1 صَمُوِيل 1

الكتاب الأول هنا

صَمُوِيل

من كتب تاريخ بني إسرائيل

حِنَّة و ضرِّتها

١ فِيَّهْ رَاجِلْ وَاحِدْ مِنْ حِلَّةْ الرَّامَةْ فِي جِبَالْ أَفْرَايِمْ مِنْ خَشُمْ بَيْت صُوفْ. أُسْمَهْ أَلِقَانَى وِلَيْد يَرُوحَامْ وِلَيْد أَلِيهُو وِلَيْد تُوحُو وِلَيْد صُوفْ. وَ هُو مِنْ قَبِيلَةْ أَفْرَايِمْ. ٢ هُو عِنْدَهْ عَوِينْ إِتْنَيْن، الْكَبِيرَةْ أُسُمْهَا حِنَّةْ وَ الصَّغَيْرَةْ أُسُمْهَا فِنِنَّةْ. وَ فِنِنَّةْ وِلْدَتْ لَيَّهْ عِيَالْ وَ لَاكِنْ حِنَّةْ كَمَانْ عَاقْرَةْ.

٣ وَ كُلِّ سَنَةْ أَلِقَانَى يَمْرُقْ مِنْ حِلِّتَهْ يَطْلَعْ وَ يَمْشِي لِحِلَّةْ شِيلَوْه أَشَانْ يَسْجُدْ وَ يِقَدِّمْ ضَحِيَّةْ لِلّٰهْ الْقَادِرْ. وَ دَا الْبَكَانْ الْقَاعِدِينْ فَوْقَهْ رُجَالْ الدِّينْ الْإِتْنَيْن حُفْنِي وَ فِينْحَاسْ أَوْلَادْ عَالِي. وَ هُمَّنْ مَسْؤُولِينْ مِنْ الضَّحِيَّةْ الْيِقَدُّمُوهَا لِلّٰهْ.

٤ وَ كُلِّ وَكِتْ كَنْ جَاءْ وَكِتْ الضَّحِيَّةْ، أَلِقَانَى يَدْبَحْ وَ يَنْطِي فِنِنَّةْ قِسِمْ اللَّحَمْ عَلَيْ عَدَدْهُمْ هِي وَ أَوْلَادْهَا وَ بَنَاتْهَا. ٥ وَ لَاكِنْ لِحِنَّةْ، يَنْطِيهَا قِسِمْ خَاصّ هَنَا اللَّحَمْ أَشَانْ هُو بِرِيدْهَا، هِي الْاللّٰهْ جَعَلَاهَا عَاقْرَةْ. ٦ وَ ضَرِّتْهَا دَايْماً تِزَعِّلْهَا لِتَحْرِقْ قَلِبْهَا بِسَبَبْ اللّٰهْ جَعَلَاهَا عَاقْرَةْ. ٧ وَ الشَّيّءْ دَا قَاعِدْ يَبْقَى كُلِّ سَنَةْ. وَ وَكِتْ حِنَّةْ تَطْلَعْ لِبَيْت اللّٰهْ، فِنِنَّةْ تِوَاجِعْهَا لَحَدِّي تَبْكِي وَ تَابَى الْأَكِلْ. ٨ وَ رَاجِلْهَا أَلِقَانَى يُقُولْ لَيْهَا: «يَا حِنَّةْ، مَالْكِ تَبْكِي وَ تَابَيْ الْأَكِلْ؟ مَالْكِ حَزْنَانَةْ؟ أَنَا رَاجِلْكِ مَا أَخَيْر لَيْكِ مِنْ عَشَرَةْ أَوْلَادْ وَلَّا؟»

حِنَّة سألت اللّه

٩ وَ يَوْم وَاحِدْ بَعَدْ مَا أَكَلَوْا وَ شِرْبَوْا فِي شِيلَوْه، حِنَّةْ قَمَّتْ. وَ فِي الْوَكِتْ دَا، رَاجِلْ الدِّينْ الْأُسْمَهْ عَالِي قَاعِدْ فِي كُرْسِيهْ جَنْب بَابْ بَيْت اللّٰهْ. ١٠ وَ هِي قَاعِدَةْ تَسْأَلْ اللّٰهْ وَ تَبْكِي بِحُرْقَةْ. ١١ وَ سَوَّتْ نَذِرْ وَ قَالَتْ: «يَا اللّٰهْ الْقَادِرْ، شِيفْنِي أَنَا خَادْمَكْ! فَكِّرْ فَوْقِي وَ مَا تَنْسَانِي! أَنْطِينِي وِلَيْد. كَنْ أَنْطَيْتنِي وِلَيْد، أَنَا نَنْطِيهْ لَيْك مُدَّةْ حَيَاتَهْ. وَ مَا نِزَيِّنْ رَاسَهْ أَبَداً وَ دَا يِوَصِّفْ كَدَرْ أَنَا أَنْطَيْتَهْ لَيْك.»

١٢ وَ وَكِتْ حِنَّةْ قَاعِدَةْ تَسْأَلْ اللّٰهْ مُدَّةْ طَوِيلَةْ، عَالِي قَاعِدْ يِشِيفْ خَشُمْهَا. ١٣ هِي قَاعِدَةْ تَسْأَلْ اللّٰهْ فِي قَلِبْهَا وَ شَلَالِيفْهَا قَاعِدِينْ بِلْحَرَّكَوْا لَاكِنْ حِسَّهَا مَا بِنْسَمِعْ. خَلَاصْ فِي الْبَكَانْ دَا، عَالِي يَحْسِبْ هِي سَكْرَانَةْ. ١٤ وَ قَالْ لَيْهَا: «مَالَا مَشَيْتِ سِكِرْتِ؟ أَمْشِي فَرِّقِي الْخَمَرْ مِنْكِ!» ١٥ وَ حِنَّةْ رَدَّتْ لَيَّهْ وَ قَالَتْ: «لَا، يَا سَيِّدِي! أَنَا مَرَةْ حَزْنَانَةْ. وَ لَا شِرِبْت خَمَرْ وَ لَا شَيّءْ الْبِسَكِّرْ. لَاكِنْ أَنَا قُلْت كُلَّ هَمّ قَلْبِي قِدَّامْ اللّٰهْ. ١٦ مَا تَحْسِبْ خَادْمَكْ مَرَةْ سِتّ شَرّ. بِسَبَبْ حِزْنِي وَ زَعَلِي بَسْ، أَنَا طَوَّلْت فِي سُؤَالِي لِلّٰهْ.» ١٧ وَ عَالِي رَدَّ لَيْهَا وَ قَالْ: «أَمْشِي بِالسَّلَامَةْ. وَ خَلِّي اللّٰهْ إِلٰـهْ بَنِي إِسْرَائِيلْ يَنْطِيكِ الشَّيّءْ السَّأَلْتِيهْ مِنَّهْ.» ١٨ وَ هِي قَالَتْ لَيَّهْ: «خَلَاصْ، يَا سَيِّدِي، كَنْ إِنْتَ رِضِيتْ لَيِّ.»

وَ خَلَاصْ، مَشَتْ أَكَلَتْ وَ حِزِنْهَا فَاتْ. ١٩ وَ أَمْبَاكِرْ بِفَجُرْ بَدْرِي، قَمَّوْا سَجَدَوْا لِلّٰهْ وَ قَبَّلَوْا لِبَيْتهُمْ فِي حِلَّةْ الرَّامَةْ. وَ بَعَدْ دَا، أَلِقَانَى لَمَّ مَعَ مَرْتَهْ حِنَّةْ وَ اللّٰهْ فَكَّرْ لَيْهَا وَ قِبِلْ سُؤَالْهَا ٢٠ وَ هِي بِقَتْ غَلْبَانَةْ. وَ فِي نَفْس السَّنَةْ دِي، هِي وِلْدَتْ وِلَيْد وَ سَمَّتَهْ صَمُوِيلْ، مَعَنَاتَهْ أَنَا سَأَلْتَهْ مِنْ اللّٰهْ.

حِنَّة حقّقت كلامها

٢١ وَ بَعَدْ دَا، أَلِقَانَى وَ كُلَّ عَايِلْتَهْ دَوَّرَوْا يَمْشُوا فِي شِيلَوْه أَشَانْ يِقَدِّمْ الضَّحِيَّةْ هَنَا السَّنَةْ دِي لِلّٰهْ وَ يِقَدِّمْ الضَّحِيَّةْ الْهُو وَاعَدْ بَيْهَا فِي نَذْرَهْ. ٢٢ وَ لَاكِنْ حِنَّةْ مَا مَشَتْ مَعَاهُمْ وَ قَالَتْ لِرَاجِلْهَا: «أَنَا كَنْ فَرَدْت الْوِلَيْد حَتَّى نَمْشِي نِوَدِّيهْ يَقْعُدْ هِنَاكْ فِي بَيْت اللّٰهْ دَايْماً.» ٢٣ وَ رَاجِلْهَا قَالْ: «سَوِّي الشَّيّءْ التِّدَوْرَهْ. وَ أَقْعُدِي لَحَدِّي تَفُرْدِيهْ. وَ اللّٰهْ بَسْ يِحَقِّقْ كَلَامَهْ.»

وَ خَلَاصْ، حِنَّةْ قَعَدَتْ فِي الْبَيْت وَ كَرَبَتْ وِلَيْدهَا لَحَدِّي فَرَدَتَهْ. ٢٤ وَ وَكِتْ فَرَدَتَهْ، شَالَتْ مَعَاهَا تَوْر وَلْد تَلَاتَةْ سَنَةْ وَ 10 كَوْرَوْ هَنَا دَقِيقْ وَ قِرْبَةْ هَنَا خَمَرْ. وَ مَشَتْ فِي حِلَّةْ شِيلَوْه وَ شَالَتْ الْوِلَيْد وَ دَخَلَتْ بَيَّهْ فِي بَيْت اللّٰهْ. وَ فِي الْوَكِتْ دَا، الْوِلَيْد لِسَّاعَهْ صَغَيَّرْ. ٢٥ وَ دَبَحَوْا التَّوْر وَ وَدَّوْا الْوِلَيْد لِعَالِي رَاجِلْ الدِّينْ. ٢٦ وَ حِنَّةْ قَالَتْ لَيَّهْ: «يَا سَيِّدِي، عِرِفْتِنِي وَلَّا؟ أَنَا الْمَرَةْ الْجَاتْ لَيْك يَوْم دَاكْ هِنِي سَأَلَتْ اللّٰهْ. ٢٧ أَنَا سَأَلْت اللّٰهْ أَشَانْ يَنْطِينِي الْوِلَيْد دَا. وَ دَاهُو أَنْطَانِي الشَّيّءْ الْأَنَا طَلَبْتَهْ مِنَّهْ. ٢٨ وَ هَسَّعْ، أَنَا نَنْطِيهْ لِلّٰهْ مُدَّةْ حَيَاتَهْ.»

خَلَاصْ فِي الْبَكَانْ دَا، كُلُّهُمْ سَجَدَوْا لِلّٰهْ.