पराथना करे कर बिनती
3
1 आखिर में ए भाई-बहिन मन,
मंए कहथों कि हमर बर पराथना करा कि परभू ईसू कर बचन हर हालू बगेर जाए अऊ ओहर माएन मरजाद पाए,
जेकस कि तुमन कर मझार में होईस हे।
2 अऊ पराथना करा कि परमेसवर हर हमन ला कसरीहा अऊ दुसट मईनसे मन ले बचाए,
काबरकि सब मईनसे मन हमर खभेर में बिसवास नई करें।
3 बकिन परभू हर भरोसा कर लाईक हवे,
अऊ ओहर तुमन ला बिसवास में बजर करही,
अऊ ओ दुसट सएतान ले बचाही
4 हमके परभू हर तुमन ऊपरे भरोसा देथे,
कि जे बात कर अगींया तुमन के देथन,
ओ अगींया मन ला तुमन मानत हवा अऊ हमेसा मानत रईहा।
5 परभू हर तुमन कर हिरदे ला,
परमेसवर कर मया में अऊ जे धीरज तोके मसीह देथे ओमे अगुवाई करे।
कोड़िहा मन कर बिरोध में चेतावनी
6 ए भाई-बहिन मन,
हमर परभू ईसू मसीह कर नांव में तुमन के अगींया देहथन कि जे बिसवासी मन कोड़िहा हवें अऊ जे सिकछा ला हमर जग ले पाईन हवें,
ओकर अनुसार नई चलें ओमन जग ले अलगे रईहा।
7 तुमन खुद जानत हवा कि तुमन ला कईसे हमर कस चाल चले बर चाही,
जब हमरे तुमन संग रहेन त अलढेरीहा बएन के नई रहेन।
8 अऊ फोकट में हमरे ककरो इहां खाना नई खाएन,
बलकी हमरे मेहनत अऊ लगन कर संगे राएत-दिन काम-बूता करत रहेन तेमे कि तुमन में ले ककरो ऊपरे हमन बोझा झईन बनी।
9 एकस नईए कि तुमन जग ले हमके मदेत मांगे कर हक नईए,
बकिन एकर बर कि हमरे खुद तुमन कर आगु में एगोट नमूना देखाएन कि तुंहू मन हमर कस चाल चला।
10 जब हमरे तुमन जग रहेन,
त तुमन ला एकस कहत रहेन कि “अगर कोनो मईनसे हर काम करे में कोड़िहा हवे त ओहर खाएयो बर झईन पाए।”
11 हमरे एकस सुने हन कि तुमन कर मझारे थोरोक झेमन अलढेरीहा हवें,
ओमन कांहीच काम-बूता नई करें बलकी दूसर कर काम में अड़ंगा डालथें।
12 अईसन मईनसे मन ला हमरे परभू ईसू मसीह में चेतावथी अऊ समझाथी कि कले-कस अपन काम-बूता कएर के अपनेच कमई कर रोटी खईहा।
13 त ए भाई-बहिन मन,
तुमन भलाई कर बूता करे में कभों झईन बिदईहा।
14 अगर कोनो हर हमर ए चिठी कर बतावल बात ला नई माने त ओके देखत रईहा,
अऊ ओकर संगे रहन-बसन झईन करीहा तेमेकि ओ लजाए जाए।
15 तबो ले ओके बईरी-दूसमन झईन समझीहा,
बकिन भाई-बहिन जाएन के चेतईहा।
ए चिठी कर आखरी जोहार
16 अब परभू ईसू जेहर सांती देवईया हवे,
ओहर खुद तुमन ला सब घनी अऊ सब कती ले सांती देहत रहे। परभू तुमन सब झन कर संगे रहे।