الربّ يأدِّب الإنْسان
٣٦
١ وَ أَلِيهُو قَالْ بَتَّانْ:
٢ أَصْبُرْنِي شِيَّةْ،
نِدَوْر نِخَبِّرَكْ
أَشَانْ بَتَّانْ كُلَ عِنْدِي كَلَامْ
فِي شَانْ الرَّبّ.
٣ عِرْفِتِي لِقِيتْهَا مِنْ بَعِيدْ
وَ نِوَصِّفْ كَدَرْ الْخَلَقَانِي عَادِلْ.
٤ أَشَانْ بِالصَّحِيحْ،
كَلَامِي دَا مَا كِدِبْ
وَ أَنَا الْفِكْرِي تَمَامْ نَقْعُدْ مَعَاكْ.
٥ الرَّبّ قَادِرْ،
مَا يَحْقِرْ الْإِنْسَانْ
وَ مَا فِي شَيّءْ الْهُو مَا يَعَرْفَهْ.
٦ لِلْعَاصِي،
مَا يِخَلِّيهْ يِعِيشْ
وَ لَاكِنْ يَنْطِي الْمَسَاكِينْ حُقُوقْهُمْ.
٧ وَ نَذْرَهْ مَا يِفَارِقْ الصَّالِحْ
وَ يُخُطُّهُمْ فِي كُرْسِي الْمُلُكْ
وَ يَبْقَوْا عَالِيِينْ دَايْماً.
٨ وَ كَنْ هُمَّنْ مَسَاجِينْ
فِي لُبّ الْجَنَازِيرْ
وَ كَنْ كَرَبَوْهُمْ فِي
قُيُودْ الْمُضَايَقَةْ،
٩ خَلَاصْ بِمِثِلْ دَا،
الرَّبّ يِخَبِّرْهُمْ بِعَمَلْهُمْ
وَ عِصْيَانْهُمْ وَكِتْ هُمَّنْ أَسْتَكْبَرَوْا.
١٠ هُو يُفُكّ أَدَانْهُمْ لِيِأَدِّبْهُمْ
وَ يَامُرْهُمْ يِقَبُّلُوا مِنْ الْفَسَالَةْ.
١١ وَ كَنْ هُمَّنْ سِمْعَوْا كَلَامَهْ
وَ عَبَدَوْه،
خَلَاصْ يِعِيشُوا كُلَّ حَيَاتْهُمْ بِخَيْر
وَ كُلَّ مُدَّةْ عُمُرْهُمْ فِي نِعْمَةْ.
١٢ وَ لَاكِنْ كَنْ مَا سِمْعَوْا كَلَامَهْ،
يُمُوتُوا بِالسِّلَاحْ
وَ يِدَّمَّرَوْا مِنْ قِلَّةْ الْفِهِمْ.
١٣ الْكُفَّارْ قُلُوبْهُمْ مَلَانِينْ بِزَعَلْ
وَ مَا يِكَوْرُكُوا لِلْفَزَعْ وَكِتْ يِجَنْزِرْهُمْ.
١٤ هُمَّنْ يُمُوتُوا فِي شَبَابْهُمْ
أُسْط الشَّرَامِيطْ فِي بُيُوتْ أَصْنَامْهُمْ.
١٥ وَ لَاكِنْ الرَّبّ يِخَلِّصْ الْمِسْكِينْ بِالتَّعَبْ
وَ بِالضِّيقَةْ،
يِحَذِّرَهْ.
١٦ يَا أَيُّوبْ،
إِنْتَ كُلَ الرَّبّ يَمُرْقَكْ مِنْ الضِّيقَةْ
لِيَنْطِيكْ حُرِّيَّةْ كَامِلَةْ
وَ مَوَاعِينَكْ يِنْمَلُوا بِأَكِلْ حَلُو.
١٧ وَ لَاكِنْ هَسَّعْ،
إِنْتَ لِقِيتْ مُحَاكَمَةْ
مِثِلْ الْعَاصِي
وَ الْمُحَاكَمَةْ دِي،
مَا تَنْجَى مِنْهَا.
١٨ فَكِّرْ!
مَا تِخَلِّي الْغُنَى يِوَدِّرَكْ
وَ مَا تِخَلِّي الرَّشْوَةْ تِبَعِّدَكْ.
١٩ وَ لَا غُنَاكْ وَ لَا دَهَبَكْ مَا يِتِمُّوكْ
وَ كُلَّ قُدْرَةْ جِسْمَكْ مَا تِسَاعِدَكْ.
٢٠ مَا تِتْمَنَّى اللَّيْل
وَكِتْ يَمُرْقُوا النَّاسْ مِنْ بَكَانَاتْهُمْ.
٢١ أَنْقَرِعْ مَا تِوَجِّهْ عَلَيْ الشَّرّ،
مَا تَعَزِلَهْ فِي شَانْ تَعَبَكْ.
الربّ عَالِي من كل شيّء
٢٢ شِيفُوا!
الرَّبّ عَالِي بِقُدُرْتَهْ.
يَاتُو مُعَلِّمْ مِثْلَهْ؟
٢٣ يَاتُو يَقْدَرْ يِحَاسِبَهْ فِي عَمَلَهْ؟
يَاتُو يَقْدَرْ يُقُولْ لَيَّهْ:
«إِنْتَ سَوَّيْت ظُلُمْ»؟
٢٤ أَذَّكَّرْ وَ عَظِّمْ عَمَلَهْ،
عَمَلَهْ الْيِغَنُّوا بَيَّهْ النَّاسْ.
٢٥ أَيِّ إِنْسَانْ يِشِيفَهْ
وَ أَيِّ نَادُمْ يَنْظُرَهْ مِنْ بَعِيدْ.
٢٦ الرَّبّ عَظِيمْ وَ هُو فَايِتْ فِهِمْنَا
وَ مَا فِي نَادُمْ يَحْسِبْ سِنِينْ عُمْرَهْ.
٢٧ وَ يِلِمّ بُخَارْ أَلْمِي فِي السَّحَابْ
وَ يِنَزِّلَهْ بَتَّانْ مَطَرْ مِنْ جَدِيدْ.
٢٨ السَّحَابْ يُصُبّ الْمَطَرْ دَا
وَ أَلْمِيهْ يِسِيلْ لِنَاسْ كَتِيرِينْ.
٢٩ يَاتُو يَفْهَمْ
كِكَّيْف الرَّبّ يُخُطّ السَّحَابْ
وَ يِرَسِّلْ الرَّعَدْ مِنْ لُبّ السَّمَاءْ؟
٣٠ هُو يِرَسِّلْ النُّورْ حَوَالَيَّهْ
وَ يِغَطِّي الْبَحَرْ الْغَرِيقْ.
٣١ وَ بِكُلَّ الشَّيّءْ دَا،
يَحْكِمْ فِي الشُّعُوبْ
وَ يَنْطِيهُمْ مَعَاشْ بِكَتَرَةْ.
٣٢ هُو يِشِيلْ الْبَرَّاقَةْ بِإِيدَيْنَهْ
وَ يِوَصِّفْ لَيْهَا هَدَفْهَا.
٣٣ بِالرَّعَدْ،
يِوَصِّفْ جَيْتَهْ
وَ الْبَهَايِمْ يِحِسُّوا كَنْ هُو قَرَّبْ.