फिलिपी सहर कर कलिसीया बर
परेरीत पऊलूस कर लिखल चिठी
ए चिठी कर बारे में दम अकन गोएठ
पऊलुस हर जेहल में रहीस, ते घनी ए किताब ला लिखीसे। ए किताब में मईनसे मन ला अपन जिनगी कर कोनोच हालत में, आनंद अऊ खुस रहे बर बार-बार सीखाथे। जेकस पऊलूस कर जिनगी में सताव आईस, ओही कस हमरो जिनगी में सताव आए सकत हे। ओहू घरी हमके मन ला धीरज धएर के खुस रहे बर हवे।
ए किताब कर सुरू में पऊलूस हर फिलीपी कलिसीया कर बिसवासी मन ला धनबाद देहत हे, जेमन ओकर दुख कर घरी में मदेत करे रहीन। ओही कस हमू मन अपन संगी बिसवासी मन कर, जरूरत कर घरी में ओमन कर मदेत करेक चाही। ए चिठी में पऊलूस सुरता करवाथे कि सब बिसवासी मन आपस में मेल-जोल कर संगे रहें अऊ जेकस ईसू मसीह सोंच हवे ओही कस हमरो सोंच हो जाए।
ए किताब में परमेसवर हर हमके मन ला भरोसा देथे कि “मसीह ईसू हर तुमन बर मरीस हवे एकरले ओहर अपन अनठेकानी धन कर अनुसार तुमन कर हर एक जरूरत ला पूरा करही।” परमेसवर हमके मन ला सुरता देवाथे, कि कोनो बात कर चिंता झईन करीहा, बकीन सब बात में परमेसवर कर धनबाद देहत रईहा। ए किताब ला पढ़े ले हमके मन ला ए सिकछा मिलथे, कि सब बात में परेरीत पऊलूस नियर संतोस करे बर चाही, काबरकि जेकस पऊलूस हर बिसवास करथे, ओही कस हमू मन के बिसवास करेक चाही कि “जे मसीह हर मोके सामरथ देथे, ओमे मंए सब जाएत कएर सकथों”।
ए चिठी ला खालहे लिखल भाग में बांटल गईस हवे
पऊलूस कर जोहार अऊ पराथना 1:1-11
जिनगी कर बारे में पऊलूस कस सोंच 1:12-30
नरम सुभाव कर नमूना मसीह लागे 2:1-18
पऊलूस कर संगता मन कर खभेर 2:19-30
कईसन परमेसवर ला फुरमा कएर सकीहा 3:1-4:9
पऊलूस कस धनबाद 4:10-20
आखरी जोहार 4:21-23