झूठा सिकछा देवईया मन कर बारे में सवाचेती
4
1 पबितर आतमा हर सफा-सफा कहथे,
कि अवईया घरी में झूठा सिकछा देवईया मन दुसट आतमा मन कर बस में होए के सिखाहीं अऊ एकर चलते केतनो झे मन बिसवास ले बहेक जाहीं।
2 एहर झूठा सिकछा देवईया मन कर कपट कर चलते होही,
जेमन कर सोंच ला लकलकावत लोहा में दागल गईसे,
मने कि ओमन सही अऊ गलत ला नई जाने।
3 ए झूठा मन बिहाओ करे ले मना करहीं अऊ काहीं-काहीं चीज ला खाए ले रोकहीं। जेला परमेसवर हर खाए बर बनाईसे कि बिसवासी अऊ सत कर जनोईया मन,
परमेसवर कर धनबाद कएर के खाए।
4 काबरकि परमेसवर कर बनावल सब जाएत हर बढ़िहां हवे,
ओला परमेसवर कर धनबाद देके खाही त कोनो खाए कर चीज हर दोछे लाईक नईए।
5 काबरकि ओहर परमेसवर कर बचन अऊ पराथना कर जरिये पबितर होए जाथे।
ईसू मसीह कर बढ़िहां सेवक
6 अगर तंए बिसवासी मन ला,
ए गोएठ कर सुरता करुवात रहबे,
त बिसवास अऊ खर-खर सिकछा जेला तंए मानत आए हस ओमे तोर पालन-पोसन होए के तंए ईसू मसीह कर बढ़िहां सेवक बनबे।
7 अपन आप ला झूठा सिकछा देवईया मन कर अनभनिया कहनी-किसा ले तंए दुरीहां रह,
बलकी तंए परमेसवर ला फुरमा करे कर जिनगी में बड़हत जा।
8 देंह कर कसरत करे ले थोरहें फयदा होथे,
बकिन परमेसवर ला फुरमा करे कर जिनगी में मन लगाए ले ढेर फयदा मिलथे,
काबरकि एकस करे ले ए घनी कर जिनगी अऊ अवईया जिनगी में फयदा मिलथे।
9 ए बात हर भरोसा करे लाईक हवे अऊ सब मधे ले माने अऊ बिसवास करे लाईक हवे।
10 हमन एकर ले मेहनत अऊ जतन करथन,
कि हमर असरा हर ओ जीयत परमेसवर कर ऊपर हवे,
जेहर सब मईनसे मन कर,
खास कएर के बिसवासी मन कर उदधार करोईया लागे।
11 ए बात मन कर अगींया दे अऊ सिखात रह।
12 तोर जवानी परिया कर चलते,
कोनो तोर बात ला बेकार झईन समझें। एकर बर तंए अपन गोएठ में अऊ चाल सहूर में अऊ मया में अऊ बिसवास में अऊ पबितरता में बिसवासी मन बर एगोट नमूना बएन जा।
13 जब ले मंए नई आए जाहूं,
तब ले तंए अपने-आप ला सब झन कर आगु में पबितर किताब ला पढ़े में,
उपदेस देहे में,
अऊ सिखाए में लगाए रह।
14 जे घनी कलिसीया कर सेवक मन तोर ऊपर हांथ राएख के अगमबानी करीन ते घनी जे वरदान ला परमेसवर तोके देहीसे,
ओला तंए काम में लानत रह।
15 ए बात मन ला सुरता में राखे रह अऊ एही बात ला करे बर अपन जीव-जहान ला लगाए रह,
तेमे कि तोर बड़ती ला सब झन देखें।
16 अपन जिनगी अऊ अपन सिकछा कर खास धियान दे अऊ ओमे लगे रह,
अगर तंए अईसने करबे,
त तोर सेवा कर जरिये,
तोके अऊ तोर बात सुनोईया मन ला उदधार मिलही।