اللّه يسْأل أيُّوب
٣٨
١ وَ خَلَاصْ،
اللّٰهْ سَأَلْ أَيُّوبْ مِنْ لُبّ الرِّيحْ الشَّدِيدَةْ وَ قَالْ:
٢ يَاتُو الْمَا يِخَلِّي نِيّتِي تَبْقَى وَاضْحَةْ
بِكَلَامْ بَلَا مَعْرَفَةْ؟
٣ أَرْبُطْ صُلْبَكْ مِثِلْ رَاجِلْ فَحَلْ!
وَ أَنَا نَسْأَلَكْ وَ إِنْتَ تُرُدّ لَيِّ!
اللّه هو سيد الأرْض
٤ إِنْتَ قَاعِدْ وَيْن وَكِتْ أَنَا أَسَّسْت الْأَرْض؟
قُولَهْ لَيِّ حَسَبْ مَعْرَفَتَكْ.
٥ يَاتُو خَطَّ مَقَاسْ الْأَرْض،
إِنْتَ تَعَرْفَهْ وَلَّا؟
وَ يَاتُو مَدَّ فَوْقهَا حَبِلْ الْمَقَاسْ؟
٦ وَ عَمَدْهَا دَوْل ثَابْتِينْ فِي شُنُو؟
وَ يَاتُو خَطَّ الْحَجَرْ الْمُهِمّ،
٧ وَكِتْ نُجُومْ الصَّبَاحْ يِغَنُّوا سَوَا
وَ كُلَّ مَلَائِكَةْ الرَّبّ يَفْرَحَوْا؟
٨ وَ يَاتُو خَطَّ حُدُودْ لِلْبَحَرْ
وَكِتْ مَرَقْ مِنْ بَطُنْ الْأَرْض؟
٩ لَبَّسْتَهْ بِسَحَابْ مِثِلْ خَلَقْ
وَ غَطَّيْتَهْ بِغَمَامْ أَضْلَمْ.
١٠ وَ خَطَّيْت حُدُودَهْ
وَ سَوَّيْت لَيَّهْ بَابْ وَ قُفُلْ.
١١ وَ أَنَا قُلْت لَيَّهْ:
«تَجِي هِنِي بَسْ،
مَا تُفُوتْ الْبَكَانْ دَا!
هِنِي بَسْ تَقِيفْ قُدْرَةْ مَوْجَكْ!»
١٢ وَ إِنْتَ!
يَوْم وَاحِدْ،
أَمَرْت الصَّبَاحْ
لِيَصْبِحْ وَلَّا؟
أَيْوَى،
أَوْرَيْت الْفَجُرْ لِيَطْلَعْ
١٣ لِيَمْسُكْ الْأَرْض مِنْ طَرَفْهَا
وَ يِحِتّ مِنْهَا الْعَاصِيِينْ وَلَّا؟
١٤ وَ بِفَجُرْ،
الْأَرْض تِنْشَافْ وَاضْحَةْ
مِثِلْ الطِّينَةْ الْخَطَّوْا فَوْقهَا الْخِتِمْ
وَ لَوْنهَا يَبْقَى مِثِلْ جَمَّلَوْهَا بِلُبَاسْ.
١٥ لَاكِنْ الْعَاصِيِينْ،
نُورْهُمْ يِوَدِّرْ
وَ دُرَاعْهُمْ الْيَرْفَعَوْه،
يِنْكَسِرْ.
١٦ وَ إِنْتَ وَصَّلْت لَحَدِّي قَعَرْ الْبَحَرْ وَلَّا؟
وَ رُغْت فِي بَكَانَاتْ الْغَرِيقِينْ هَنَا الْبَحَرْ وَلَّا؟
١٧ وَ بِيبَانْ الْمَوْت أَنْفَتَحَوْا لَيْك قِدَّامَكْ وَلَّا؟
وَ بِيبَانْ الضَّلَامْ الْهَالِكْ،
شِفْتُهُمْ وَلَّا؟
١٨ وَ تَعَرِفْ عُرْض الْأَرْض وَلَّا؟
خَلَاصْ كَنْ تَعَرِفْ كُلَّ الشَّيّءْ دَا،
قُولَهْ!
١٩ النُّورْ،
وَيْن مَسْكَنَهْ؟
وَ الضَّلَامْ،
وَيْن بَكَانَهْ؟
٢٠ تَقْدَرْ تَكْرُبْهُمْ فِي بَكَانْهُمْ
وَ أَيِّ وَاحِدْ تِوَدِّيهْ لِمَسْكَنَهْ وَلَّا؟
٢١ خَلَاصْ،
أَكِيدْ إِنْتَ تَعَرْفَهْ
أَشَانْ فِي الْوَكِتْ دَاكْ،
إِنْتَ وِلْدَوْك وَلَّا؟
وَ أَكِيدْ إِنْتَ عُمْرَكْ طَوِيلْ
زِيَادَةْ وَلَّا؟
٢٢ إِنْتَ وَصَّلْت
لَحَدِّي مَخَازِنْ التَّلَجْ وَلَّا؟
وَ إِنْتَ شِفْت
مَخَازِنْ الْبَرَدْ وَلَّا؟
٢٣ أَنَا خَطَّيْتهُمْ طَرَفْ لِوَكْت الضِّيقَةْ،
لِيَوْم هَنَا حَرِبْ وَ دُوَاسْ.
٢٤ وَيْن الدَّرِبْ الْفَوْقَهْ الْبَرَّاقَةْ تِنْقَسِمْ؟
وَ وَيْن الدَّرِبْ الْبَيَّهْ رِيحْ الصَّبَاحْ تُسُوقْ فِي الْأَرْض؟
٢٥ يَاتُو يُفُكّ بَابْ السَّمَاءْ وَ يِنَزِّلْ الْمَطَرْ
وَ يِسَوِّي دَرِبْ لِلْبَرَّاقَةْ وَ الرَّعَدْ؟
٢٦ يَاتُو يِنَزِّلْ مَطَرْ فِي أَرْض الْبَلَا نَاسْ
وَ فِي صَحَرَاء الْمَا عِنْدَهَا إِنْسَانْ؟
٢٧ وَ دَا،
لِيَرْوِي أَرْض جَفَافْ وَ خَرَابْ
أَشَانْ الْقَشّ يَبْذُرْ
وَ يُقُمّ فَوْقهَا.
٢٨ الْمَطَرَةْ عِنْدَهَا أَبُو وَلَّا؟
وَ يَاتُو وِلِدْ الْكَرَنْج؟
٢٩ وَ بَطُنْ يَاتُو جَابَتْ الْبَرَدْ؟
وَ يَاتُو وِلِدْ التَّلَجْ الْيَنْزِلْ مِنْ السَّمَاءْ؟
٣٠ الْأَلْمِي يَبْقَى مِثِلْ حَجَرْ
وَ أَلْمِي الْغَرِيقْ يَجْمِدْ.
٣١ وَ إِنْتَ تَقْدَرْ تَرْبُطْ نُجُومْ التُّرَيَّةْ
أَوْ تِحِلّ حِزَامْ الصَّبِي الْمَغْمِي وَلَّا؟
٣٢ هَلْ تَقْدَرْ تِطَلِّعْ النُّجُومْ فِي وَكِتْهُمْ وَلَّا؟
وَ إِنْتَ تَقْدَرْ تُقُودْ نَجْمَةْ الزَّرَافَةْ وَ نُجُومْهَا وَلَّا؟
٣٣ إِنْتَ تَعَرِفْ نِظَامْ السَّمَاءْ وَلَّا؟
وَلَّا إِنْتَ بَسْ تِنَظِّمْ قَوَانِينْ الْأَرْض؟
٣٤ إِنْتَ تَقْدَرْ تَامُرْ السَّحَابْ لِيِنَزِّلْ مَطَرْ شَدِيدْ
لَحَدِّي أَلْمِيهْ يِغَطِّيكْ وَلَّا؟
٣٥ وَ إِنْتَ بَسْ تِرَسِّلْ الْبَرَّاقَةْ لَحَدِّي هَدَفَهْ وَلَّا؟
وَ لَيْك إِنْتَ،
هُمَّنْ يُقُولُوا:
«دَاهُو أَنِحْنَ.»
٣٦ يَاتُو أَنْطَى حِكْمَةْ لِأَبُنْ غَنَمْ؟
وَ يَاتُو أَنْطَى فِهِمْ لِلدِّيكْ؟
٣٧ يَاتُو يَقْدَرْ بِحِكْمَتَهْ
يَحْسِبْ السَّحَابْ؟
وَ يَاتُو يَقْدَرْ
يِدَنْقِسْ مَخَازِنْ أَلْمِي السَّمَاءْ
٣٨ أَشَانْ التُّرَابْ يِلِمّ بَكَانْ وَاحِدْ
وَ دَرَادِيمْ الطِّينَةْ يِلَّصَّقَوْا؟
اللّه هو الينْطي أكِل
٣٩ وَ يَاتُو يَقْنُصْ لِيِأَكِّلْ الدُّودْ
وَ يِسِلّ جُوعْ عِيَالَهْ
٤٠ وَكِتْ هُمَّنْ قَاعِدِينْ فِي نُقْرِتْهُمْ
وَ سَاكْنِينْ فِي دُنْقُرْهُمْ؟
٤١ وَ يَاتُو يَنْطِي أَكِلْ لِلْغُرَابْ
وَكِتْ عِيَالَهْ يِنَادُوا الرَّبّ لِلْفَزَعْ
وَ قَاعِدِينْ وِحَيْدهُمْ بَلَا أَكِلْ؟