थिसलुनी सहर कर कलिसीया ला
परेरीत पऊलूस कर लिखल दूसर चिठी
परेरीत पऊलूस कर जोहार
1
1 मंए परेरीत पऊलूस,
सीलासa अऊ तीमुथियुस कर संगे थिसलुनी सहर कर कलिसीया बर;
ए चिठी ला लिखत हवन। तुमन हमर दाऊ परमेसवर अऊ परभू ईसू मसीह कर अपन लोग हवा।
2 हमर दाऊ परमेसवर अऊ परभू ईसू मसीह कती ले तुमन ला अनुगरह अऊ सांती मिलत रहे।
मसीह कर दुबारा आए घनी में मईनसे मन कर नियाओ
3 ए भाई बहिन मन,
हमके मन ला हमेसा तुमन बर परमेसवर कर धनबाद करे बर चाही अऊ एकस करे बर जरूरी हवे काबरकि परभू ईसू मसीह में तुमन कर बिसवास हर बड़हत जात हवे अऊ तुमन सबेच कर मया हर एक दूसर बर बगरत जात हे।
4 तेकर ले हमन,
परमेसवर कर कलिसीया मन में तुमन बर घमंड करथन काबरकि सबेच सताव अऊ दुख तकलीफ ला सह के अऊ धीरज धईर के तुमन बिसवास में बने रथा।
5 ए सब हर परमेसवर कर सही नियाओ कर पका सबूत लागे कि तुमन परमेसवर कर राएज लाईक बएन जावा,
जेकर बर तुमन दुखोच ला सहत हवा।
6 फूरोंच में परमेसवर कर देख में ए नियाओ हवे,
कि जेमन तुमन ला दुख-तकलीफ देथें ओमन ला परमेसवर हर पलटा में दुख-तकलीफ देही।
7 अऊ जेमन अझेर दुख-तकलीफ पावत हवा ओमन ला परमेसवर हर हमर संगे आराम देही,
अऊ एहर ओ घनी होही जे घनी परभू ईसू धधकत आगी अऊ अपन बहंगर दूत मन कर संगे सरग ले उतरही।
8 जेमन परमेसवर ला नई जानीन अऊ परभू ईसू कर सुघर खभेर ला नई मानीन,
ओमन ला ओकर पलटा देही।
9 ओमन परभू ईसू कर आगु ले अऊ ओकर महिमा कर सकती ले दुरीहां होए के अईसन बिनास कर डंड पाहीं जेहर कभों नई सिराही।
10 एहर ओ दिन होही,
जे घनी परभू ईसू हर बिसवास करोईया अपन पबितर मईनसे मन जग ले महिमा पाए बर अऊ मरजाद पाए बर आही,
एमे तुंहूच मन मेराए हवा काबरकि तुमन हमर गवाही में बिसवास करे हवा।
11 हमरे हमेसा तुमन बर पराथना करथन कि हमर परमेसवर हर तुमन ला ओ जिनगी कर लाईक समझे,
जेला जीये बर तुमन ला बलाईस हे अऊ तुमन कर सबेच भलाई कर इछा अऊ बिसवास कर सब काम ला,
अपन सकती कर जरिये पूरा करे।
12 एही कस हमर परभू ईसू मसीह कर नांव हर तुमन कर जिनगी कर जरिये माएन-मरजाद पाए अऊ तुंहू मन ईसू कर संगे जीये कर चलते माएन-मरजाद पावा। ए सब जाएत हर हमर परमेसवर अऊ ईसू मसीह कर अनुगरह ले होही।