٢٠
١ الْكَوْشَاتْ تِلِزّ فِي الْمُعْيَارْ
وَ الْبِلْبِلْ تِلِزّ فِي الدُّوَاسْ.
السَّكَّارِي كَنْ يَسْكَرْ دَايْماً،
يَبْقَى نَادُمْ الْمَا عِنْدَهْ رَاسْ.
٢ غَضَبْ الْمَلِكْ مِثِلْ قَرْقَرَانْ الدُّودْ.
كَنْ تَلْعَبْ بَيَّهْ،
تُمُوتْ.
٣ الْيَابَى الْمَشَاكِلْ يِوَصِّفْ شَرَفَهْ
وَ لَاكِنْ الْمُنَافِقْ لِلْهُرَاجْ يِفَتِّشَهْ.
٤ فِي وَكْت الْخَرِيفْ،
الْكَسْلَانْ مَا يَحْرِتْ
وَ فِي الدَّرَتْ،
يِفَتِّشْ نَتِيجَةْ وَ مَا يَلْقَاهَا.
٥ الْفِكِرْ فِي قَلِبْ الْإِنْسَانْ
مِثِلْ أَلْمِي فِي بِيرْ طَوِيلَةْ،
إِلَّا الْفَاهِمْ يَقْدَرْ يِسِلَّهْ.
٦ كَتِيرْ مِنْ النَّاسْ يِسْتَكْبَرَوْا
وَ يُقُولُوا عِنْدُهُمْ خَيْر.
وَ لَاكِنْ سِيدْ الْأَمَانْ،
وَيْن بِنْلَقِي؟
٧ الصَّالِحْ يِعِيشْ تَمَامْ مُدَّةْ حَيَاتَهْ
وَ مَبْرُوكْ لِعِيَالَهْ مِنْ بَعَدَهْ.
٨ وَكِتْ الْمَلِكْ قَاعِدْ يِسَوِّي الشَّرِيعَةْ،
هُو مِثِلْ يِغَرْبِلْ الْغَلَّةْ
يَعْنِي يِفَنِّدْ الْخَيْر مِنْ الشَّرّ.
٩ يَاتُو يَقْدَرْ يُقُولْ:
«أَنَا طَهَّرْت قَلْبِي
وَ بَتَّانْ مَا عِنْدِي أَيِّ ذَنِبْ؟»
١٠ اللّٰهْ حَرَّمْ الْوَزِنْ وَ الْمِكْيَالْ الْمَا ثَابِتْ،
وَاحِدْ لِلشَّرِي وَ وَاحِدْ لِلْبَيْع.
١١ حَتَّى الصَّبِي يِنْعَرِفْ بِأَعْمَالَهْ
كَنْ أَفْعَالَهْ صَافِيِّينْ وَ عَدِيلِينْ.
١٢ الْأَدَانْ التَّسْمَعْ وَ الْعَيْن التِّشِيفْ،
هُمَّنْ الْإِتْنَيْن اللّٰهْ بَسْ خَلَقَاهُمْ.
١٣ كَنْ تِحِبّ النَّوْم،
تَفْقَرْ.
كُونْ وَاعِي أَشَانْ تَشْبَعْ.
١٤ فِي السُّوقْ،
الْيَشْرِي يُقُولْ:
«دَا شَيْن،
دَا مَا سَمَحْ!»
وَ وَكِتْ يِقَبِّلْ بَيْتَهْ،
يَشْكُرْ سُوقَهْ.
١٥ الدَّهَبْ مَوْجُودْ وَ الْمَرَجَانْ كَتِيرْ
وَ لَاكِنْ الزِّينَةْ الْجَمِيلَةْ مَرَّةْ وَاحِدْ،
هُو اللِّسَانْ الْيَنْطِي الْعِلِمْ.
١٦ الْيَضْمَنْ نَادُمْ مَا مَعْرُوفْ،
شِيلْ خَلَقَهْ
وَ كَنْ يَضْمَنْ أَجَانِبْ،
أَكْرُبْ مِنَّهْ ضَمَانْ.
١٧ الْمَالْ الْحَرَامْ،
أَكْلَهْ حَلُو لِلْإِنْسَانْ
لَاكِنْ فِي الأَخِيرْ،
يَبْقَى لَيَّهْ مِثِلْ حَصْحَصْ فِي خَشْمَهْ.
١٨ بِالشَّوْرَةْ،
الْخِدْمَةْ تَبْقَى قَوِيَّةْ
وَ قُودْ الْحَرِبْ بِمَعْلُومَاتْ.
١٩ الْيَكْشِفْ الْعَشِيرْ،
هُو خَايِنْ.
وَ الْقَوَّالْ،
مَا تِرَافِقَهْ.
٢٠ الْيَلْعَنْ أَبُوهْ وَ أَمَّهْ
نُورَهْ يُمُوتْ فِي أُسْط الضَّلَامْ.
٢١ الْمَالْ التَّلْقَاهْ عَجَلَةْ
فِي الأَخِيرْ مَا عِنْدَهْ بَرَكَةْ.
٢٢ مَا تِلْكَفَّى الْفَسَالَةْ السَّوَّوْهَا لَيْك،
أَتْوَكَّلْ عَلَيْ اللّٰهْ وَ هُو يِنَجِّيكْ.
٢٣ اللّٰهْ حَرَّمْ تِسَوِّي مِكْيَالْ لِلْبَيْع
وَ مِكْيَالْ لِلشَّرِي
وَ الْمِيزَانْ هَنَا الْغَشّ كُلَ،
مِنَّهْ أَنْقَرِعْ!
٢٤ اللّٰهْ بَسْ الْيُقُودْ خَطْوَاتْ الْإِنْسَانْ.
وَ بَنِي آدَم مَا يَعَرِفْ شُنُو فِي طَرِيقَهْ.
٢٥ وَكِتْ تِسَوِّي مُعَاهَدَةْ بَلَا فِكِرْ
مَعَ اللّٰهْ،
دَا شَرَكْ لَيْك.
أَشَانْ بَعَدَيْن تِفَكِّرْ
فِي مُعَاهَدَتَكْ وَ تَنْدَمْ.
٢٦ الْمَلِكْ الْحَكِيمْ يُدُقّ الْعَاصِيِينْ فِي الْمَدَقّ
وَ بَعَدْ دَا،
يَرْحَكْهُمْ.
٢٧ فِكِرْ الْإِنْسَانْ،
هُو فَانُوسْ الْاللّٰهْ يَنْطِيهْ،
وَ بَيَّهْ الْإِنْسَانْ يَكْشِفْ
دَاخَلْ قَلْبَهْ.
٢٨ الْخَيْر وَ الْأَمَانْ يَحْمُوا الْمَلِكْ
وَ بِخَيْرَهْ يِقَوِّي مُلْكَهْ.
٢٩ الْقُدْرَةْ جَمَالْ لِلشَّبَابْ
وَ الشَّيْب شَرَفْ لِلشِّيَّابْ.
٣٠ الْفَرِشْ دَوَاءْ لِلْفَسَالَةْ
وَ الدَّقِّينْ شِفَاءْ لِلْقَلِبْ.