عظمة عمل الربّ
٣٧
١ وَ فِي شَانْ دَا،
قَلْبِي رَجَفْ
لَحَدِّي مِثِلْ يَمْرُقْ مِنْ صَدْرِي.
٢ أَسْمَعَوْا حِسَّهْ الْمِثِلْ الرَّعَدْ!
أَسْمَعَوْا الدَّقْدَاقْ الشَّدِيدْ الْيَمْرُقْ مِنْ خَشْمَهْ!
٣ الرَّبّ يَطْلِقْ بَرَّاقْتَهْ تِحِتْ كُلَّ السَّمَاءْ
وَ يِرَسِّلْهَا لَحَدِّي آخِرْ الْأَرْض.
٤ وَ بَعَدْ دَا،
حِسَّهْ الْمُخِيفْ يَمْرُقْ
وَ حِسّ مَجْدَهْ يَبْقَى مِثِلْ رَعَدْ.
وَ بَرَّاقْتَهْ مَا تَقِيفْ
وَكِتْ حِسَّهْ قَاعِدْ يِنْسَمِعْ.
٥ حِسّ الرَّبّ يِدَقْدِقْ وَ يِخَوِّفْ
وَ يِسَوِّي عَجَايِبْ كُبَارْ الْأَنِحْنَ مَا نَفْهَمَوْهُمْ.
٦ هُو يُقُولْ لِلتَّلَجْ:
«دَفِّقْ فِي الْأَرْض!»
وَ يُقُولْ لِلتَّشْكتَشاكَةْ:
«أَبْقَيْ مَطَرْ!
أَيْوَى،
صُبِّي مَطَرْ شَدِيدْ!»
٧ وَ فِي الْوَكِتْ دَا بَسْ،
يِوَقِّفْ خِدْمَةْ كُلَّ إِنْسَانْ
أَشَانْ كُلُّهُمْ يَعَرْفُوا
دَا عَمَلَهْ هُو.
٨ خَلَاصْ،
أَيِّ حَيْوَانْ يَمْشِي لِنُقُرْتَهْ
وَ يَرْقُدْ فِي مَسْكَنَهْ.
٩ رِيحْ الزَّقَّايْ تَجِي مِنْ الْجُنُوبْ
وَ الْبَرِدْ يَجِي مِنْ الْمُنْشَاقْ.
١٠ نَفْخَةْ الرَّبّ تِكَوِّنْ التَّلَجْ
وَ تِجَمِّدْ أَلْمِي الْبَحَرْ.
١١ هُو يَمْلَا السَّحَابْ بِبُرُودَةْ
وَ يِشَتِّتْ السَّحَابْ بِبَرَّاقَةْ جَايْ وَ جَايْ.
١٢ هُو بَسْ الْيِلِفّ السَّحَابْ
لِيِطَبِّقْ كُلَّ أَوَامِرَهْ فِي كُلَّ وِجْه الْأَرْض.
١٣ وَ يِرَسِّلْهُمْ فِي الْأَرْض لِيِعَاقِبْ النَّاسْ
أَوْ يِبَيِّنْ رَحْمَتَهْ.
سُؤال أَلِيهُو لأيُّوب
١٤ يَا أَيُّوبْ،
خُطّ أَدَانَكْ لِلْكَلَامْ دَا!
أَسْكُتْ وَ شِيفْ عَجَايِبْ الرَّبّ!
١٥ إِنْتَ تَعَرِفْ كِكَّيْف الرَّبّ يَحْكِمْ السَّحَابْ
وَ كِكَّيْف السَّحَابْ يِسَوِّي الْبَرَّاقَةْ وَلَّا؟
١٦ وَ إِنْتَ تَعَرِفْ كِكَّيْف الرَّبّ خَطَّ السَّحَابْ
الْمُتَحَرِّكْ بَيْن السَّمَاءْ وَ الْأَرْض؟
وَ تَعَرِفْ عَجَايِبْ الرَّبّ
وَ عِلْمَهْ التَّمَامَةْ وَلَّا؟
١٧ وَكِتْ الْأَرْض ثَابْتَةْ تِحِتْ رِيحْ الْجُنُوبْ،
خُلْقَانَكْ يَبْقَوْا حَامِيِينْ مِنْ حَمُوهَا.
١٨ الرَّبّ خَلَقْ السَّحَابْ وَ قَوَّاهْ
مِثِلْ أَمْ شَوَّافَةْ هِنْت حَدِيدْ مَقْطُوعْ.
وَ إِنْتَ تَقْدَرْ تِسَوِّي مِثْلَهْ؟
١٩ خَلَاصْ،
عَلِّمْنَا
الْوَاجِبْ نُقُولُوهْ لِلرَّبّ.
مَا نَعَرْفُوا شَيّءْ
وَ قَاعِدِينْ فِي الضَّلَامْ.
٢٠ وَكِتْ نِكَلِّمْ،
وَاجِبْ نِخَبِّرْ الرَّبّ وَلَّا؟
مِثِلْ دَا،
نَادُمْ مَا يِتْمَنَّى
لِنَفْسَهْ الْهَلَاكْ وَلَّا؟
٢١ مَا نَقْدَرَوْا نِشِيفُوا ضَيّ الْحَرَّايْ
فِي لُبّ السَّحَابْ الْكَتِيرْ.
وَ لَاكِنْ بَعَدْ الرِّيحْ تِشِيلْ السَّحَابْ دَا،
نُورْهَا يِبِينْ.
٢٢ مِنْ الْمُنْشَاقْ يَجِي ضَيّ مِثِلْ الدَّهَبْ
وَ نُورْ جَلَالْ الرَّبّ يَبْهَتْنَا.
٢٣ هُو الْقَادِرْ،
مَا نَقْدَرَوْا نِقَرُّبُوا لَيَّهْ
وَ قُوَّتَهْ كَبِيرَةْ.
وَ عِنْدَهْ الْحَقّ وَ الْعَدَالَةْ بِكَتَرَةْ
وَ لَاكِنْ مَا يَظْلُمْ إِنْسَانْ.
٢٤ فِي شَانْ دَا،
وَاجِبْ النَّاسْ
يَخَافَوْا مِنَّهْ.
وَ لَاكِنْ هُو مَا لَمَّاهْ
بِالْيِسَوُّوا نُفُوسْهُمْ حَكِيمِينْ.