مَوْت شَاوُول و أوْلاده
٣١
١ وَ يَوْم وَاحِدْ،
الْفِلِسْطِيِّينْ هَجَمَوْا بَنِي إِسْرَائِيلْ وَ هُمَّنْ جَرَوْا قِدَّامْ الْفِلِسْطِيِّينْ وَ كَتِيرِينْ مِنْهُمْ مَاتَوْا فِي جَبَلْ قِلْبُوعَةْ.
٢ وَ الْفِلِسْطِيِّينْ حَاصَرَوْهُمْ لِشَاوُولْ وَ أَوْلَادَهْ.
وَ هُمَّنْ كَتَلَوْا يُونَتَانْ وَ أَبِنَدَابْ وَ مَلْكِشُوعْ،
أَوْلَادْ شَاوُولْ.
٣ وَ فِي الْبَكَانْ دَا،
الْحَرِبْ بِقِي شَدِيدْ لِشَاوُولْ.
وَ سِيَادْ النُّشَّابْ شَافَوْه وَ وَكِتْ هُو شَافَاهُمْ،
قَمَّ يَرْجِفْ شَدِيدْ قِدَّامْهُمْ.
٤ وَ شَاوُولْ قَالْ لِلصَّبِي الشَّايِلْ لَيَّهْ سِلَاحَهْ:
«سِلّ سَيْفَكْ وَ أَكْتُلْنِي.
أَشَانْ مَا نِدَوْر الْمَا مُطَهَّرِينْ دَوْل يِعَذُّبُونِي وَ يَكْتُلُونِي.»
لَاكِنْ الصَّبِي أَبَى أَشَانْ هُو خَافْ مَرَّةْ وَاحِدْ.
وَ خَلَاصْ،
شَاوُولْ شَالْ سَيْفَهْ وَ وَقَعْ فَوْقَهْ وَ مَاتْ.
٥ وَ وَكِتْ الصَّبِي شَافْ شَاوُولْ مَاتْ،
هُو كُلَ وَقَعْ فِي سَيْفَهْ وَ مَاتْ مَعَايَهْ.
٦ وَ بِمِثِلْ دَا،
شَاوُولْ وَ أَوْلَادَهْ التَّلَاتَةْ وَ الصَّبِي الشَّايِلْ لَيَّهْ سِلَاحَهْ وَ كُلَّ عَسْكَرَهْ الْمَعَايَهْ دَا مَاتَوْا سَوَا فِي الْيَوْم دَا.
٧ وَ وَكِتْ بَنِي إِسْرَائِيلْ السَّاكْنِينْ غَادِي لِوَادِي يَزْرَعِيلْ وَ السَّاكْنِينْ غَادِي لِلْأُرْدُنْ سِمْعَوْا بِهَزِيمَةْ بَنِي إِسْرَائِيلْ وَ مَوْت شَاوُولْ وَ أَوْلَادَهْ،
هُمَّنْ كُلَ عَرَّدَوْا وَ خَلَّوْا حِلَّالْهُمْ.
وَ الْفِلِسْطِيِّينْ جَوْا وَ سَكَنَوْا فِي الْحِلَّالْ دَوْل.
٨ وَ أَمْبَاكِرْ وَكِتْ الْفِلِسْطِيِّينْ جَوْا فِي بَكَانْ الدُّوَاسْ لِيِشِيلُوا خُمَامْ الْمَيْتِينْ،
لِقَوْا شَاوُولْ وَ أَوْلَادَهْ التَّلَاتَةْ مَيْتِينْ فِي رَاسْ جَبَلْ قِلْبُوعَةْ.
٩ وَ قَطَعَوْا رَاسْ شَاوُولْ وَ شَالَوْا سِلَاحَهْ.
وَ رَسَّلَوْا الْخَبَرْ دَا فِي كُلَّ بَلَدْ الْفِلِسْطِيِّينْ وَ خَبَّرَوْا بَيَّهْ شَعَبْهُمْ وَ فِي بُيُوتْ أَصْنَامْهُمْ.
١٠ وَ هُمَّنْ خَطَّوْا سِلَاحْ شَاوُولْ فِي بَيْت الْعِبَادَةْ هَنَا إِلٰـهِتْهُمْ عَشْتَرُوتْ.
وَ عَلَّقَوْا جَنَازْتَهْ فِي دُرْدُرْ حِلَّةْ بَيْت شَانْ.
١١ وَ سُكَّانْ حِلَّةْ يَابِيشْ فِي تُرَابْ قِلْعَادْ سِمْعَوْا بِالشَّيّءْ الْفِلِسْطِيِّينْ سَوَّوْه فِي شَاوُولْ.
١٢ وَ خَلَاصْ،
كُلَّ الرُّجَالْ الْفَحَلِينْ قَمَّوْا وَ رَاغَوْا طُولْ اللَّيْل.
وَ جَوْا سَلَّوْا جَنَازَاتْ شَاوُولْ وَ أَوْلَادَهْ مِنْ دُرْدُرْ بَيْت شَانْ وَ جَابَوْهُمْ فِي يَابِيشْ وَ تَشَّوْهُمْ.
١٣ وَ بَعَدْ دَا،
خَمَّوْا عُضَامْهُمْ وَ دَفَنَوْهُمْ فِي قَعَرْ الْأَرْدَيْبَايْ الْقَاعِدَةْ فِي يَابِيشْ.
وَ صَامَوْا سَبْعَةْ يَوْم.