تكوين 40

١ وَ بَعَدْ دَا، يَوْم وَاحِدْ مَسْؤُولِينْ إِتْنَيْن هَنَا فِرْعَوْن مَلِكْ مَصِرْ سَوَّوْا ذَنِبْ. الْوَاحِدْ مَسْؤُولْ النَّاسْ الْيَنْطُوا شَرَابْ لِلْمَلِكْ. وَ الْآخَرْ مَسْؤُولْ النَّاسْ الْيِسَوُّوا خُبْزَةْ لِلْمَلِكْ. ٢-٣ وَ الْمَلِكْ زِعِلْ مِنْهُمْ وَ سَجَنَاهُمْ. وَ السِّجِنْ دَا قَاعِدْ فِي بَيْت كَبِيرْ الْحُرَّاسْ هَنَا الْمَلِكْ. وَ فِي السِّجِنْ دَا يُوسُفْ كُلَ مَكْرُوبْ فَوْقَهْ. ٤ وَ كَبِيرْ الْحُرَّاسْ هَنَا الْمَلِكْ وَكَّلْ يُوسُفْ أَشَانْ يَخْدِمْ لَيْهُمْ. وَ سَوَّوْا أَيَّامْ فِي السِّجِنْ.

يُوسُف يفسِّر حِلِم المسْؤولين

٥ يَوْم وَاحِدْ، الْمَسْؤُولِينْ الْإِتْنَيْن هَنَا الْمَلِكْ حِلْمَوْا فِي السِّجِنْ بِاللَّيْل. وَ حِلِمْ هَنَا أَيِّ وَاحِدْ عِنْدَهْ مَعَنَى. ٦ بِفَجُرْ وَكِتْ يُوسُفْ جَاءْ لَيْهُمْ، شَافَاهُمْ قَاعِدِينْ مُبَرْجَلِينْ. ٧ وَ هُو سَأَلَاهُمْ: «مَالْكُو الْيَوْم إِنْتُو مُبَرْجَلِينْ؟» ٨ وَ هُمَّنْ رَدَّوْا لَيَّهْ وَ قَالَوْا: «أَنِحْنَ حِلِمْنَا وَ مَا فِي نَادُمْ هِنِي الْيِفَسِّرْ لَيْنَا حِلِمْنَا دَا.» وَ يُوسُفْ رَدَّ لَيْهُمْ وَ قَالْ: «الرَّبّ بَسْ يَقْدَرْ يِفَسِّرَهْ لَيْكُو. حَجُّونِي بِحِلِمْكُو.»

٩ وَ مَسْؤُولْ النَّاسْ الْيَنْطُوا شَرَابْ لِلْمَلِكْ حَجَّى لِيُوسُفْ بِحِلْمَهْ وَ قَالْ: «فِي حِلْمِي أَنَا شِفْت شَدَرَةْ عِنَبْ وَاحِدَةْ. ١٠ وَ الشَّدَرَةْ دِي عِنْدَهَا تَلَاتَةْ فُرُوعْ وَ تِدَوْر تِنَوِّرْ وَ بَعَدَيْن نَوَّرَتْ وَ سَوَّتْ عَنْقُودْ هَنَا عِنَبْ نَجِيضْ. ١١ وَ عِنْدِي فِي إِيدَيْنِي كَاسْ هَنَا الْمَلِكْ. أَنَا قَطَعْت مِنْ الْعِنَبْ وَ عَصَّرْت أَلْمِيهْ فِي الْكَاسْ دَا وَ مَدَّيْتَهْ لِلْمَلِكْ.»

١٢ وَ يُوسُفْ قَالْ لَيَّهْ: «دَاهُو تَفْسِيرْ حِلْمَكْ. التَّلَاتَةْ فُرُوعْ هُمَّنْ يِوَصُّفُوا تَلَاتَةْ يَوْم. ١٣ بَعَدْ تَلَاتَةْ يَوْم، الْمَلِكْ يَمُرْقَكْ مِنْ السِّجِنْ وَ يِقَبِّلَكْ فِي خِدِمْتَكْ الْأَوَّلْ وَ بَتَّانْ تِمِدّ لَيَّهْ الْكَاسْ. ١٤ وَ وَكِتْ قَبَّلْت فِي خِدِمْتَكْ، مَا تَنْسَانِي سَوِّي لَيِّ الْخَيْر وَ حَجِّي بَيِّ لِلْمَلِكْ أَشَانْ يَمْرُقْنِي مِنْ السِّجِنْ. ١٥ أَشَانْ أَنَا جَابَوْنِي بِقُوءْ مِنْ بَلَدْ الْعِبْرَانِيِّينْ. وَ هِنِي أَنَا مَا سَوَّيْت شَيّءْ الْوَاجِبْ يَسْجُنُونِي بِسَبَبَهْ.»

١٦ وَ وَكِتْ مَسْؤُولْ النَّاسْ الْيِسَوُّوا خُبْزَةْ لِلْمَلِكْ سِمِعْ يُوسُفْ أَنْطَى تَفْسِيرْ عَدِيلْ، قَالْ لَيَّهْ: «أَنَا كُلَ حِلِمْت. فِي حِلْمِي أَنَا شَايِلْ فِي رَاسِي تَلَاتَةْ قُفَفْ هَنَا خُبْزَةْ. ١٧ وَ الْقُفَّةْ الْفَوْقَانِيَّةْ مَلَانَةْ بِأَيِّ نَفَرْ هَنَا خُبْزَةْ الْمَلِكْ يِرِيدْهَا وَ الطُّيُورْ جَوْا أَكَلَوْا الْخُبْزَةْ الْفِي رَاسِي.»

١٨ وَ يُوسُفْ رَدَّ لَيَّهْ وَ قَالْ: «دَاهُو تَفْسِيرْ حِلْمَكْ. التَّلَاتَةْ قُفَفْ يِوَصُّفُوا تَلَاتَةْ يَوْم. ١٩ بَعَدْ تَلَاتَةْ يَوْم، الْمَلِكْ يَمُرْقَكْ مِنْ السِّجِنْ وَ يَشُنْقُوكْ فِي شَدَرَةْ. وَ الطُّيُورْ يَجُوا يَاكُلُوا جِلْدَكْ.»

٢٠ وَ خَلَاصْ بَعَدْ تَلَاتَةْ يَوْم، الْمَلِكْ عَيَّدْ حَوْل هَنَا وَالُودْتَهْ وَ سَوَّى حَفْلَةْ لِكُلَّ مَسَائِيلَهْ وَ مَرَقْ الْمَسْؤُولِينْ الْإِتْنَيْن مِنْ السِّجِنْ، قِدَّامْ مَسَائِيلَهْ. ٢١ وَ قَبَّلْ مَسْؤُولْ النَّاسْ الْيَنْطُوا شَرَابْ لِلْمَلِكْ فِي خِدِمْتَهْ لِيِمِدّ لَيَّهْ بَتَّانْ الْكَاسْ. ٢٢ وَ لِمَسْؤُولْ النَّاسْ الْيِسَوُّوا خُبْزَةْ لِلْمَلِكْ، شَنَقَوْه. وَ خَلَاصْ بِمِثِلْ دَا، تَفْسِيرْ هَنَا يُوسُفْ جَاءْ فِي دَرْبَهْ. ٢٣ وَ لَاكِنْ مَسْؤُولْ النَّاسْ الْيَنْطُوا شَرَابْ لِلْمَلِكْ مَا فَكَّرَهْ لِيُوسُفْ، هُو نِسِيهْ.