कुलूसी सहर कर कलिसीया बर
परेरीत पऊलूस कर लिखल चिठी
ए चिठी कर बारे में दम अकन गोएठ
कुलूसी सहर हर इफीसी सहर ले करीबन 80 कोस दुरिहां रहीस। पऊलूस कभों कुलूसी सहर में नई गईसे, बकिन ओमन के एपफरास भाई हर सुघेर खभेर सुनाईस। जे घनी पऊलूस अऊ एपफरास जेहल में रहीन, ते घनी पऊलूस हर सुनीस कि कुलूसी कर बिसवासी मन बिसवास में ढेरेच बजर हवें। तेकरले पऊलुस हर खुसी कर मारे कुलूसी कर कलिसीया बर ए चिठी लिखीसे।
ए कलीसिया कर विसवासी मन गेर एहूदी रहीन। इहां कर कोनो-कोनो मईनसे मन भुत-परेत कर पूजा करत रहीन। बकीन पऊलूस हर ओमन के समझाईस कि मसीह हर सरग में हवे अऊ सब जाएत कर ऊपरे ओही अधिकार राखथे। एकरले ओमन सिरीप मसीह कर अराधना करें। सब जाएत कर सिरजाई मसीह कर दुवारा होईसे अऊ जितना झेमन परमेसवर ले दुरिहां होए गईन हवे ओमन मसीह कर दुवारा परमेसवर कर लिघे आवथे।
ए किताब पढे ले हमके ला ए समझ में आथे कि कुरूस में मसीह हर, जे चीज हर हमर विरोध में रहीस ओ सब चीज ला हटाए देहीस अऊ सएतान कर जमो हथियार ला लुईट के ओके हरुवाए देहीस। ए किताब हर हमके सुरता करुवाथे कि हमरे मन संसार कर बात में नहीं बकीन सरग कर बात में हमेसा मन लगाए रही। हमरे हमेसा पराथना में लगे रहबो। हमर सेवक मन बर परारथना करबो कि परभू ओमन के अपन सेवकाई में इसतेमाल करें। जे मोका परभू हमर जिनगी में देथे ओला गंवाए बर नईए बकीन ओकर सही उपयोग करेबर हवे।
ए चिठी ला खालहे लिखल भाग में बांटल गईस हे
पऊलूस कर जोहार 1:1-2
पऊलूस कर धनवाद अऊ पराधना 1:3-8
मसीह कोन लागे अऊ मसीह कर काम 1:9-2:19
मसीह कर संगे नांवा जिनगी 2:20-4:6
आखरी जोहार 4:7-18