2 صَمُوِيل 15

أَبْشَلُوم أتْمرّد

١ وَ بَعَدْ كُلَّ الشَّيّءْ دَا، أَبْشَلُومْ لِقِي عَرَبَةْ هِنْت حَرِبْ وَ خَيْل وَ 50 رُجَالْ الْمَاشِينْ قِدَّامْ عَرَبَتَهْ. ٢ وَ بِفَجُرْ بَدْرِي، أَبْشَلُومْ يُقُمّ وَ يَقِيفْ فِي خَشُمْ الدَّرِبْ هَنَا مَدَخَلْ الْحِلَّةْ. وَ كُلِّ وَكِتْ كَنْ نَادُمْ عِنْدَهْ مُشْكِلَةْ وَ جَايِ بَكَانْ الْمَلِكْ أَشَانْ يِسَوِّي لَيَّهْ شَرِيعَةْ، أَبْشَلُومْ يِوَقِّفَهْ وَ يُقُولْ لَيَّهْ: «إِنْتَ مِنْ حِلَّةْ الْوَيْنِي؟» وَ أَكُونْ النَّادُمْ دَا يُقُولْ: «أَنَا عَبْدَكْ جَايِ مِنْ قَبِيلَةْ وَاحِدَةْ هَنَا بَنِي إِسْرَائِيلْ.» ٣ خَلَاصْ، أَبْشَلُومْ يُقُولْ لَيَّهْ: «شِيفْ! كَلَامَكْ عَدِيلْ وَ حَقّ. وَ لَاكِنْ مَا فِي نَادُمْ مَسْؤُولْ بَكَانْ الْمَلِكْ الْيَسْمَعْ كَلَامَكْ.» ٤ وَ يُقُولْ بَتَّانْ: «كَنْ أَوَّلْ أَنَا بِقِيتْ حَاكِمْ فِي الْبَلَدْ دِي وَ أَيِّ نَادُمْ يَجِي لَيِّ بِضَلِيمْتَهْ أَوْ مُشْكِلْتَهْ، أَنَا نِسَوِّي لَيَّهْ الشَّرِيعَةْ.»

٥ وَ كَنْ نَادُمْ يِقَرِّبْ لَيَّهْ لِيَسْجُدْ قِدَّامَهْ، أَبْشَلُومْ يِمِدّ إِيدَهْ يَكُرْبَهْ وَ يِحِبَّهْ. ٦ وَ هُو يِسَوِّي مِثِلْ دَا لِكُلَّ بَنِي إِسْرَائِيلْ الْيَجُوا بَكَانْ الْمَلِكْ لِيِسَوِّي لَيْهُمْ الشَّرِيعَةْ. وَ بِمِثِلْ دَا، هُو يِلِمّ كُلَّ بَنِي إِسْرَائِيلْ وَرَايَهْ بِنَجَاضَةْ.

٧ وَ بَعَدْ أَرْبَعَةْ سَنَةْ، أَبْشَلُومْ قَالْ لِلْمَلِكْ: «مِنْ فَضْلَكْ، خَلِّينِي نَمْشِي حِلَّةْ حِبْرُونْ لِنِحَقِّقْ النَّذِرْ السَّوَّيْتَهْ لِلّٰهْ. ٨ أَشَانْ وَكِتْ أَنَا عَبْدَكْ سَاكِنْ فِي قَشُورْ فِي بَلَدْ أَرَامْ، سَوَّيْت نَذِرْ وَ قُلْت: ‹كَنْ قَبَّلْت بِعَافَيْ فِي أُورُشَلِيمْ، نَعَبُدْ اللّٰهْ.›» ٩ وَ الْمَلِكْ قَالْ لَيَّهْ: «أَمْشِي بِالسَّلَامَةْ.» وَ خَلَاصْ، أَبْشَلُومْ قَمَّ مَشَى حِلَّةْ حِبْرُونْ.

١٠ وَ وَكِتْ وَصَّلْ هِنَاكْ، رَسَّلْ نَاسْ بِتَلْبِيدْ فِي كُلَّ قَبَايِلْ بَنِي إِسْرَائِيلْ وَ قَالْ لَيْهُمْ: «وَكِتْ تَسْمَعَوْا حِسّ الْبُوقْ، قُولُوا: ‹أَبْشَلُومْ بِقِي مَلِكْ فِي حِبْرُونْ.›» ١١ وَ 200 نَاسْ الْعَزَمَاهُمْ أَبْشَلُومْ مَشَوْا مَعَايَهْ مِنْ أُورُشَلِيمْ. وَ هُمَّنْ مَشَوْا مَعَايَهْ وَ لَاكِنْ مَا عِنْدُهُمْ خَبَّرْ بِالْمُؤآمَرَةْ دِي. ١٢ وَ وَكِتْ أَبْشَلُومْ قَاعِدْ يِقَدِّمْ الضَّحِيَّةْ، رَسَّلْ لِأَخِتُوفَلْ الْقِيلُونِي مُسْتَشَارْ دَاوُدْ السَّاكِنْ فِي حِلَّةْ قِيلُو. وَ الْمُؤآمَرَةْ قَاعِدَةْ تَبْقَى شَدِيدَةْ بِلْحَيْن. وَ النَّاسْ قَاعِدِينْ يِزِيدُوا بِزِيَادَةْ وَرَاءْ أَبْشَلُومْ.

دَاوُد عرّد من أُورُشَلِيم

١٣ وَ نَادُمْ وَاحِدْ جَاءْ خَبَّرَهْ لِدَاوُدْ وَ قَالْ لَيَّهْ: «دَاهُو بَنِي إِسْرَائِيلْ لَمَّوْا وَرَاءْ أَبْشَلُومْ.» ١٤ خَلَاصْ، دَاوُدْ قَالْ لِكُلَّ مَسَائِيلَهْ الْمَعَايَهْ فِي أُورُشَلِيمْ: «يَلَّا نِعَرُّدُوا! كَنْ مَا كَيْ دَا، مَا نَنْجَوْا مِنْ أَبْشَلُومْ. خَلِّي نَمْشُوا عَجَلَةْ قُبَّالْ مَا يَلْحَقْنَا وَ يِجِيبْ فَوْقنَا الْمَصِيبَةْ وَ يَكْتُلْ كُلَّ نَاسْ الْحِلَّةْ بِالْسَّيْف.» ١٥ وَ مَسَائِيلَهْ قَالَوْا لَيَّهْ: «يَا سِيدْنَا الْمَلِكْ، كُلَّ شَيّءْ الْإِنْتَ تِقَرِّرَهْ، أَنِحْنَ نِسَوُّوهْ.»

١٦ وَ الْمَلِكْ مَرَقْ بِرِجِلَيْنَهْ وَ كُلَّ عَايِلْتَهْ تَابَعَوْه. وَ لَاكِنْ خَلَّى وَرَايَهْ عَشَرَةْ سِرِّيَّاتْ لِيَحْفَضَنْ الْبَيْت. ١٧ وَ وَكِتْ الْمَلِكْ مَارِقْ، كُلَّ الشَّعَبْ تَابَعَوْه وَ هُمَّنْ وَقَفَوْا فِي آخِرْ بَيْت هَنَا الْحِلَّةْ. ١٨ وَ كُلَّ نَاسْ دَاوُدْ وَ كُلَّ الْكِرِتِيِّينْ وَ الْفِلْتِيِّينْ حُرَّاسْ الْمَلِكْ قَمَّوْا يِجَرْسُسُوا قِدَّامَهْ. وَ 600 نَاسْ التَّابَعَوْا دَاوُدْ مِنْ حِلَّةْ قَاتْ، هُمَّنْ كُلَ جَرْسَسَوْا.

١٩ وَ دَاوُدْ قَالْ لِإِتَّايْ الْمِنْ حِلَّةْ قَاتْ: «مَالَا إِنْتَ كُلَ تَمْشِي مَعَانَا؟ قَبِّلْ أَمْشِي أَقْعُدْ مَعَ الْمَلِكْ أَبْشَلُومْ أَشَانْ إِنْتَ أَجْنَبِي وَ لَاجِئ. ٢٠ وَ إِنْتَ جِيتْ هِنِي مَا طَوَّلْت. وَ الْيَوْم، نِشِيلَكْ وَ نِوَدِّيكْ مَعَايِ فِي بَكَانْ الْأَنَا ذَاتِي مَا نَعَرْفَهْ دَا وَلَّا؟ لَا! هَسَّعْ دَا، شِيلْ أَخْوَانَكْ وَ قَبِّلْ فِي الْحِلَّةْ فِي خَيْر وَ أَمَانْ اللّٰهْ.» ٢١ وَ لَاكِنْ إِتَّايْ رَدَّ لِلْمَلِكْ وَ قَالْ: «نَحْلِفْ بِاللّٰهْ الْحَيّ وَ بِحَيَاتَكْ إِنْتَ الْمَلِكْ، فِي أَيِّ بَكَانْ السِّيدِي الْمَلِكْ يَمْشِي لِيِعِيشْ أَوْ يُمُوتْ، أَنَا عَبْدَكْ كُلَ نَمْشِي.» ٢٢ وَ دَاوُدْ قَالْ لِإِتَّايْ: «سَمَحْ! قَدِّمْ.» وَ إِتَّايْ قَدَّمْ مَعَ نَاسَهْ وَ كُلَّ عَايِلَاتْهُمْ.

٢٣ وَ كُلَّ نَاسْ الْبَلَدْ قَاعِدِينْ يَبْكُوا شَدِيدْ وَكِتْ شَافَوْا دَاوُدْ وَ نَاسَهْ مَاشِينْ. وَ الْمَلِكْ شَقَّ وَادِي قِدْرُونْ مَعَ كُلَّ نَاسَهْ وَ شَالَوْا الدَّرِبْ الْمَاشِي لِلصَّحَرَاء.

٢٤ وَ مَشَى مَعَاهُمْ صَدُوقْ رَاجِلْ الدِّينْ وَ مَعَايَهْ كُلَّ اللَّاوِيِّينْ الشَّايْلِينْ صَنْدُوقْ مُعَاهَدَةْ الرَّبّ. وَ هُمَّنْ خَطَّوْا الصَّنْدُوقْ دَا تِحِتْ وَ أَبِيَاتَرْ رَاجِلْ الدِّينْ قَاعِدْ جَنْبَهْ لَحَدِّي كُلَّ النَّاسْ الْمَارْقِينْ مِنْ الْحِلَّةْ كَمَّلَوْا.

٢٥ وَ الْمَلِكْ قَالْ لِصَدُوقْ رَاجِلْ الدِّينْ: «قَبِّلْ صَنْدُوقْ الرَّبّ فِي الْحِلَّةْ. أَشَانْ كَنْ اللّٰهْ يَرْضَى بَيِّ، يِسَوِّي لَيِّ الْخَيْر وَ يِقَبِّلْنِي وَ يِشَوِّفْنِي بَتَّانْ صَنْدُوقَهْ وَ مَسْكَنَهْ. ٢٦ وَ لَاكِنْ كَنْ هُو قَالْ مَا يِدَوْرنِي، خَلَاصْ خَلِّي يِسَوِّي فَوْقِي الشَّيّءْ الْهُو يِدَوْرَهْ.»

٢٧ وَ الْمَلِكْ قَالْ بَتَّانْ لِصَدُوقْ رَاجِلْ الدِّينْ: «هَسَّعْ دَا، إِنْتَ شِفْت الْحَالَةْ. قَبِّلْ أَمْشِي بِالسَّلَامَةْ فِي الْحِلَّةْ مَعَ أَخِمَاعَصْ وِلَيْدَكْ وَ يُونَتَانْ وِلَيْد أَبِيَاتَرْ. وَ بَيْدَا، عِيَالْكُو الْإِتْنَيْن يَمْشُوا مَعَاكُو. ٢٨ وَ كَنْ لَيِّ أَنَا، نِأَخِّرْ فِي وَادِي الْأُرْدُنْ لَحَدِّي نَلْقَى خَبَرْ مِنْكُو.» ٢٩ وَ خَلَاصْ، صَدُوقْ وَ أَبِيَاتَرْ قَبَّلَوْا صَنْدُوقْ الرَّبّ فِي أُورُشَلِيمْ وَ قَعَدَوْا هِنَاكْ.

دَاوُد رسّل جاسوس لأَبْشَلُوم

٣٠ وَ دَاوُدْ قَاعِدْ يَطْلَعْ جَبَلْ الزَّيْتُونْ بِبَكِي وَ سَدَّ رَاسَهْ وَ مَاشِي بَلَا نَعَالْ. وَ كُلَّ النَّاسْ الطَّالِعِينْ مَعَايَهْ، هُمَّنْ كُلَ سَدَّوْا رُوسَيْهُمْ وَ قَاعِدِينْ يَبْكُوا. ٣١ وَ جَوْا خَبَّرَوْا دَاوُدْ وَ قَالَوْا: «دَاهُو أَخِتُوفَلْ كُلَ مِنْ الْخَايْنِينْ الْمَعَ أَبْشَلُومْ.» خَلَاصْ دَاوُدْ قَالْ: «يَا اللّٰهْ، خَلِّي وَصِيَّةْ أَخِتُوفَلْ تَبْقَى مَا نَافْعَةْ.»

٣٢ وَ وَكِتْ دَاوُدْ وَصَّلْ فِي رَاسْ الْجَبَلْ فِي بَكَانْ عِبَادَةْ الرَّبّ، حُوشَايْ الْمِنْ حِلَّةْ أَرْكِي جَاءْ لَاقَاهْ لِدَاوُدْ وَ خَلَقَهْ مُشَرَّطْ مِنْ الْحِزِنْ وَ عِنْدَهْ تُرَابْ فِي رَاسَهْ. ٣٣ وَ دَاوُدْ قَالْ لَيَّهْ: «إِنْتَ مَا تَمْشِي مَعَايِ أَشَانْ دَا تَقِيلْ لَيِّ. ٣٤ وَ لَاكِنْ كَنْ قَبَّلْت الْحِلَّةْ، قُولْ لِأَبْشَلُومْ: ‹يَا الْمَلِكْ، نِدَوْر نَبْقَى خَدَّامَكْ. أَوَّلْ، أَنَا خَدَّامْ أَبُوكْ وَ لَاكِنْ هَسَّعْ، نَبْقَى خَدَّامَكْ.› وَ بِمِثِلْ دَا، تَفْشُلْ وَصِيَّةْ أَخِتُوفَلْ. ٣٥ وَ هِنَاكْ تَلْقَى مُسَاعَدَةْ مِنْ رُجَالْ الدِّينْ صَدُوقْ وَ أَبِيَاتَرْ. وَ كُلَّ شَيّءْ التَّسْمَعَهْ مِنْ قَصِرْ الْمَلِكْ، قُولَهْ لِصَدُوقْ وَ أَبِيَاتَرْ. ٣٦ وَ عِيَالْهُمْ أَخِمَاعَصْ وِلَيْد صَدُوقْ وَ يُونَتَانْ وِلَيْد أَبِيَاتَرْ، هُمَّنْ كُلَ قَاعِدِينْ مَعَاهُمْ. وَ بِوَاسِطَتْهُمْ هُمَّنْ، تِخَبُّرُونِي بِكُلَّ شَيّءْ التَّسْمَعَوْا.» ٣٧ وَ خَلَاصْ، حُوشَايْ رَفِيقْ دَاوُدْ قَبَّلْ الْحِلَّةْ فِي وَكِتْ الْأَبْشَلُومْ دَاخِلْ أُورُشَلِيمْ.