تكوين 41

حِلِم هنا فِرْعَوْن ملك مَصِر

١ بَعَدْ سَنْتَيْن، الْمَلِكْ فِرْعَوْن حِلِمْ. فِي حِلْمَهْ هُو قَاعِدْ فِي خَشُمْ بَحَرْ النِّيلْ. ٢ وَ شَافْ سَبْعَةْ بَقَرْ سُمَانْ وَ سَمْحِينْ مَرَقَوْا مِنْ الْبَحَرْ وَ قَاعِدِينْ يَاكُلُوا قَشّ فِي خَشُمْ الْبَحَرْ. ٣ وَ بَعَدْ شِيَّةْ، شَافْ سَبْعَةْ بَقَرْ آخَرِينْ بَاطْلِينْ وَ شَيْنِينْ مَرَقَوْا مِنْ الْبَحَرْ وَ مَشَوْا جَنْبُهُمْ. ٤ وَ طَوَّالِي، قَمَّوْا أَكَلَوْا الْبَقَرْ السُّمَانْ وَ سَمْحِينْ دَوْل. وَ خَلَاصْ، الْمَلِكْ قَمَّ مِنْ النَّوْم.

٥ وَ قَبَّلْ نَامْ وَ حِلِمْ بَتَّانْ. هُو شَافْ سَبْعَةْ قَنَادِيلْ هَنَا قَمَحْ مَرَقَوْا مِنْ عَقَيْقَايْ وَاحِدَةْ. وَ هُمَّنْ تُخَانْ وَ مَلَانِينْ عِيَالْ. ٦ وَ هُو شَافْ بَتَّانْ سَبْعَةْ قَنَادِيلْ رُقَاقْ وَ حَرْقَانِينْ مِنْ الْحَمُو مَرَقَوْا جَنْبُهُمْ. ٧ وَ زَرَطَوْا الْقَنَادِيلْ التُّخَانْ وَ مَلَانِينْ عِيَالْ. وَ خَلَاصْ، فِرْعَوْن قَمَّ وَ عِرِفْ كَدَرْ هُو حِلِمْ.

٨ وَ بِفَجُرْ، فِرْعَوْن بَرْجَلْ مَرَّةْ وَاحِدْ مِنْ حِلْمَهْ دَا وَ نَادَى كُلَّ الشَّدَّارَى وَ عُلَمَاءْ مَصِرْ. هُو حَجَّى لَيْهُمْ بِالْحِلِمْ وَ لَاكِنْ نَادُمْ وَاحِدْ كُلَ مَا قِدِرْ فَسَّرْ لَيَّهْ الْحِلِمْ دَا.

٩ خَلَاصْ، مَسْؤُولْ هَنَا النَّاسْ الْبَنْطُوا شَرَابْ لِلْمَلِكْ قَالْ: «يَا سِيدِي! الْيَوْم أَنَا أَذَّكَّرْت خَطَايِ. ١٠ يَوْم وَاحِدْ، إِنْتَ زِعِلْت مِنِّي أَنَا وَ مِنْ مَسْؤُولْ النَّاسْ الْيِسَوُّوا خُبْزَةْ. وَ قَمَّيْت سَجَنْتِنَا فِي سِجِنْ هَنَا كَبِيرْ الْحُرَّاسْ. ١١ وَ يَوْم وَاحِدْ، حِلِمْنَا وَ حِلِمْ هَنَا أَيِّ وَاحِدْ مِنِّنَا عِنْدَهْ مَعَنَى. ١٢ وَ فِي السِّجِنْ فِيَّهْ صَبِي وَاحِدْ، هُو عَبِدْ عِبْرَانِي هَنَا كَبِيرْ الْحُرَّاسْ. وَ أَنِحْنَ حَجَّيْنَا لَيَّهْ بِحِلِمْنَا وَ هُو أَنْطَانَا الْمَعَنَى. وَ فَسَّرْ لِأَيِّ وَاحِدْ حِلْمَهْ. ١٣ وَ الْكَلَامْ الْكَلَّمَهْ لَيْنَا دَا، جَاءْ فِي دَرْبَهْ مِثِلْ هُو قَالَهْ. وَ خَلَاصْ، لَيِّ أَنَا قَبَّلْتِنِي فِي خِدِمْتِي وَ لَاكِنْ لِمَسْؤُولْ النَّاسْ الْبِسَوُّوا خُبْزَةْ، إِنْتَ شَنَقْتَهْ.»

يُوسُف فسّر حِلِم فِرْعَوْن

١٤ وَ طَوَّالِي فِرْعَوْن رَسَّلْ يِجِيبُوا يُوسُفْ. وَ مَشَوْا مَرَقَوْه مِنْ السِّجِنْ. وَ هُو زَيَّنْ رَاسَهْ وَ غَيَّرْ خَلَقَهْ. وَ وَدَّوْه قِدَّامْ فِرْعَوْن. ١٥ وَ الْمَلِكْ قَالْ لِيُوسُفْ: «أَنَا حِلِمْت وَ نَادُمْ وَاحِدْ كُلَ مَا قِدِرْ فَسَّرْ لَيِّ حِلْمِي دَا. وَ أَنَا سِمِعْت كَدَرْ إِنْتَ تَقْدَرْ تِفَسِّرْ الْحِلِمْ كَنْ نَادُمْ حَجَّاهْ لَيْك.» ١٦ وَ يُوسُفْ رَدَّ لَيَّهْ: «مَا أَنَا بَسْ نَنْطِيكْ تَفْسِيرْ لَاكِنْ الرَّبّ بَسْ يَنْطِيكْ تَفْسِيرْ عَدِيلْ.»

١٧ وَ الْمَلِكْ قَالْ: «فِي حِلْمِي أَنَا قَاعِدْ فِي خَشُمْ بَحَرْ النِّيلْ. ١٨ وَ دَاهُو شِفْت سَبْعَةْ بَقَرْ سُمَانْ وَ سَمْحِينْ مَرَقَوْا مِنْ الْبَحَرْ وَ قَاعِدِينْ بَاكُلُوا قَشّ فِي خَشُمْ الْبَحَرْ. ١٩ وَ بَعَدْ دَا، سَبْعَةْ بَقَرْ آخَرِينْ كُلَ مَرَقَوْا وَرَاهُمْ وَ هُمَّنْ بَاطْلِينْ وَ شَيْنِينْ وَ حَرْقَانِينْ. وَ أَنَا مَا شِفْت أَبَداً فِي مَصِرْ بَقَرْ شَيْنِينْ مِثِلْ دَوْل! ٢٠ خَلَاصْ الْبَقَرْ دَوْل أَكَلَوْا السَّبْعَةْ بَقَرْ السُّمَانْ الْمَرَقَوْا أَوَّلْ. ٢١ بَعَدْ أَكَلَوْهُمْ، بَيْدَا كُلَ هُمَّنْ قَاعِدِينْ بَاطْلِينْ مِثِلْ أَوَّلْ. وَ كَنْ شِفْتُهُمْ، مَا تُقُولْ أَكَلَوْا الْبَقَرْ دَوْل. خَلَاصْ أَنَا وِعِيتْ.

٢٢ «وَ بَتَّانْ أَنَا حِلِمْت وَ دَاهُو شِفْت سَبْعَةْ قَنَادِيلْ تُخَانْ وَ مَلَانِينْ عِيَالْ مَرَقَوْا مِنْ عَقَيْقَايْ وَاحِدَةْ. ٢٣ وَ بَعَدْ دَا، سَبْعَةْ قَنَادِيلْ آخَرِينْ مَرَقَوْا جَنْبُهُمْ وَ هُمَّنْ رُقَاقْ وَ يَابْسِينْ وَ حَرْقَانِينْ مِنْ الْحَمُو. ٢٤ وَ السَّبْعَةْ قَنَادِيلْ الرُّقَاقْ زَرَطَوْا الْقَنَادِيلْ الْمَلَانِينْ عِيَالْ. وَ مِثِلْ دَا، أَنَا حَجَّيْتَهْ لِلشَّدَّارَى وَ لَاكِنْ مَا فِي نَادُمْ الْقِدِرْ فَسَّرَهْ لَيِّ.»

٢٥ وَ يُوسُفْ قَالْ لِفِرْعَوْن: «حِلْمَكْ الْإِتْنَيْن دَوْل يِوَصُّفُوا شَيّءْ وَاحِدْ بَسْ. الرَّبّ وَصَّفَاكْ الشَّيّءْ الْيِسَوِّيهْ. ٢٦ السَّبْعَةْ بَقَرْ السَّمْحِينْ وَ السَّبْعَةْ قَنَادِيلْ الْمَلَانِينْ عِيَالْ هُمَّنْ سَبْعَةْ سَنَةْ. وَ دَا، حِلِمْ وَاحِدْ بَسْ. ٢٧ وَ السَّبْعَةْ بَقَرْ بَاطْلِينْ وَ شَيْنِينْ الْمَرَقَوْا وَرَاهُمْ وَ السَّبْعَةْ قَنَادِيلْ يَابْسِينْ وَ حَرْقَانِينْ مِنْ الْحَمُو، هُمَّنْ دَوْل يِوَصُّفُوا سَبْعَةْ سَنَةْ هَنَا جُوعْ.

٢٨ «مِثِلْ أَنَا أَوْرَيْتَكْ، يَا السَّيِّدْ الْمَلِكْ، الرَّبّ وَصَّفَاكْ الشَّيّءْ الْيِسَوِّيهْ. ٢٩ دَاهُو السَّبْعَةْ سِنِينْ الْجَايِينْ، يُكُونُوا سِنِينْ هَنَا مَعَاشْ كَتِيرْ فِي كُلَّ بَلَدْ مَصِرْ. ٣٠ وَ بَعَدَيْن، يَجُوا سَبْعَةْ سِنِينْ هَنَا جُوعْ. وَ النَّاسْ يَنْسَوْا الْمَعَاشْ الْأَوَّلْ لِقَوْه فِي الْبَلَدْ. وَ الْجُوعْ يِدَمِّرْ كُلَّ بَلَدْ مَصِرْ. ٣١ وَ النَّاسْ يَنْسَوْا كَدَرْ أَوَّلْ لِقَوْا مَعَاشْ كَتِيرْ. وَ دَا أَشَانْ الْجُوعْ يَبْقَى شَدِيدْ مَرَّةْ وَاحِدْ. ٣٢ وَ حِلْمَكْ بِقِي إِتْنَيْن دَا أَشَانْ الرَّبّ شَالْ قَرَارْ كَدَرْ الشَّيّءْ دَا قَرِيبْ يُكُونْ.

٣٣ «يَا سَيِّدْ الْمَلِكْ، هَسَّعْ دَا فَتِّشْ نَادُمْ فَاهِمْ وَ حَكِيمْ وَ أَنْطِيهْ مَسْؤُولِيَّةْ كُلَّ بَلَدْ مَصِرْ. ٣٤ وَ خُطّ مُرَاقِبِينْ فِي الْبَلَدْ. وَ هُمَّنْ يِشِيلُوا الْخُمُسْ مِنْ الْإِنْتَاجْ فِي السَّبْعَةْ سِنِينْ هَنَا الْمَعَاشْ الْكَتِيرْ الْيَلْقَوْه فِي بَلَدْ مَصِرْ. ٣٥ وَ خَلِّي يِلِمُّوا الْأَكِلْ الْيَلْقَوْه فِي السَّبْعَةْ سِنِينْ هَنَا الْمَعَاشْ الْكَتِيرْ. وَ أَنْطِيهُمْ أَمُرْ لِيُصُبُّوهْ وَ يُضُمُّوهْ فِي الْمَخَازِنْ الْفِي الْحِلَّالْ. ٣٦ بِمِثِلْ دَا، يُضُمُّوا الْمَعَاشْ لِنَاسْ الْبَلَدْ لِسَبْعَةْ سِنِينْ هَنَا الْجُوعْ الْيَجُوا فِي بَلَدْ مَصِرْ. وَ بَيْدَا، الْجُوعْ مَا يِدَمِّرْ الْبَلَدْ.»

يُوسُف بِقي حاكِم في مَصِر

٣٧ وَكِتْ الْمَلِكْ فِرْعَوْن وَ الْمَسْؤُولِينْ سِمْعَوْا الْكَلَامْ الْيُوسُفْ قَالَهْ دَا، هُمَّنْ فِرْحَوْا. ٣٨ وَ الْمَلِكْ قَالْ لِمَسْؤُولِينَهْ: «الرَّاجِلْ دَا، رُوحْ اللّٰهْ قَاعِدْ فَوْقَهْ. مَا نَقْدَرَوْا نَلْقَوْا نَادُمْ الْعِنْدَهْ بَرَكَةْ زِيَادَةْ مِنَّهْ.» ٣٩ وَ قَالْ لِيُوسُفْ: «الرَّبّ وَصَّفْ لَيْك كُلَّ الشَّيّءْ دَا. أَشَانْ دَا بَسْ، مَا فِي نَادُمْ فَاهِمْ وَ حَكِيمْ زِيَادَةْ مِنَّكْ إِنْتَ. ٤٠ خَلَاصْ إِنْتَ بَسْ تَحْكِمْ فِي بَلَدِي. وَ كُلَّ الشَّعَبْ هَنَا مَصِرْ يِتَابُعُوا كَلَامَكْ. وَ إِلَّا أَنَا بَسْ نَبْقَى عَالِي مِنَّكْ أَشَانْ أَنَا الْمَلِكْ.»

٤١ وَ بَتَّانْ قَالْ لِيُوسُفْ: «خَلَاصْ، أَنَا أَنْطَيْتَكْ الْحُكُمْ هَنَا كُلَّ بَلَدْ مَصِرْ.» ٤٢ وَ الْمَلِكْ سَلَّ الْخَاتِمْ مِنْ إِيدَهْ وَ دَسَّاهْ فِي إِيدْ يُوسُفْ وَ لَبَّسَهْ خَلَقْ هَنَا قُمَاشْ سَمَحْ وَ دَسَّ لَيَّهْ فِي رَقَبَتَهْ حَفِيضَةْ هَنَا دَهَبْ. ٤٣ وَ رَكَّبَهْ فِي عَرَبَتَهْ الْمَلَكِيَّةْ التَّانِيَةْ وَ النَّاسْ مَاشِينْ قِدَّامَهْ يُقُولُوا: «كِسُّوا مِنْ الدَّرِبْ!» وَ بِمِثِلْ دَا، فِرْعَوْن أَنْطَى لِيُوسُفْ الْحُكُمْ هَنَا كُلَّ بَلَدْ مَصِرْ. ٤٤ وَ قَالْ بَتَّانْ لِيُوسُفْ: «أَنَا بَسْ الْمَلِكْ وَ نُقُولْ لَيْك نَادُمْ مَا يَرْفَعْ إِيدَهْ وَ لَا رِجْلَهْ بَلَا إِذْنَكْ إِنْتَ، فِي كُلَّ بَلَدْ مَصِرْ!»

٤٥ وَ الْمَلِكْ سَمَّى يُوسُفْ صَفْنَتْ فَعْنِيحْ وَ جَوَّزَهْ بِنَيَّةْ فُوطِي فَارَعْ الْأُسُمْهَا أَسْنَاتْ. وَ فُوطِي فَارَعْ هُو رَاجِلْ دِينْ هَنَا الْحِلَّةْ الْأُسُمْهَا أُونْ. مِنْ دَا خَلَاصْ، يُوسُفْ بَدَا يَحْكِمْ فِي بَلَدْ مَصِرْ. ٤٦ وَكِتْ يُوسُفْ قَابَلْ فِرْعَوْن مَلِكْ مَصِرْ، عُمْرَهْ 30 سَنَةْ. وَ خَلَاصْ، هُو مَرَقْ مِنْ بَكَانْ الْمَلِكْ وَ مَشَى يُرُوغْ فِي كُلَّ بَلَدْ مَصِرْ.

سبْعة سِنين هنا معاش كتير

٤٧ فِي سَبْعَةْ سِنِينْ، الزِّرَاعَةْ وِلْدَتْ كَتِيرْ. ٤٨ وَ فِي كُلَّ بَلَدْ مَصِرْ، يُوسُفْ لَمَّ كُلَّ الْمَعَاشْ هَنَا السَّبْعَةْ سِنِينْ دَوْل وَ ضَمَّاهْ فِي الْمَخَازِنْ هَنَا الْحِلَّالْ. وَ فِي أَيِّ حِلَّةْ، ضَمَّ الْمَعَاشْ النَّاسْ حَرَتَوْه فِي الزِّرَاعَةْ الْحَوَالَيْهَا. ٤٩ وَ يُوسُفْ لَمَّ قَمَحْ كَتِيرْ مِثِلْ رَمْلَةْ هَنَا خَشُمْ الْبَحَرْ. وَ نَادُمْ مَا يَقْدَرْ يِقَاوِسَهْ مِنْ الْكَتَرَةْ.

٥٠ قُبَّالْ سَنْت الْجُوعْ، أَسْنَاتْ مَرِةْ يُوسُفْ جَابَتْ لَيَّهْ أَوْلَادْ إِتْنَيْن، وَ هِي بِنَيَّةْ فُوطِي فَارَعْ رَاجِلْ دِينْ هَنَا الْحِلَّةْ الْأُسُمْهَا أُونْ. ٥١ الْبِكِرْ، يُوسُفْ سَمَّاهْ مَنَسَّى (مَعَنَاتَهْ نَسَّانِي) أَشَانْ هُو قَالْ: «الرَّبّ نَسَّانِي كُلَّ تَعَبِي وَ الْفُرْقَةْ مَعَ أَهَلِي.» ٥٢ وَ الصَّغَيَّرْ سَمَّاهْ أَفْرَايِمْ (مَعَنَاتَهْ إِنْتَاجْ) أَشَانْ هُو قَالْ: «الرَّبّ أَنْطَانِي عِيَالْ فِي الْبَلَدْ الْأَنَا تِعِبْت فَوْقهَا.»

السبْعة سِنين هنا الجوع بدوا

٥٣ خَلَاصْ فِي مَصِرْ، السَّبْعَةْ سِنِينْ هَنَا الْمَعَاشْ الْكَتِيرْ كَمَّلَوْا. ٥٤ وَ السَّبْعَةْ سِنِينْ هَنَا الْجُوعْ بَدَوْا مِثِلْ يُوسُفْ قَالَهْ. وَ فِي كُلَّ الْبُلْدَانْ، الْجُوعْ دَخَلْ لَيْهُمْ، إِلَّا فِي مَصِرْ بَسْ فِيَّهْ مَعَاشْ. ٥٥ وَ بَعَدَيْن، الْجُوعْ دَخَلْ فِي مَصِرْ كُلَ. وَ الشَّعَبْ مَشَوْا بَكَوْا لِفِرْعَوْن وَ قَالَوْا: «أَنْطِينَا مَعَاشْ!» وَ هُو قَالْ لَيْهُمْ: «أَمْشُوا لِيُوسُفْ وَ سَوُّوا الشَّيّءْ الْيُقُولَهْ لَيْكُو.»

٥٦ وَ الْجُوعْ بِقِي شَدِيدْ فِي كُلَّ الْبَلَدْ. وَ يُوسُفْ فَتَحْ كُلَّ الْمَخَازِنْ وَ قَمَّ يِبِيعْ الْقَمَحْ لِشَعَبْ مَصِرْ. وَ بَتَّانْ الْجُوعْ قَاعِدْ يِزِيدْ بِزِيَادَةْ فِي مَصِرْ. ٥٧ وَ النَّاسْ جَايِينْ مِنْ كُلَّ الْبُلْدَانْ لِيَشْرُوا قَمَحْ مِنْ يُوسُفْ فِي مَصِرْ أَشَانْ الْجُوعْ بِقِي شَدِيدْ مَرَّةْ وَاحِدْ فِي كُلَّ الْبُلْدَانْ.