1 أخبار 28

دَاوُد أمر سُلَيْمَان يبْني البيت

١ وَ دَاوُدْ لَمَّ كُلَّ كُبَارَاتْ بَنِي إِسْرَائِيلْ فِي أُورُشَلِيمْ. وَ دَوْل كُلَّ كُبَارَاتْ الْقَبَايِلْ وَ كُبَارَاتْ الْمَجْمُوعَاتْ الْيَخْدُمُوا لِلْمَلِكْ وَ قُيَّادْ الْآلَافْ وَ قُيَّادْ الْمِيَاتْ وَ الْمَسَائِيلْ فِي كُلَّ الْخُمَامْ وَ الْبَهَايِمْ هَنَا الْمَلِكْ وَ أَوْلَادَهْ. وَ لَمَّ كُلَّ الْخَدَّامِينْ وَ كُلَّ الْفَحَلِينْ وَ الرُّجَالْ الْفُرَّاسْ.

٢ وَ الْمَلِكْ دَاوُدْ قَمَّ فَوْق بِطُولَهْ وَ قَالْ: «أَسْمَعَوْنِي، يَا أَخْوَانِي وَ شَعَبِي. أَنَا عِنْدِي نِيَّةْ لِنَبْنِي بَيْت الرَّاحَةْ لِصَنْدُوقْ مُعَاهَدَةْ اللّٰهْ. وَ دَا الْبَكَانْ الْإِلٰـهْنَا يُخُطّ فَوْقَهْ رِجِلَيْنَهْ. وَ أَنَا جَاهِزْ لِلْبُنَى دَا. ٣ وَ لَاكِنْ الرَّبّ قَالْ لَيِّ: ‹إِنْتَ مَا تَبْنِي لَيِّ بَيْت أَشَانْ إِنْتَ رَاجِلْ مُحَارِبْ وَ دَفَّقْت دَمّ كَتِيرْ.› ٤ وَ لَاكِنْ اللّٰهْ إِلٰـهْ بَنِي إِسْرَائِيلْ عَزَلَانِي مِنْ كُلَّ عَايِلَةْ أَبُويِ أَشَانْ نَحْكِمْ فِي إِسْرَائِيلْ. أَشَانْ هُو عَزَلْ قَبِيلَةْ يَهُوذَا تَحْكِمْ وَ مِنْ قَبِيلَةْ يَهُوذَا هُو عَزَلْ عَايِلَةْ أَبُويِ وَ مِنْ كُلَّ أَخْوَانِي عِيَالْ أَبُويِ هُو عَزَلْنِي أَنَا لِنَبْقَى مَلِكْ فِي كُلَّ بَنِي إِسْرَائِيلْ. ٥ وَ اللّٰهْ أَنْطَانِي عِيَالْ كَتِيرِينْ وَ مِنْهُمْ عَزَلْ وِلَيْدِي سُلَيْمَانْ وَ خَطَّاهْ فِي كُرْسِي الْمَلِكْ هَنَا مَمْلَكَةْ اللّٰهْ فِي إِسْرَائِيلْ. ٦ وَ قَالْ لَيِّ: ‹وِلَيْدَكْ سُلَيْمَانْ بَسْ يَبْنِي لَيِّ بَيْت بِفَضَايْ. أَشَانْ أَنَا عَزَلْتَهْ لِيَبْقَى لَيِّ إِبْنِي وَ أَنَا نَبْقَى لَيَّهْ أَبُوهْ. ٧ وَ نِثَبِّتْ مُلْكَهْ إِلَى الْأَبَدْ كَنْ هُو يَحْفَضْ وَ يِطَبِّقْ وَصِيَّاتِي وَ شُرُوطِي مِثِلْ الْيَوْم.›

٨ «وَ هَسَّعْ دَا، يَا أَخْوَانِي! قِدَّامْ كُلَّ بَنِي إِسْرَائِيلْ جَمَاعَةْ اللّٰهْ وَ قِدَّامْ إِلٰـهْنَا اللّٰهْ الْقَاعِدْ يَسْمَعْكُو، أَنَا نُقُولْ لَيْكُو: ‹أَحْفَضَوْا وَ تَابُعُوا وَصَايَا اللّٰهْ إِلٰـهْكُو وَ إِنْتُو تَوْرُثُوا الْبَلَدْ الْعَدِيلَةْ دِي وَ تِخَلُّوهَا وَرَثَةْ لِعِيَالْكُو بَعَدْكُو إِلَى الْأَبَدْ.›

٩ «وَ إِنْتَ، يَا وِلَيْدِي سُلَيْمَانْ، أَعَرِفْ اللّٰهْ رَبّ أَبُوكْ وَ أَعَبُدَهْ بِكُلَّ قَلْبَكْ وَ بِنِيَّةْ مُخْلِصَةْ. أَشَانْ اللّٰهْ يَكْشِفْ قَلِبْ الْإِنْسَانْ وَ يَعَرِفْ الْفِكِرْ هَنَا أَيِّ نَادُمْ. وَ كَنْ إِنْتَ تِفَتِّشَهْ، هُو يِخَلِّيكْ تَلْقَاهْ. وَ لَاكِنْ كَنْ أَبَيْتَهْ كَمَانْ، هُو كُلَ يَابَاكْ إِلَى الْأَبَدْ. ١٠ وَ هَسَّعْ، شِيفْ! دَاهُو اللّٰهْ عَزَلَكْ لِتَبْنِي لَيَّهْ بَيْت وَ الْبَيْت دَا، يَبْقَى لَيَّهْ بَكَانْ مُقَدَّسْ. شِدّ حَيْلَكْ وَ أَبْدَا الْخِدْمَةْ.»

دَاوُد أنْطى رسِم البُنى

١١ وَ خَلَاصْ، دَاوُدْ أَنْطَاهْ لِوِلَيْدَهْ سُلَيْمَانْ الرَّسِمْ هَنَا الْبَكَانْ الْمُقَدَّسْ. وَ دَا غُرْفَةْ الْمَدَخَلْ وَ الْبُيُوتْ وَ الْمَخَازِنْ وَ الْغُرَفْ الْفَوْق وَ الْغُرَفْ الدَّاخَلْ وَ بَيْت صَنْدُوقْ الْمُعَاهَدَةْ. ١٢ وَ أَنْطَاهْ رَسِمْ هَنَا كُلَّ شَيّءْ الْعِنْدَهْ فِي فِكْرَهْ الْيِدَوْر يَبْنِيهْ، مِثِلْ الْفَضَايْ هَنَا بَيْت اللّٰهْ وَ كُلَّ الْبُيُوتْ الْيِحَوُّقُوا الْفَضَايْ وَ الْمَخَازِنْ هَنَا بَيْت الرَّبّ وَ الْمَخَازِنْ هَنَا الْمُعِدَّاتْ الْمُخَصَّصِينْ. ١٣ وَ أَنْطَاهْ أَسَامَيْ هَنَا مَجْمُوعَاتْ رُجَالْ الدِّينْ وَ اللَّاوِيِّينْ وَ كُلَّ الْخِدْمَةْ التُّخُصّ بَيْت اللّٰهْ وَ كُلَّ مُعِدَّاتْ الْخِدْمَةْ هَنَا بَيْت اللّٰهْ. ١٤ وَ وَصَّفَهْ وَزِنْ الدَّهَبْ الْوَاجِبْ لِلْمُعِدَّاتْ الْيَصْنَعَوْهُمْ بِدَهَبْ وَ وَزِنْ الْفُضَّةْ الْوَاجِبْ لِلْمُعِدَّاتْ الْيَصْنَعَوْهُمْ بِفُضَّةْ. وَ دَا حَسَبْ الْإِسْتِعْمَالْ هَنَا أَيِّ شَيّءْ. ١٥ وَ وَصَّفَهْ وَزِنْ هَنَا الْفَانُوسْ وَ نِيرَانَهْ الْيَصْنَعَوْهُمْ بِدَهَبْ وَ وَزِنْ هَنَا الْفَانُوسْ وَ نِيرَانَهْ الْيَصْنَعَوْهُمْ بِفُضَّةْ وَ دَا حَسَبْ الْإِسْتِعْمَالْ هَنَا أَيِّ فَانُوسْ. ١٦ وَ وَصَّفَهْ وَزِنْ الدَّهَبْ الْيِسَوُّوا بَيَّهْ طَرَابِيزْ الْيِقَدُّمُوا فَوْقهُمْ الْخُبْزَةْ لِلّٰهْ وَ وَزِنْ الْفُضَّةْ الْيِسَوُّوا بَيْهَا طَرَابِيزْ آخَرِينْ. ١٧ وَ وَصَّفَهْ وَزِنْ هَنَا الْحَدَايِدْ الْيِسِلُّوا بَيْهُمْ اللَّحَمْ وَ الْكِيسَانْ الْيُرُشُّوا بَيْهُمْ وَ الْأَبَارِيقْ الْبِدَهَبْ صَافِي. وَ وَصَّفَهْ وَزِنْ الدَّهَبْ هَنَا الْكِيسَانْ الْبِدَهَبْ وَ وَزِنْ الْفُضَّةْ هَنَا الْكِيسَانْ الْبِفُضَّةْ. ١٨ وَ وَصَّفَهْ كُلَ، الْوَزِنْ هَنَا الدَّهَبْ الصَّافِي الْيِسَوُّوا بَيَّهْ الْمُخْبَرْ الْيِحَرُّقُوا فَوْقَهْ الْبَخُورْ. وَ وَصَّفَهْ الرَّسِمْ هَنَا الْعَرَبَةْ الْمُخَصَّصَةْ يَعْنِي سِدَادَةْ صَنْدُوقْ مُعَاهَدَةْ اللّٰهْ الْقَاعِدِينْ فَوْقهَا صُورَةْ مَخْلُوقِينْ السَّمَاوِيِّينْ هَنَا دَهَبْ الْمُمَطِّطِينْ جَنَاحَيْهُمْ وَ مُغَطِّيِّينْ بَيْهُمْ الصَّنْدُوقْ.

١٩ وَ دَاوُدْ قَالْ: «وَ دَا كُلَّ مَكْتُوبْ حَسَبْ الرَّسِمْ الْاللّٰهْ ذَاتَهْ وَصَّفَانِي لِكُلَّ الْخِدْمَةْ دِي.» ٢٠ وَ خَلَاصْ، دَاوُدْ قَالْ لِوِلَيْدَهْ سُلَيْمَانْ: «أَبْقَى شَدِيدْ وَ فَحَلْ وَ أَبْدَا الْخِدْمَةْ. مَا تَخَافْ وَ لَا تِنْبَهِتْ أَشَانْ الرَّبّ اللّٰهْ إِلٰـهِي قَاعِدْ مَعَاكْ. هُو مَا يِخَلِّيكْ وَ مَا يَابَاكْ لَحَدِّي كُمَالَةْ كُلَّ الْخِدْمَةْ هَنَا بَيْت اللّٰهْ. ٢١ وَ دَاهُو، أَعَرِفْ مَجْمُوعَاتْ رُجَالْ الدِّينْ وَ اللَّاوِيِّينْ الْيَخْدُمُوا فِي كُلَّ خِدْمَةْ بَيْت اللّٰهْ. وَ مَعَاكْ فِي الْخِدْمَةْ دِي، فِي نَاسْ الْعِنْدُهُمْ نِيَّةْ مُخْلِصَةْ وَ مَلَانِينْ بِخِبْرَةْ فِي كُلَّ الْخِدْمَةْ. وَ الْكُبَارَاتْ وَ كُلَّ الشَّعَبْ يِسَوُّوا كُلَّ شَيّءْ التَّامُرْهُمْ.»