الكتاب الأول هنا
صَمُوِيل
من كتب تاريخ بني إسرائيل
مقدمة
كتاب صَمُوِيل الأوّل و التاني، همن دَوْل أوّل كتاب واحِد بس و كتبوهم في نفْس الوكت. و بعد دا، فرقوهم كُتُب إتْنَيْن و الكتباهم ما معْروف. و صَمُوِيل دا هو نبي و آخِر الحُكّام الرسّلاهم اللّه لبني إسرائيل قُبّال وكْت المُلوك.
و وكت صَمُوِيل قريب يموت، بني إسرائيل طلبوا ليهم ملك و بإذِن من اللّه، صَمُوِيل درّج ليهم شَاوُول ملك. و في الوكت دا، ناس واحِدين البِنادوهم فِلِسْطيّين قمّوا قاعدين يحارُبوا ضِدّ بني إسرائيل. و في الحرِب دا بس، الراعي دَاوُد كتل جَالُوت فَارِس الفِلِسْطيّين.
و الملك شَاوُول سوّى فِعِل شَيْن قِدّام اللّه و اللّه أباه. و بعد دا، اللّه شال دَاوُد و درّجه ملك في بدل شَاوُول. و لاكن شَاوُول ما قصّد و قمّ يطارِد دَاوُد ليكْتُله. و لاكن في الأخير، شَاوُول و عياله ماتوا في الحرِب.
و في الكتاب دا، اللّه يذكِّرنا كدر نادم ما يقْدر يحْكِم في الشعب دا، إلّا كن النادم دا قصّد يبْقى عبِد للّه الواحِد و يسوّي الشيّء الاللّه يدَوْره.