थिसलुनी सहर में पऊलूस कर सेवा
2
1 ए भाई-बहिन मन,
तुमन खुद जानत हा कि हमरे तुमन जग आएन तेहर अनभनिया नई होईस।
2 तुमन के सुरता होही कि तुमन जग भेंटाए कर आगु,
हमरे फिलीपी सहर में दुख उठाएन अऊ मार-पीट ला सहेन,
तबो ले हमर परमेसवर हर हमके ला एकस हिमेत देहीस कि ढेरेच बिरोध होवत रहीस तेहूच घनी हमरे परमेसवर कर सुघर खभेर ला तुमन के सुनाएन।
3 काबरकि हमर उपदेस हर धोखा अऊ असाएध सोंच ले नईए अऊ हमरे तुमन ला छले कर कोसिस नई करेन।
4 बलकी परमेसवर हर हमके सुघर खभेर ला सोंपीस हवे,
एकर ले हमरे मईनसे मन ला फुरमा करे बर नही बकिन जेहर हमर हिरदे ला तजबीजथे ते परमेसवर ला फुरमा करे बर परचार करथी।
5 तुमन जानत हवा कि हमरे कभों झूठ-मूठ कर बड़ाई नई करेन अऊ हमरे पईसा कर लालच बर कोनो बहाना नई करेन परमेसवर हमर गवाह हवे।
6 हमरे ईसू मसीह कर परेरीत होए कर चलते,
तुमन ऊपरे अपन अधिकार चलाए सकत रहेन,
तबो ले हमरे एकस नई करेन,
काबरकि हमरे तुमन जग अऊ आने झन मन जग माएन-मरजाद नई चाहेन।
7 बकिन जेकस दाई हर अपन लईका मन ला पालथे-पोसथे,
ओही कस हमू मन तुमन कर मझारे लूईर के रहेन।
8 अऊ हमरे तुमन जग एतना मया करेन कि हमरे खाली परमेसवर कर सुघर खभेर ला तुमन के नई सुनाएन बकिन हमन अपन परानोच ला तुमन के देहे बर तियार रहेन,
काबरकि तुमन हमर दुलरुवा बईन गए रहा।
9 ए भाई बहिन मन,
तुमन हमर मेहनत अऊ जीयाएन कर सुरता करथा;
हमरे राएत-दिन काम बूता कएर के,
तुमन कर मझारे परमेसवर कर सुघर खभेर ला परचार करेन,
तेमे कि हमरे ककरो ऊपरे बोझ नई बनेन।
10 तुहींच मन हमर गवाह हवा अऊ परमेसवर हर भी गवाह हवे कि बिसवास करोईया तुमन कर मझारे,
हमर चाल-सहूर हर केतेक पबितर अऊ परमेसवर कर देख में सुघर जिनगी जीवईया अऊ फईरचा रहीस।
11 तुमन जानत हवा कि जेकस दाऊ हर अपन लईका-छऊआ मन जग बेवहार करथे,
ओही कस हमू मन तुमन कर संगे करेन।
12 हमन तुमन कर हिमेत ला बड़हात रहेन अऊ समझात रहेन अऊ बिनती करत रहेन कि तुमन कर चाल सहूर हर परमेसवर कर फभऊ लाईक होए जाए। परमेसवर हर तुमन के अपन राएज अऊ महिमा में मेराए बर बलाथे।
13 त हमू मन परमेसवर कर हमेसा धनबाद देथी कि जब तुमन हमर जग ले परमेसवर कर खभेर ला सुना,
त तुमन एला खाली मईनसे कर बचन नही बकिन एला परमेसवर कर बचन समझ के अपनाया अऊ जेमन ओमे बिसवास करथें,
ओमन कर ऊपर ए बचन हर काम करत हे।
14 ए भाई-बहिन मन,
तुमन ला अपन जाएत-सागा मन जग ले ढेरेच दुख मिलीस,
तेकर ले तुमन एहूदिया इलाका कर कलिसीया मन कर,
बिसवासी मन कस बएन गए हवा,
जेकस एहूदिया इलाका कर मईनसे मन,
अपन जाएत-सागा एहूदी मन जग ले दुख पाए रहीन ओही कस तुंहूच मन पाए हवा।
15 ए एहूदी मन परभू ईसू अऊ अगमजानी मन ला माएर मरुवाईन अऊ हमूच के सताईन। ओमन परमेसवर ला नराज करथें,
अऊ सबेच मईनसे मन कर बिरोध करथें,
16 काबरकि ओमन गएर एहूदी मन ला,
पाप ले उदधार पाए कर सुघर खभेर ला बताए ले,
हमके रोकथें अऊ ओमन एकस कएर के अपन पाप कर गघरी ला भरत रथें,
बकिन ओमन कर ऊपरे परमेसवर कर डरडरावन गुसा हर आए पहुंचीसे।
परेरीत पऊलूस थिसलुनी मन जग भेंटाए बर करथे
17 ए भाई-बहिन मन,
हमरे तनीक दिन बर तुमन ले दुरीहां रहेन बकिन हमेसा तुमन कर सुरता करत रहेन,
अऊ तुमन ला ढेरेच घोंखत रहेन,
तेकर चलते हमरे तुमन जग भेंटाए कर ढेरेच कोसिस करेन।
18 हमरे तुमन जग आए बर चाहत रहेन। मंए पऊलूस खुद,
कईयो दाएर आए कर कोसिस करें,
बकिन सएतान हर हमके रोकीस।
19 जे घनी हमर परभू ईसू मसीह आही,
त हमर असरा अऊ आनंद अऊ बड़ाई कर मुकुट कोन होही?
का तुहींच मन नई होईहा?
20 फूरोंच में हमर बड़ाई,
अऊ आनंद तुहींच मन हवा।