْهُمْ.
١٩ وَ الْيَوْم،
نِعَلِّمْهُمْ لَيْك إِنْتَ كُلَ
أَشَانْ تِتْوَكَّلْ عَلَيْ اللّٰهْ.
٢٠ دَاهُو أَنَا كَتَبْت لَيْك
تَلَاتِينْ مَثَلْ هَنَا وَصَايَا وَ مَعْرَفَةْ
٢١ أَشَانْ نِعَرِّفَكْ الصَّحِيحْ هَنَا الْكَلَامْ الْحَقّ
وَ تِقَبِّلْ لِلرَّسَّلَكْ بِكَلَامْ الْحَقّ.
٢٢ مَا تَظْلُمْ الْمِسْكِينْ أَشَانْ هُو ضَعِيفْ
وَ مَا تِسِدّ لَيَّهْ بَابْ الشَّرِيعَةْ
٢٣ أَشَانْ اللّٰهْ ذَاتَهْ
يَبْقَى لَيَّهْ مُحَامِي
وَ يِعَاقِبْ الظَّالِمْ
لَحَدِّي يِشِيلْ رُوحَهْ.
٢٤ مَا تِرَافِقْ الدَّايْماً زَعْلَانْ
وَ مَا تَمْشِي مَعَ الْغَضْبَانْ
٢٥ أَشَانْ مَا تِسَوِّي حَالَكْ مِثِلْ حَالَهْ
وَ تَرْمِي نَفْسَكْ فِي شَرَكْ مِثِلْ شَرَكَهْ.
٢٦ مَا تَبْقَى مِنْ النَّاسْ الْيُدُقُّوا صُدُورْهُمْ
وَ يَضْمَنَوْا الْمَدْيُونْ.
٢٧ أَشَانْ كَنْ مَا عِنْدَكْ التِّكَفِّي بَيَّهْ،
يِشِيلُوا حَتَّى سَرِيرَكْ التُّنُومْ فَوْقَهْ.
٢٨ مَا تِحَوِّلْ عَلَامَاتْ الْحُدُودْ
الزَّمَانْ أَبَّهَاتَكْ خَطَّوْهُمْ.
٢٩ شِيفْ النَّادُمْ
الْيَعَرِفْ خِدِمْتَهْ مَرَّةْ وَاحِدْ.
هُو يَخْدِمْ لِلْمُلُوكْ
وَ مَا لِلنَّاسْ الْعَادِيِّينْ.