ईफिसि सहर कर कलिसीया बर
परेरीत पऊलूस कर लिखल चिठी
ए चिठी कर बारे में दम अकन गोएठ
ईफीसी सहर कर कलीसिया बर जे चिठी पऊलूस हर लिखीसे, ओला पढे ले हमर जिनगी में परमेसवर कर का योजना हवे, ओकर बारे में पता चलथे। ए चिठी कर खास बात ए हवे कि हमके ला पूरा छुटकारा देहे बर मसीह हर कुरूस में अपन जान देहीस। बकीन परमेसवर हर ओके मरल में ले तीसर दिन जियाए देहीस अऊ अझेर ओहर परमेसवर कर जवनी कती बईठीस हवे। ओहर अवईया समय में ए पूरा दुनिया में राएज करही। ए किताब हर फरी-फरी बताथे कि हमके मन ला जे उदधार मिलीसे ओहर परमेसवर कर अनुगरह अऊ ओकर बडखा मया ले मिलीसे अऊ एहर कोनों सुघर काम कर दुवारा नई मिलीसे।
ए किताब कर चार पाठ में लिखल हवे “जेकस कि एकेच ठन देंह हवे अऊ एकेच ठन पबितर आतमा हवे, ओही कस तुमन बर एकेच ठन असरा हवे जेकर बर परमेसवर हर तुमन के बलाईसे” ओही कस बिसवासी मन ला एक आतमा में अऊ एक मन होए के मिल-जुल के मसीह जिनगी जीए बर हवे। ए किताब में घरदार अऊ घरदारीन मन ला अऊ लईका छउवा अऊ दाई-दाऊ मन ला अऊ मालिक मन अऊ गुलाम मन ला मसीह में कईसे रहेबर हवे ओकर बारे में सीखाथे।
ए किताब कर आखरी पाठ में आतमिक युध कर बारे में भी लिखल हवे। एगोट मसीह योधा ला का-का करे बर चाही ओकर बारे में तुमन जाएन सकत हा। ए किताब ला पढिहा अऊ आतमिक आसीस पईहा।
ए चिठी ला खालहे लिखल भाग में बांटल गईस हे
पऊलूस कर जोहार1:1-3
मसीह ईसू हर आतमिक आसीस देथे 1:3-3:21
मसीह ईसू में एक होए के रेहे ले अमर जिनगी मिलथे 4:1-6:20
आखरी जोहार 6:21-24