दाई दाऊ अऊ लईका-छऊवा मन बर उपदेस
6
1 ए लईका मन, तुमन परभू में अपन दाई-दाऊ कर बात ला माना। काबरकि एहर सही लागे। 2 अपन दाई अऊ दाऊ कर माएन मरजाद करिहा (एही पहीलो अगींया लागे, जेकर संगे बात-जबान भी हवे) 3 तेमेकी तुमन कर भला होए अऊ तुमन ए धरती में ढेरेच दिन ले जीयत-खात रईहा। 4 ए दाऊ मन अपन-अपन लईका मन ला खिरमीरहा झईन करिहा। बकिन परभू ले मिलल सिकछा अऊ उपदेस ला देके ओमन कर पालन-पोसन करीहा।गोंसिया अऊ गुलाम बर उपदेस
5 हे गुलाम मन, जईसने मसीह कर बात ला मानथा, वईसने ए संसार में जेमन तुमन कर गोंसिया लागें, ओमन कर बात ला मरजाद अऊ डर कर संगे बिगर कपट कर हिरदे ले मानीहा। 6 मईनसे मन ला फुरमा करोईया मन कस देखउटी बर कोनो सेवा झईन करीहा, बकिन मसीह कर गुलाम कस अपन हिरदे ले परमेसवर कर ईछा ला पूरा करे बर ओमन कर सेवा करीहा। 7 हरक दिल ले एगोट सेवक कर रूप में अईसना काम करीहा जेकस माएन लेआ कि तुमन मईनसे मन कर नही बलकी परभू कर सेवा करत हा। 8 काबरकि तुमन जानथा कि जे कोनो हर जईसना बढ़िहां काम-बूता करथे, चाहे ओहर ककरो गुलाम रहे चाहे झईन रहे, परभू जग ले ओहर ओईसनेच फल पाही।
9 हे गोंसिया मन, तुंहूमन डराए धमकाए बर छोंएड़ के ओमन कर संगे बढ़िहां बेवहार करा, काबरकि तुमन जानथा कि ओमन कर अऊ तुमन कर दुनो कर गोंसिया सरग में हवे अऊ ओहर ककरो मूंह देखी नई करे।
आतमिक युध कर हथियार
10 तेकरे ले कहथों कि परभू में अऊ ओकर सामरथ कर सकती में बजर होए जा। 11 परमेसवर कर सबेच हथियार ला साएज के धईर ला, तेमेकी तुंहूच मन सएतान कर सबेच उपाए कर आगु ठड़होए सका। 12 काबरकि हमर लड़ाई हर हाड़ा अऊ मांस कर बनल मईनसे कर संगे नई होवत हे, बलकी एहर तो सासन करोईया मन ले अधिकारी मन ले अऊ अंधार संसार कर सकती मन ले अऊ दुसट आतमिक सेना जेमन अगास में हवे, ओमने संगे होवथे। 13 तेकर ले कहथों कि परमेसवर कर सबेच हथियार ला साएज के धईर लेआ तेमे कि जब दुसट सएतान तुमन के हमला करही तेघनी ओकर मुकाबला कएर सका, त लड़ाई कर पाछूवो माढ़े रईहा। 14 तेकर ले सत ले अपन कनिहां ला बाएंध ले अऊ परमेसवर ला फुरमा करे कर सुभाव कर झिलम पहिन के, 15 अऊ अपन गोड़ में सांती कर सुघर खभेर सुनाए कर पनही पहिर के तियार रहा। 16 बकिन ए सब कर संगे बिसवास कर ढ़ाल ला धईर के माढ़े रईहा, जेकर ले ओ दुसट सएतान कर जमो आगी कर बान ला बितुवाए सका। 17 अऊ उदधार कर टोप अऊ आतमा कर तलवाएर जेहर परमेसवर कर बचन लागे ओला धईर लेआ। 18 सबेच घनी पबितर आतमा में भरपूर होए के पराथना अऊ बिनती करत रईहा अऊ एकर बर जागत रहा कि सब परमेसवर कर लोग मन बर धीरज कर संगे बिनती करत रईहा। 19 अऊ मोरो बर पराथना करिहा कि जब मंए गोठियाए बर सुरू करों ते घनी मोके सही गोएठ मिले तेमे कि निडर होए के मंए सुघर खभेर कर लूकाल बात ला बताए सकों। 20 ए सुघर खभेर बर मंए राजदूत लागों, जेकर बर मंए कएद में बंधाए हवों। पराथना करिहा कि मंए ए सुघर खभेर ला निडर होए के सुनाओं जेकस मोके करे बर चाही।
परेरीत पऊलूस कर आखरी जोहार
21 तुखिकुस हर हमर दुलरुवा भाई अऊ परभू में बिसवास लाईक सेवक लागे। ओहर तुमन ला मोर बारे में सब बात ला बताही तेमेकि तुमन जाएन लेआ कि मंए का करत हों अऊ मोर हालत कईसना हवे 22 ओके ला मंए तुमन जग एकर ले भेजे हों कि तुमन हमर हालत ला जाएन जा अऊ ओहर तुमन कर हिरदे में ढाढस दे सके।