परमेसवर ला फुरमा करे कर जिनगी
4
1 ए भाई-बहिन मन,
तुमन परमेसवर ला फुरमा करे बर हमर जग ले सीखे हवा,
अझरो ले तुमन ओहीच कस जिनगी जीयत हवा। हमरे तुमन जग बिनती करत हवन अऊ परभू ईसू में समझात हवन कि जेकस तुमन ओमे चलथा,
ओहीच में अऊ बड़ते जावा।
2 हमरे परभू ईसू मसीह कर अधिकार ले तुमन ला का-का अगींया देहे हवन,
ओला तुमन जानत हवा।
3 परमेसवर ए चाहथे कि तुमन पबितर बना मने कि बेभिचार ले दुरीहां रहा।
4 अऊ तुमन में ले सबेच मईनसे मन अपन देंह ला बस में कएर के अऊ पबितर बएन के आदर कर संगे अपन परानी जग रहे बर सीखें,
5 अऊ ओ गएर एहूदी मन कस भोग-बिलास झईन करा,
जेमन परमेसवर ला नई जाने।
6 तुमन में ले कोनो हर अईसन घिनक काम कएर के अपन भाई ला झईन ठगे अऊ ओकर नुकसान झईन करे। हमरे आगुवेच ले तुमन ला बताए हन अऊ सवाचेती करे हवन कि परभू हर एकस करोईया मन ला डंड देही।
7 काबरकि परमेसवर हर हमके ला असाएध होए बर नही बकिन पबितर जिनगी जीये बर बलाईस हवे।
8 एकरले जेमन ए सिकछा ला नई माने ओमन मईनसे ला नही,
बकिन परमेसवर ला दोछथें जेहर तुमन ला अपन पबितर आतमा देथे।
9 संगी बिसवासी मन जग मया करे कर बारे में,
तुमन ला कांहीच लिखे कर जरूरत नईए,
काबरकि परमेसवर हर तुमन ला एक-दूसर जग मया करे बर सीखाईस हे।
10 अऊ मकिदूनिया सहर कर,
सबेच भाई बहिन मन कर संगे तुमन अझरो ले मया करत हवा। तबो ले ए भाई बहिन मन,
हमरे तुमन ला उतसाहित करथी कि तुमन अऊ बगरा मया करत रईहा।
11 तुमन सांती ले जिनगी जीयत रईहा मने कि दूसर कर काम में अड़ंगा झईन डालीहा,
अपन-अपन हांथ ले कमाए कर कोसिस करीहा जेकस हमरे तुमन ला उपदेस देहे हवन।
12 तुमन एकस जिनगी जीयत रईहा त कलिसीया कर बाहरी कर मईनसे मन तुमन कर माएन-मरजाद करहीं अऊ तुमन ककरो ऊपर बोझ झईन बनीहा।
ईसू कर दुबारा अवाई
13 ए भाई-बहिन मन,
हमरे चाहथी कि जे बिसवासी मन मएर गईन हवें,
ओमन कर बारे में जाएन लेआ कि ओमन कर का होही। तेमेकि आने मन कस तुमन ला दुखी होए बर झईन परे काबरकि ओमन ला मएर के फेर जीये कर असरा नईए।
14 काबरकि हमरे बिसवास करथी कि ईसू हर मएर गईस अऊ फेर जी उठीस,
अईसनेच जेमन ईसू में बिसवास कएर के मएर गईन हवें,
ओमन ला परमेसवर हर फेर जीयाही अऊ ईसू कर संगे ले आन ही।
15 परमेसवर कर बचन कर अनुसार,
तुमन जग कहथी कि,
परभू कर आए घनी मरल मन आगु सरग जाहीं। तेकर पाछू हमन में ले जे बिसवासी मन जीयत अऊ बांचे रहबो तेमन सरग जाबो।
16 काबरकि परभू हर,
अपन अगींया ला चिकेर के अऊ सरग कर मुख सरगदूत कर अवाज अऊ परमेसवर कर तुरही कर अवाज कर संगे सरग ले उतरही अऊ जेमन मसीह में बिसवास कएर के मएर गईन हवें,
ओमन आगु जी उठहीं।
17 तेकर हमरे जेमन जीयत अऊ बांचे रहबो,
ओमन कर संगे हमूके उठाए के बदरी में ले जाहीं कि अगास में परभू कर संगे भेंटाई अऊ एही कस हमरे हमेसा परभू कर संगे रहबो।
18 एकरले,
एहीच बचन मन ला गोठियाके एक दूसर झन ला उतसाहित करत रईहा।