عسْكر الملك و قُيّادهم
٢٧
١ وَ دَاهُو نَاسْ مِنْ بَنِي إِسْرَائِيلْ الْيَخْدُمُوا لِلْمَلِكْ.
وَ هُمَّنْ كُبَارَاتْ الْعَايِلَاتْ وَ قُيَّادْ الْآلَافْ وَ قُيَّادْ الْمِيَاتْ وَ الْمُرَاقِبِينْ.
وَ كُلَّ خِدْمِتْهُمْ تُخُصّ الْمَجْمُوعَاتْ الْعَسْكَرِيَّةْ الْيَخْدُمُوا بِأَمْ كَابَةْ أَيِّ شَهَرْ فِي طُولْ السَّنَةْ.
وَ أَيِّ مَجْمُوعَةْ عِنْدَهَا 24 000 رَاجِلْ.
٢ وَ قَايِدْ الْمَجْمُوعَةْ الْأَوَّلَانِيَّةْ هَنَا الشَّهَرْ الْأَوَّلْ،
هُو يَشَبْعَامْ وِلَيْد زَبْدِيِيلْ.
مَجْمُوعْتَهْ عِنْدَهَا 24 000 رَاجِلْ.
٣ وَ هُو مِنْ ذُرِّيَّةْ فَارِصْ وَ قَايِدْ كُلَّ الْعَسْكَرْ هَنَا الشَّهَرْ الْأَوَّلْ.
٤ وَ قَايِدْ الْمَجْمُوعَةْ التَّانِيَةْ هَنَا الشَّهَرْ التَّانِي،
هُو دُودَايْ مِنْ حِلَّةْ أَخُوخْ.
وَ مَجْمُوعْتَهْ عِنْدَهَا 24 000 رَاجِلْ وَ الْيُقُودْهُمْ هُو مِقْلُوتْ.
٥ وَ قَايِدْ الْمَجْمُوعَةْ التَّالْتَةْ هَنَا الشَّهَرْ التَّالِتْ،
هُو بَنَايَا وِلَيْد يَهُويَدَعْ رَاجِلْ دِينْ الْكَبِيرْ.
وَ مَجْمُوعْتَهْ عِنْدَهَا 24 000 رَاجِلْ.
٦ وَ بَنَايَا هُو رَاجِلْ فَارِسْ بَيْن الْقُيَّادْ التَّلَاتِينْ وَ هُو بَسْ كَبِيرْهُمْ.
وَ وِلَيْدَهْ عَمِزَبَادْ،
هُو كُلَ فِي الْمَجْمُوعَةْ دِي.
٧ وَ قَايِدْ الْمَجْمُوعَةْ الرَّابْعَةْ هَنَا الشَّهَرْ الرَّابِعْ،
هُو عَسَاحِيلْ أَخُو يُوَابْ وَ بَعَدَهْ كَمَانْ،
وِلَيْدَهْ زَبَدْيَا.
وَ مَجْمُوعْتَهْ عِنْدَهَا 24 000 رَاجِلْ.
٨ وَ قَايِدْ الْمَجْمُوعَةْ الْخَامْسَةْ هَنَا الشَّهَرْ الْخَامِسْ،
هُو شَمْحُوتْ الْمِنْ حِلَّةْ يِزْرَا.
وَ مَجْمُوعْتَهْ عِنْدَهَا 24 000 رَاجِلْ.
٩ وَ قَايِدْ الْمَجْمُوعَةْ السَّادْسَةْ هَنَا الشَّهَرْ السَّادِسْ،
هُو عِيرَا وِلَيْد عِقَيْش مِنْ حِلَّةْ تَقُوعَةْ.
وَ مَجْمُوعْتَهْ عِنْدَهَا 24 000 رَاجِلْ.
١٠ وَ قَايِدْ الْمَجْمُوعَةْ السَّابْعَةْ هَنَا الشَّهَرْ السَّابِعْ،
هُو حَالَصْ مِنْ حِلَّةْ فَلُونْ وَ هُو مِنْ قَبِيلَةْ أَفْرَايِمْ.
وَ مَجْمُوعْتَهْ عِنْدَهَا 24 000 رَاجِلْ.
١١ وَ قَايِدْ الْمَجْمُوعَةْ التَّامْنَةْ هَنَا الشَّهَرْ التَّامِنْ،
هُو سِبَّكَايْ مِنْ حِلَّةْ حُوشَى وَ هُو مِنْ ذُرِّيَّةْ زَارَحْ.
وَ مَجْمُوعْتَهْ عِنْدَهَا 24 000 رَاجِلْ.
١٢ وَ قَايِدْ الْمَجْمُوعَةْ التَّاسْعَةْ هَنَا الشَّهَرْ التَّاسِعْ،
هُو أَبِعَازَرْ مِنْ حِلَّةْ عَنَتُوتْ وَ هُو مِنْ قَبِيلَةْ بَنْيَامِينْ.
وَ مَجْمُوعْتَهْ عِنْدَهَا 24 000 رَاجِلْ.
١٣ وَ قَايِدْ الْمَجْمُوعَةْ الْعَاشْرَةْ هَنَا الشَّهَرْ الْعَاشِرْ،
هُو مَهْرَايْ مِنْ حِلَّةْ نَطُوفَا وَ هُو مِنْ ذُرِّيَّةْ زَارَحْ.
وَ مَجْمُوعْتَهْ عِنْدَهَا 24 000 رَاجِلْ.
١٤ وَ قَايِدْ الْمَجْمُوعَةْ الْإِحْدَى عَشَرْ هَنَا شَهْرِي إِحْدَى عَشَرْ،
هُو بَنَايَا مِنْ حِلَّةْ فِرْعَتُونْ وَ هُو مِنْ قَبِيلَةْ أَفْرَايِمْ.
وَ مَجْمُوعْتَهْ عِنْدَهَا 24 000 رَاجِلْ.
١٥ وَ قَايِدْ الْمَجْمُوعَةْ الْأَتْنَا عَشَرْ هَنَا شَهْرِي أَتْنَا عَشَرْ،
هُو حَلْدَايْ مِنْ حِلَّةْ نَطُوفَا وَ هُو مِنْ خَشُمْ بَيْت عُتْنِيِيلْ.
وَ مَجْمُوعْتَهْ عِنْدَهَا 24 000 رَاجِلْ.
كُبارات قبايِل بني إسرائيل
١٦ دَاهُو كُبَارَاتْ قَبَايِلْ بَنِي إِسْرَائِيلْ.
مِنْ قَبِيلَةْ رَأُوبِينْ،
كَبِيرْهُمْ أَلِعَازَرْ وِلَيْد زِكْرِي
وَ مِنْ قَبِيلَةْ شِمْعُونْ،
كَبِيرْهُمْ شَفَطْيَا وِلَيْد مَعَاكَةْ
١٧ وَ مِنْ قَبِيلَةْ لَاوِي،
كَبِيرْهُمْ حَشَبْيَا وِلَيْد قَمُوِيلْ
وَ مِنْ ذُرِّيَّةْ هَارُونْ،
كَبِيرْهُمْ صَدُوقْ
١٨ وَ مِنْ قَبِيلَةْ يَهُوذَا،
كَبِيرْهُمْ أَلِيهُو مِنْ أَخْوَانْ دَاوُدْ
وَ مِنْ قَبِيلَةْ يَسَّاكَرْ،
كَبِيرْهُمْ عُمْرِي وِلَيْد مِكَايِيلْ
١٩ وَ مِنْ قَبِيلَةْ زَبُلُونْ،
كَبِيرْهُمْ يِشْمَعْيَا وِلَيْد عُبَدْيَا
وَ مِنْ قَبِيلَةْ نَفْتَالِي،
كَبِيرْهُمْ يَرِمُوتْ وِلَيْد عَزْرِيِيلْ
٢٠ وَ مِنْ قَبِيلَةْ أَفْرَايِمْ كَبِيرْهُمْ،
هُوشَعْ وِلَيْد عَزَزْيَا
وَ مِنْ نُصّ قَبِيلَةْ مَنَسَّى الْفِي الْغَرِبْ،
كَبِيرْهُمْ يُوِيلْ وِلَيْد فَدَايَا
٢١ وَ مِنْ نُصّ قَبِيلَةْ مَنَسَّى الْفِي قِلْعَادْ فِي الصَّبَاحْ،
كَبِيرْهُمْ يِدُّو وِلَيْد زَكَرِيَّا
وَ مِنْ قَبِيلَةْ بَنْيَامِينْ،
يَعْسِيِيلْ وِلَيْد أَبْنِيرْ
٢٢ وَ مِنْ قَبِيلَةْ دَانْ،
كَبِيرْهُمْ عَزَرِيلْ وِلَيْد يَرُوحَامْ.
وَ دَوْل كُبَارَاتْ قَبَايِلْ بَنِي إِسْرَائِيلْ.
٢٣ وَ دَاوُدْ مَا حَسَبْ الصُّبْيَانْ الْعُمُرْهُمْ أنْقَصْ مِنْ 20 سَنَةْ أَشَانْ اللّٰهْ قَالْ يِسَوِّي بَنِي إِسْرَائِيلْ يَبْقَوْا كَتِيرِينْ مِثِلْ نُجُومْ السَّمَاءْ.
٢٤ وَ يُوَابْ وِلَيْدهَا لِصَرُويَةْ بَدَا الْحِسَابْ وَ لَاكِنْ مَا كَمَّلَهْ أَشَانْ اللّٰهْ غِضِبْ لِبَنِي إِسْرَائِيلْ.
وَ بِسَبَبْ دَا،
عَدَدْ الشَّعَبْ مَا مَكْتُوبْ فِي كِتَابْ تَارِيخْ الْمَلِكْ دَاوُدْ.
المسائيل في مال الملك
٢٥ وَ عَزْمَاوَتْ وِلَيْد عَدِيِيلْ مَسْؤُولْ فِي مَخَازِنْ الْمَلِكْ.
وَ يُونَتَانْ وِلَيْد عُزِّيَّا مَسْؤُولْ فِي الْمَخَازِنْ الْفِي الْكَدَادَةْ وَ الْمُدُنْ وَ الْحِلَّالْ وَ فِي بُيُوتْ الطُّوَالْ هَنَا الْمُرَاقَبَةْ كُلَ.
٢٦ وَ عَزْرِي وِلَيْد كَلُوبْ مَسْؤُولْ فِي كُلَّ الْخَدَّامِينْ الْيَحَرْتُوا فِي الزِّرَاعَةْ.
٢٧ وَ شِمْعِي الْمِنْ حِلَّةْ الرَّامَةْ مَسْؤُولْ فِي جِنَيْنَاتْ الْعِنَبْ.
وَ زَبْدِي الْمِنْ حِلَّةْ شَفَامْ مَسْؤُولْ فِي الْمَخَازِنْ هَنَا الْخَمَرْ الْيَمْرُقْ مِنْ الْعِنَبْ دَا.
٢٨ وَ بَعَلْ حَنَانْ الْمِنْ حِلَّةْ قَدِيرَةْ مَسْؤُولْ فِي الْجِنَيْنَاتْ الزَّيْتُونْ وَ التِّينْ الْفِي السَّهَلَةْ.
وَ يُوَاشْ مَسْؤُولْ فِي الْمَخَازِنْ هَنَا دِهِنْ.
٢٩ وَ شِرْطَايْ الْمِنْ حِلَّةْ شَارُونْ مَسْؤُولْ فِي الْبَقَرْ الْيَسْرَحَوْا فِي الْمَرْعَى الْفِي كَدَادَةْ شَارُونْ.
وَ شَافَاطْ وِلَيْد عَدْلَايْ مَسْؤُولْ فِي الْبَقَرْ الْيَسْرَحَوْا فِي الْوُدْيَانْ.
٣٠ وَ أُبِيلْ الْمِنْ ذُرِّيَّةْ إِسْمَاعِيلْ مَسْؤُولْ فِي الْجُمَالْ.
وَ يَحَدْيَا الْمِنْ حِلَّةْ مِرُونُوتْ مَسْؤُولْ فِي الْحَمِيرْ.
٣١ وَ يَزِيزْ الْمِنْ بَنِي هَاجَرْ مَسْؤُولْ فِي دَوْر الْغَنَمْ.
وَ كُلَّ النَّاسْ دَوْل مَسَائِيلْ فِي مَالْ الْمَلِكْ دَاوُدْ.
المُسْتشارين هنا الملك
٣٢ وَ يُونَتَانْ عِمَّهْ لِدَاوُدْ،
هُو مُسْتَشَارْ وَ رَاجِلْ فَاهِمْ وَ كَاتِبْ الْمَلِكْ.
وَ يَحِيِيلْ وِلَيْد حَكْمُونِي،
هُو مُكَلَّفْ بِتَرْبِيَةْ أَوْلَادْ الْمَلِكْ.
٣٣ وَ أَخِتُوفَلْ،
هُو كُلَ مُسْتَشَارْ الْمَلِكْ.
وَ حُوشَايْ الْمِنْ حِلَّةْ أَرْكِي،
هُو رَفِيقْ الْمَلِكْ.
٣٤ وَ بَعَدْ أَخِتُوفَلْ،
جَوْا يَهُويَدَعْ وِلَيْد بَنَايَا وَ أَبِيَاتَرْ.
وَ يُوَابْ،
هُو قَايِدْ هَنَا دَيْش الْمَلِكْ.