तीमुथियुस ला भेजीन
3
1 आखरी में हमरे अऊ सहे बर नई सकेन तेकर ले हमरे एथेनस सहर में अकेला रहे बर सोंचेन,
2 त हमर भाई तीमुथियुस ला तुमन जग भेजेन। ओहर परमेसवर कर सेवक लागे जेहर,
हमर संगे मसीह कर सुघर खभेर कर परचार करत हवे। ओहर आए के तुमन कर बिसवास ला बजर करही अऊ उतसाहित करही।
3 तेमेकि तुमन में ले कोनो मन ए सताव कर चलते अपन बिसवास ले झईन फिरें। तुमन खुदेच जानथा कि ए सताव ला सहे बर तुमन ला ठहराल गईस हे।
4 जब हमरे तुमन जग रहेन त तुमन ला आगुवेच ले कहत रहेन कि हमके मन ला सताव सहे बर परही अऊ अझेर तुमन जानथा कि एहीच कस होईस।
5 जब मोके अऊ नई सहाईस,
त तुमन कर बिसवास कर बारे में पूछे बर तीमुथियुस ला तुमन जग भेजें। काबरकि मंए डराए गए रहें कि कहों सएतानa हर तुमन कर परीछा करीस होही अऊ हमर मेहनत हर बेकार होए गईस होही।
6 बकिन अझेर तीमुथियुस हर,
उहां ले हमर जग आईस हे अऊ तुमन कर बिसवास अऊ मया कर बढ़िहां बात ला बताईस अऊ एहू कस कहीस कि तुमन सबेच घनी मया कर संगे हमर सुरता करथा अऊ हमके ला देखे बर घोखथा,
जेकस कि हमू मन तुमन ला देखे बर घोंखत हन।
7 एकरे ले ए भाई-बहिन मन,
हमरे ढेरेच दुख अऊ सताव में हवन। तबो ले परभू कर ऊपरे तुमन कर बिसवास हर माढ़ीस हवे। ओला देख के हमर चोला हर हरीयर होए गईस।
8 तुमन परभू कर बिसवास में बजर हवा,
एला जाएन के फूरोंच में हमर जीव में जीव आईस।
9 तुमन कर चलते हमरे परमेसवर कर आगु में ढेरेच फुरमा होथन अऊ हमरे तुमन बर एतना खुस हवन,
कि परमेसवर ला कोन कस धनबाद करी?
10 तुमन के देखे बर अऊ तुमन कर बिसवास में जे कमी हवे ओला पूरा करे बर हमरे राएत दिन जीव जहान लगाए के पराथना करत रथी।
11 हमर दाऊ परमेसवर खुद अऊ हमर परभू ईसू मसीह हमके ला तुमन जग फेरेच आए बर उपाए करे।
12 अऊ परभू एकस करे कि जेकस हमरे तुमन जग मया करथी,
ओही कस तुमन कर मया हर एक-दूसर बर अऊ सबेच मईनसे मन बर बड़हे अऊ बईड़ के उछले।
13 तेमेकि ओहर तुमन कर हिरदे ला बजर करे कि जब हमर परभू ईसू हर अपन सबेच पबितर मईनसे मन कर संगे आही,
त तुमन कर मन ला हमर परमेसवर दाऊ कर आगु में पबितर अऊ बिगर कसूर कर पाए।