دَاوُد و صِيبَا
١٦
١ وَ وَكِتْ دَاوُدْ قَاعِدْ يَنْزِلْ مِنْ رَاسْ الْجَبَلْ بِغَادِي،
لَاقَى صِيبَا خَدَّامْ مَفِيبُشَتْ سَايِقْ حَمِيرْ إِتْنَيْن الشَّدَّ فَوْقهُمْ 200 خُبْزَةْ وَ 100 عَبُّودْ هَنَا عِنَبْ يَابِسْ مُعَبَّكْ وَ 100 عَبُّودْ هَنَا تِينْ يَابِسْ مُعَبَّكْ وَ قِرْبَةْ هَنَا خَمَرْ.
٢ وَ الْمَلِكْ قَالْ لِصِيبَا:
«هُو دَا كُلَّ،
تِسَوِّي بَيَّهْ شُنُو؟»
وَ صِيبَا قَالْ:
«الْحَمِيرْ لِعَايِلَةْ الْمَلِكْ يَرْكَبَوْا فَوْقهُمْ وَ الْخُبْزَةْ وَ التِّينْ لِنَاسَكْ يَاكُلُوا وَ الْخَمَرْ كَمَانْ يِشَجِّعْ نَاسَكْ الْعَيَّانِينْ مِنْ تَعَبْ السَّفَرْ فِي الصَّحَرَاء.»
٣ وَ الْمَلِكْ قَالْ لَيَّهْ:
«وَيْن وِلَيْد سِيدَكْ؟»
وَ صِيبَا قَالْ لَيَّهْ:
«هُو قَاعِدْ فِي أُورُشَلِيمْ وَ قَالْ:
‹الْيَوْم بَنِي إِسْرَائِيلْ يِقَبُّلُوا لَيِّ مُلُكْ أَبُويِ شَاوُولْ.›»
٤ وَ الْمَلِكْ قَالْ لِصِيبَا:
«كَنْ كَيْ دَا،
مِنْ هِنِي لِقِدَّامْ كُلَّ الْمَالْ هَنَا مَفِيبُشَتْ دَا هَنَاكْ إِنْتَ.»
وَ صِيبَا سَجَدْ قِدَّامَهْ وَ قَالْ:
«أَنَا عَبْدَكْ،
يَا سِيدِي الْمَلِكْ،
كَنْ إِنْتَ رِضِيتْ لَيِّ.»
شِمْعِي لعن دَاوُد
٥ وَ وَكِتْ دَاوُدْ قَرَّبْ لِحِلَّةْ بَحُرِيمْ،
رَاجِلْ وَاحِدْ مَرَقْ لَيَّهْ.
وَ الرَّاجِلْ دَا،
هُو مِنْ خَشُمْ بَيْت شَاوُولْ وَ أُسْمَهْ شِمْعِي وِلَيْد قِيرَا.
وَ هُو مَرَقْ مِنْ الْحِلَّةْ وَ قَاعِدْ يَلْعَنْ فَوْقَهْ.
٦ وَ بِكَتَرَةْ الشَّعَبْ وَ رُجَالَهْ الْفَحَلِينْ الْمَاشِينْ مَعَايَهْ بِزَيْنَةْ وَ إِسْرَةْ كُلَ،
شِمْعِي قَاعِدْ يِزَرِّقْ فِي الْمَلِكْ دَاوُدْ وَ مَسَائِيلَهْ بِحُجَارْ.
٧ وَ دَاهُو كَلَامْ شِمْعِي الْقَاعِدْ يُقُولَهْ:
«يَلَّا أَمْشِي!
يَلَّا أَمْشِي!
يَا كَتَّالْ الدِّمَمْ الْمَا نَافِعْ!
٨ اللّٰهْ قَبَّلْ لَيْك فِي رَاسَكْ الدَّمّ الْإِنْتَ دَفَّقْتَهْ مِنْ عَايِلَةْ شَاوُولْ الْإِنْتَ بِقِيتْ مَلِكْ فِي بَدَلَهْ.
هَسَّعْ اللّٰهْ سَلَّمْ الْمُلُكْ لِوِلَيْدَكْ أَبْشَلُومْ وَ دِي بَسْ الْمَصِيبَةْ الْوَاجْبَةْ لَيْك أَشَانْ إِنْتَ كَتَّالْ الدِّمَمْ.»
٩ وَ أَبِشَايْ وِلَيْدهَا لِصَرُويَةْ قَالْ لِلْمَلِكْ:
«مَالَا الْكَلِبْ الْمَيِّتْ دَا قَاعِدْ يَلْعَنْ سِيدِي الْمَلِكْ؟
خَلِّينِي نَمْشِي نَقْطَعْ رَاسَهْ!»
١٠ وَ لَاكِنْ الْمَلِكْ قَالْ:
«شُنُو الْبَيْنِي أَنَا وَ إِنْتُو،
يَا أَوْلَادْ صَرُويَةْ؟
كَنْ الرَّاجِلْ دَا قَاعِدْ يَلْعَنْ،
أَكُونْ اللّٰهْ بَسْ قَالَهْ لَيَّهْ:
‹أَمْشِي أَلْعَنْ دَاوُدْ!›
وَ بَيْدَا،
يَاتُو يَقْدَرْ يُقُولْ لَيَّهْ:
‹مَالَا إِنْتَ تُقُولْ الْكَلَامْ دَا؟›»
١١ وَ دَاوُدْ قَالْ لِأَبِشَايْ وَ لِكُلَّ مَسَائِيلَهْ:
«شِيفُوا وِلَيْدِي،
هُو الْمَرَقْ مِنْ صُلْبِي.
هُو كُلَ يِدَوْر يَكْتُلْنِي وَ دَا مَالَا يَبْقَى عَجِيبْ كَنْ النَّادُمْ مِنْ قَبِيلَةْ بَنْيَامِينْ دَا قَاعِدْ يَلْعَنْ فَوْقِي؟
خَلِّي يُقُولْ اللَّعَنَةْ دِي كَنْ اللّٰهْ بَسْ أَمَرَهْ بَيْهَا.
١٢ وَ بَيْدَا،
أَكُونْ اللّٰهْ يِشِيفْ تَعَبِي وَ يِسَوِّي لَيِّ الْخَيْر فِي بَدَلْ اللَّعَنَةْ الْهُو قَاعِدْ يُقُولْهَا فَوْقِي الْيَوْم.»
١٣ وَ دَاوُدْ وَ رُجَالَهْ تَابْعِينْ فِي دَرِبْهُمْ وَ مَاشِينْ وَ شِمْعِي كُلَ مَاشِي جَنْبُهُمْ فِي رَاسْ الْحَجَرْ يَلْعَنْ وَ يِزَرِّقْ فِي دَاوُدْ وَ يِقَوِّمْ عَجَاجْ كُلَ.
١٤ وَ الْمَلِكْ وَ كُلَّ الشَّعَبْ الْمَعَايَهْ وَصَّلَوْا فِي خَشُمْ بَحَرْ الْأُرْدُنْ.
وَ هُمَّنْ وَصَّلَوْا عَيَّانِينْ وَ قَعَدَوْا يِنْجَمَّوْا فِي الْبَكَانْ دَا.
حُوشَاي لِحِق أَبْشَلُوم
١٥ وَ أَبْشَلُومْ وَ كُلَّ الشَّعَبْ وَ عَسْكَرْ بَنِي إِسْرَائِيلْ وَصَّلَوْا فِي أُورُشَلِيمْ.
وَ أَخِتُوفَلْ مُسْتَشَارْ دَاوُدْ،
هُو كُلَ مَعَاهُمْ.
١٦ وَ وَكِتْ حُوشَايْ الْمِنْ حِلَّةْ أَرْكِي رَفِيقَهْ لِدَاوُدْ وَصَّلْ بَكَانْ أَبْشَلُومْ،
هُو قَالْ:
«يِعِيشْ الْمَلِكْ!
يِعِيشْ الْمَلِكْ!»
١٧ وَ أَبْشَلُومْ قَالْ لِحُوشَايْ:
«دَا بَسْ الْأَمَانْ الْعِنْدَكْ لِرَفِيقَكْ دَاوُدْ وَلَّا؟
مَالَا إِنْتَ مَا مَشَيْت مَعَايَهْ؟»
١٨ وَ حُوشَايْ قَالْ لِأَبْشَلُومْ:
«لَا!
أَنَا نَبْقَى مَعَ النَّادُمْ الْعَزَلَوْه اللّٰهْ وَ كُلَّ الشَّعَبْ وَ كُلَّ عَسْكَرْ بَنِي إِسْرَائِيلْ.
هُو دَا بَسْ،
أَنَا نَقْعُدْ مَعَايَهْ.
١٩ وَ فِي شَيّءْ تَانِي،
أَنَا نَخْدِمْ لِيَاتُو؟
مَا لَيْك إِنْتَ وِلَيْدَهْ وَلَّا؟
مِثِلْ أَنَا خَدَمْت لِأَبُوكْ،
بِمِثِلْ دَا نَخْدِمْ لَيْك إِنْتَ كُلَ.»
أَبْشَلُوم و سِرّيّات دَاوُد
٢٠ وَ أَبْشَلُومْ قَالْ لِأَخِتُوفَلْ:
«شَاوُرُوا أَمْبَيْنَاتْكُو فِي الشَّيّءْ الْوَاجِبْ نِسَوُّوهْ.»
٢١ وَ أَخِتُوفَلْ قَالْ لِأَبْشَلُومْ:
«أَمْشِي أَرْقُدْ مَعَ سِرِّيَّاتْ أَبُوكْ الْخَلَّاهِنْ يَحْفَضَنْ الْبَيْت.
وَ بِمِثِلْ دَا،
كُلَّ بَنِي إِسْرَائِيلْ يَسْمَعَوْه وَ إِنْتَ تَبْقَى مَكْرُوهْ لِأَبُوكْ.
وَ النَّاسْ الْمَعَاكْ يَلْقَوْا شَجَاعَةْ.»
٢٢ وَ خَلَاصْ،
سَوَّوْا خَيْمَةْ فِي رَاسْ قَصِرْ الْمَلِكْ وَ أَبْشَلُومْ مَشَى رَقَدْ مَعَ سِرِّيَّاتْ أَبُوهْ قِدَّامْ كُلَّ بَنِي إِسْرَائِيلْ.
٢٣ وَ فِي الْوَكِتْ دَا،
الْوَصَايَا الْيَنْطِيهُمْ أَخِتُوفَلْ عِنْدُهُمْ أَهَمِّيَّةْ زِيَادَةْ مِثِلْ كَلَامْ جَايِ مِنْ الرَّبّ.
وَ كَنْ دَاوُدْ وَلَّا أَبْشَلُومْ كُلَ،
مَا يَقْدَرَوْا يِخَالُفُوا وَصِيَّةْ أَخِتُوفَلْ.