الكتاب التاني هنا
صَمُوِيل
من كتب تاريخ بني إسرائيل
مقدمة
الكتاب التاني هنا صَمُوِيل و الكتاب القبْله، همن دَوْل أوّل كتاب واحِد بس و كتبوهم في نفْس الوكت. و بعد دا، فرقوهم كُتُب إتْنَيْن و الكتباهم ما معْروف.
و الكتاب دا يكلِّم بدَاوُد الهو أكْبر ملك في إسرائيل. و في البِداية، عشرة قبايِل من بني إسرائيل أبوا ما يقْعُدوا تِحِت مُلْكه و لاكن في الأخير، هو ثبّت مُلْكه فَوْق كل قبايِل بني إسرائيل. و هو أنّصر في كل البُلْدان المُجاوِرينه و همن مُوَاب و أَدَوْم و بني عَمُّون و أَرَام. و ممْلكته بِقت كبيرة مرّة واحِد. و هو بس خطّ عاصِمة إسرائيل و سمّاها أُورُشَلِيم و بعد دا، الناس سمّوها مدينة دَاوُد.
و في الأخير، الملك دَاوُد وقع في الخطا هنا الزِنى و وِلَيْده كل قمّ ضِدّه. و لاكن بَيْدا كل، اللّه ثبّت مُلْكه أشان هو الملك المُنجّي الاللّه رسّله لبني إسرائيل. و اللّه واعد دَاوُد بواسِطة النبي نَاتَان و قال كدر دايْماً واحِد من ذُرّيّته يقْعُد في كُرْسي المُلُك من بعده.