पतरस कर लिखल दुसर चिठी
खास चेला पतरस कर लिखल दुसर चिठी
खास चेला पतरस कर जोहार
1
1 ए चिटठी ला मंए समोन पतरस, जेहर ईसू मसीह कर दास अऊ परेरीत लागों, मोर कती ले लिखल हवे। ए चिटठी ला ओमन कर नांव में लिखथों, जेमन हमर परमेसवर अऊ उदधार करोईया ईसू मसीह कर धरमीपन कर चलते, हमरेच नियर किमती बिसवास ला पाईन हवें। 2 तूमन परमेसवर अऊ हमर परभू ईसू मसीह ला अऊ ढेर जानत जावा, तेकर बर परमेसवर कर अनूगरह अऊ सांती ढेरेच बगरा मिले।परमेसवर हर हमके सब जाएत देहिस हवे
3 अपन जिनगी अऊ परमेसवर कर सेवा बरीक जे जाएत हमके चाही, ओ सब जाएत ला परमेसवर हर अपन सामरथ कर जरिये हमके देहिस हवे। काबरकि हमरे ओके जानथी, जेहर अपन खूद कर महिमा अऊ भलाई कर चलते हमके बलाईस हवे। 4 एकर चलते ओहर हमके ला अपन ढेरेच महान अऊ कीमती बात-जबान देहीस हवे, ताकि ओकर जरिये तुमन खुद परमेसवर कर सुभाव कस होए जावा अऊ संसार कर ओ बुराई कर काम ले बांएच जावा, जेहर घिनक ईछा ले आथे।
5 एकरे चलते तुमन सब मधे कर कोसीस कएर के अपन बिसवास में भलाई अऊ भलाई में गियान, 6 अऊ गियान में संयम अऊ संयम में धीरज अऊ धीरज में भकती, 7 अऊ भकती में भाई-चारा कर दया अऊ भाई-चारा कर दया में मया बढ़ाते जावा। 8 काबरकि कहों ए गुन तुमन में रथे अऊ बढ़त जाथे, त तुमन ला हमर परभू ईसू मसीह कर पूरा गियान में निकम्मा अऊ हारे नई देही। 9 बकिन जेमन में ए गुन नईएं, ओहर अंधा हवे, अऊ धुंधरा देखथे, अऊ ओहर भुलाए गईस हे कि ओहर अपन आगू कर पाप ले धोवाए के सफा होए गईस हवे। 10 एकरे चलते ए भाई-बहिन मन, अपन बुलाए जाए अऊ चुनल जाए ला, पका करे बर अऊ बढियां ले उतसुक रहा, काबरकि अगर तुमन एकस करीहा, त तुमन अपन बिसवास ले कभों नई हठिहा, 11 अऊ एही कस हमर परभू अऊ उद्धार करईया ईसू मसीह कर अमरकाल कर राएज में तूमन कर जोरदार सुवागत होही।
परमेसवर कर वचन में धियान लगाईहा
12 एकरे बर, मंए तुमन ला हमेसा ए गोएठ मन कर सुरता करवात रहूं, फुरोंच में तूमन एमन ला जानथा अऊ ओ सच, जेहर तूमन के मिलिस हवे, ओमे तूमन बजर होए गए हवा। 13 मोर बर एहर ठीक हवे, कि जब तक मंए ए देंह रूपी डेरा में हवों, तब तक तुमन के एकर सूरता देवात रहूं। 14 काबरकि मंए एला जानथों, कि मोर ए डेरा ला छोंड़े कर घरी हालू आए पहूंचिस हे, जेकस कि हमर परभू ईसू मसीह हर मोके बताईस हवे। 15 एकरेले मंए ए बात कर कोसिस करहूं, कि मोर संसार ले जाए कर पाछू, तुमन ए सब बात मन ला हमेसा सूरता करिहा।।
16 जब हमरे तुमन के, हमर परभू ईसू मसीह कर सामरथ अऊ आए कर बारे में बताएन, त हमरे चतुराई ले गढ़ल कहनी मन कर नकल नई करेन, बलकी हमरे ईसू कर महिमा ला अपन आंखी ले देखे रहेन। 17 जब ओहर दाऊ परमेसवर ले आदर अऊ महिमा पाईस, त ओ सबले बड़खा महिमा ले ए अवाज आईस, “एहर मोर दूलरूवा बेटा लागे, एकर ले मंए ढेरेच खूस हवों।” 18 जब हमरे पबितर पहाड़ कर ऊपरे ओकर संगे रहेन, त हमरे खूद ए अवाज ला सूनेन, जेहर सरग ले आवत रहीस।
19 अऊ हमर जग अगमजानी मन कर बचन हवे, ए सब बात ले हमरे फुरोंच में जाएन गएन, कि अगमजानी मन कर वचन हर ठीक हवे। तुमन एकर ऊपर धियान देके बढ़ियां करथा। काबरकि एहर एगोट दीया नियर हवे, जेहर एगोट अंधार जघा में चमकत हवे अऊ एहर तब तक चमकथे जब तक कि दिन नई होए जाए अऊ तुमन कर हिरदे में बिहान कर तरईया नई निकल आए। 20 बकिन सबले आगु, तुमन ए गोएठ ला जरूर जाएन लेवा कि, पबितर किताब में बतावल अगमबानी हर, कोनो अगमजानी कर अपन खुद कर बिचार ले नई आईस हवे। 21 काबरकि कोनो अगमबानी हर, मईनसे मन कर ईछा ले कभों नई होईस, बकिन मईनसे मन पबितर आतमा कर अगुवाई ले परमेसवर कर गोएठ गोठियात रहींन।