थिसलुनी सहर कर कलिसीया ला
परेरीत पऊलूस कर लिखल पहिलो चिठी
परेरीत पऊलूस कर जोहार
1
1 मंए परेरीत पऊलूस,
सीलासa अऊ तीमुथियुस कर संगे थिसलुनी सहर कर कलिसीया बर;
ए चिठी ला लिखत हन। तुमन हमर दाऊ परमेसवर अऊ परभू ईसू मसीह कर अपन लोग हवा।
तुमन ला अनुगरह अऊ सांती मिलत रहे।
थिसलुनी मन कर बिसवास
2 हमरे पराथना में तुमन के सुरता करथन अऊ तुमन सबेच झन बर सगर दिन परमेसवर ला धनबाद देथन।
3 जे जे काम ला तुमन दाऊ परमेसवर में बिसवास अऊ दूसर कर ऊपर मया करे कर चलते करत हवा,
अऊ हमर परभू ईसू मसीह कर अवाई कर असरा में धीरज धरे हवा,
ए बात मन ला हमरे सबेच घनी सुरता करथी।
4 ए परमेसवर कर दुलरुवा भाई-बहिन मन,
हमरे जानथी कि परमेसवर हर तुमन ला चुनीस हवे।
5 काबरकि जे सुघर खभेर ला हमरे परचार करेन,
ओहर तुमन जग खाली गोएठ में नही बकिन सामरथ अऊ पबितर आतमा अऊ पका भरोसा कर संगे पहुंचीस हे। तुमन एहू ला जानथा कि हमरे तुमन कर भलाई बर तुमन कर मझारे कईसे रहे लागेन।
6 तुमन ढेरेच दुख सहेहा,
तबो ले पबितर आतमा कर आनंद कर संगे बचन ला मानेहा। तुमन हमर अऊ परभू कस चाल चले लागे हवा।
7 एकरले तुमन मकिदूनिया अऊ अखया राएज कर सब बिसवासी मन बर एगोट नमूना बएन गए हवा।
8 तुमन जग ले परभू कर बचन हर,
खाली मकिदूनिया अऊ अखया राएज में सूनाल नई गईस,
बलकी परमेसवर कर ऊपर तुमन कर बिसवास कर खभेर ला सबेच जघा में जाएन गईन हवें,
तेकर ले हमके ला कांही गोठियाए कर कोनोच जरूरत नईए।
9 काबरकि सबेच जघा कर आदमी मन खुद तुमन कर बारे में बताथें कि तुमन कईसना हमर सवागत करेहा अऊ तुमन मूरती कर पूजा ला छोंएड़ के परभू कती फिरे हा तेमेकि जीयत अऊ सचा परमेसवर कर सेवा करा।
10 अऊ तुमन ओकर बेटा ईसू ला,
सरग ले आए कर डगर देखत रहा। परमेसवर हर ओके ला मरल में ले जीयाईस हवे। ओही ईसू हर हमके ला परमेसवर कर अवईया बड़खा गुसा ले बचाही।