बिनास कर बेटा
2
1 ए भाई-बहिन मन,
हमर परभू ईसू मसीह कर फेर आए कर अऊ ओकर जग हमर जूटे कर बारे में तुमन के बिनती करत हवन
2 कि कोनो हर आए के तुमन ला कही,
परभू कर दिन हर आए गईस हे,
त ओला सुईन के तुमन कर परान हर एकेच दाएर हुलुक-डुबूर झईन करे अऊ झईन घबरईहा। ओमन आए के एहू कस कहीं कि हमरे आतमा कर दरसन पाए हन अऊ बचन कर परचार सुने हन,
हमन ला चिठी मिलीस हे,
जेहर तुमन के हमर कती ले आईस हे कस लागही त तुमन ओमे बिसवास झईन करीहा।
3 कोनो हर तुमन ला कोनो मधे कर धोखा झईन दे,
काबरकि ओ दिन हर तब आही जब मईनसे मन परमेसवर कर बिरोध करहीं अऊ बिनास कर बेटा परगट होए जाही।
4 जेतना झेमन ईसवर कर नांव में जानल जाथें अऊ पूजा अराधना कर लाईक मानल जाथें,
ते सब मन कर बिरोध बिनास कर बेटा हर करही अऊ अपन आप ला सबले बड़खा बताही,
ओहर एतना तक करही कि परमेसवर कर मंदिर में बईठ के अपन आप ला परमेसवर बताही।
5 तुमन ला सुरता नईए का,
जब मंए तुमन कर संगे रहें,
त मंए तुमन ला ए सबेच बात ला बतात रहें?
6 तुमन जानत हवा कि कोन हर बिनास कर बेटा ला रोकत हवे,
तेमेकि ओहर परमेसवर कर ठहराल समय ले आगु परगट नई होही।
7 काबरकि बिनास कर बेटा हर अझरो ले लूकाए के काम करत हे,
बकिन अझेर ले एक झन ओला रोकत हे,
अऊ जब ले ए रोकोवईया हर नई कगराए जाही तब ले बिनास कर बेटा परगट नई होही।
8 तेकर ओ बिनास कर बेटा हर परगट होही,
जेला परभू ईसू हर अपन मूंह कर अगींया ले माएर दारही,
अऊ अपन आए कर तेज ले ओके नास कएर देही।
9 ओ बिनास कर बेटा हर सएतान कर सकती कर संगे आही,
अऊ ओहर झूठ-मूठ कर सबेच मधे कर चमतकार,
चिनहा अऊ अचरज कर काम करही,
10 अऊ नास होवईया मन ला सब मधे कर धोखा देवईया घिनक काम में डालही काबरकि ओमन सत ले मया नई करीन,
जे सत ले ओमन कर उदधार होतीस।
11 एकर चलते परमेसवर हर ओमन ला भरमाए देही,
तेमेकि ओमन झूठ-मूठ में बिसवास करें।
12 एकरेले जेतना मईनसे मन परमेसवर कर सत बचन कर ऊपरे बिसवास नई करें बकिन पाप करे में फुरमा होथें ओ सब झेमन डंड ला पाहीं।
बिसवास में बजर बने रहा
13 ए भाई-बहिन मन अऊ परभू कर दुलरुवा मन हमके ला तुमन बर सबेच घनी परमेसवर कर धनबाद करेक चाही काबरकि परमेसवर हर सुरू ले तुमन ला चुईन लेहीस हवे,
कि पबितर आतमा कर जरिये पबितर बएन के,
अऊ ईसू मसीह कर सत कर ऊपरे बिसवास कएर के तुमन उदधार पावा।
14 एकर बर परमेसवर हर हमर सुघर खभेर कर परचार कर जरिये तुमन ला बलाईस,
तेमेकि तुमन हमर परभू ईसू मसीह कर महिमा ला पावा।
15 एकरले ए भाई-बहिन मन,
तुमन बिसवास में माढ़े रईहा अऊ जे-जे बात ला हमर गोएठ चाहे चिठी कर जरिये तुमन सीखे हवा,
ओमन ला बजर धरे रईहा।