ईफिसि सहर कर कलिसीया बर
परेरीत पऊलूस कर लिखल चिठी
1
1 मंए पऊलूस, जेहर परमेसवर कर ईछा ले ईसू मसीह कर परेरीत लागों। जेमन ला परमेसवर हर हिगारिस हवे (पबितर) अऊ मसीह ईसू कर उपरे पूरा मन ले बिसवास करथें ओमन बर ए मंए ए चिठी ला लिखथों जेमन इफिसूस सहर में रथें। 2 हमर दाऊ परमेसवर अऊ परभू ईसू मसीह कती ले तुमन के अनुगरह अऊ सांती मिलत रहे।मसीह में आतमिक आसीस
3 परमेसवर कर इसतुती होए, जेहर हमर परभू ईसू मसीह कर दाऊ लागे। कि मसीह में हमर जे रिसता हवे तेकर चलते परमेसवर हर हमन ला सरग कर जघा में सब मधे कर आतमिक आसीस देहीस हवे। 4 काबरकि परमेसवर हर संसार बने कर आगुवेच ले हमके मया करीस अऊ ओहर मसीह में हिगाएर लेहीस कि ओकर नजेर में हमरे पबितर अऊ निरदोस बनल रही।
5 परमेसवर हर आगुवेच ले फईसला करीस कि हमरे ईसू मसीह कर जरिये ओकर गोद लेहल लईका बईन जाई। एही ओकर इछा अऊ सुघर योजना रहीस 6 परमेसवर हर एकर बर अईसना करीस कि हमरे ओकर महिमा ले भरल अनुगरह कर बड़ाई करी। परमेसवर हर हमर बर जेमन ओकर दुलरुवा बेटा कर अपन लागन तेमन बर ए अनुगरह ला सेथिया झराए देहीस। 7 ओहर मसीह कर लहू कर दुवारा हमर बर अजादी खरीदिस माने कि ओहर अपन भरपूर अनुगरह कर मुताबिक हमर अपराध ला छमा करीस। 8 ओहर ओ अनुगरह कर संगे सब मधे कर गियान अऊ समझ हमके ला हकभेर देहीस हे, 9 अऊ एकर चलते परमेसवर हर अपन सुघर योजना जेहर मसीह में हे ओ योजना कर मुताबिक अपन लूकावल ईछा ला हमर जग परगट करीस। 10 ओकर सुघर योजना एहर हवे कि जब सही समय आही, त सरग अऊ धरती कर सब जाएत ला मसीह कर अधीन में करे बर जूटाही।
11 परमेसवर जेहर अपन योजना कर अनुसार सब जाएत ला करथे, ओहर हमके मन ला ईसू में जोड़ीस हवे, एकर बर हमन ला हकदार बनाईसे काबर कि ओहर हमके मन ला आगुवेच ले चुईन लेहीस हवे। 12 ओकर योजना एहर हवे कि आगु हमी मन मसीह में असरा लगाए रहेन, अब ओकरेच महिमा कर बड़ाई कर कारन बएन जाई। 13 तुंहुच मन सत कर बचन ला सुना, जेहर तुमन ला बचाए कर सुघर-खभेर लागे अऊ जब तुमन मसीह में बिसवास करा, त परमेसवर हर तुमन ऊपरे पबितर आतमा कर मोहर लगाईस जेकर बात जबान हमर बर करीसे। 14 जब तक परमेसवर हर अपन जन मन ला पूरा छुटकारा नई देही तब तक बर ए पबितर आतमा हर हमर जमानत लागे कि परमेसवर हर जे हक ला देहे कर बात-जबान करीस हे ओला हमके देही। एकर चलते हमरे परमेसवर कर महिमा अऊ इसतुती करबो।
पऊलूस कर पराथना
15 तेकर ले जब मंए परभू ईसू कर ऊपर तुमन कर बिसवास अऊ सब पबितर मईनसे मन बर तुमन कर मया ला सुईन के। 16 तुमन बर मंए परमेसवर ला धनबाद देहे बर नई भुलाओं अऊ अपन पराथना में तुमन कर सुरता करत रथों, 17 कि हमर परभू ईसू मसीह कर परमेसवर जेहर महिमा ले भरल दाऊ लागे, तुमन के आतमिक गियान अऊ परकासन कर आतमा दे तेमे कि तुमन परमेसवर ला अऊ जानत जईहा। 18 मंए पराथना करथों कि तुमन कर हिरदे कर आंएख हर जगमगावत रहे, तेमेकि तुमन जाएन जईहा कि ओ असरा का लागे जेकर बर परमेसवर हर तुमन के बलाईस हवे। ए असरा हर पबितर मईनसे मन बर अचमहों होए जवऊ धन कर हक लागे। 19 तुमन एहू ला जाएन ला कि हमरे जेमन बिसवास करथी ओमन बर परमेसवर कर सामरथ केतना बड़खा हवे अऊ एला ककरो संगे बरोबर नई कर सकिया। 20 परमेसवर हर एहीच सामरथ ला मसीह कर उपरे काम में लानीस कि ओके ला मरल में ले जीयाए के सरग में अपन जवनी कती बईठारीस। 21 अब ओके सब मधे कर हाकीम, अधिकारी, सामरथ रखोईया अऊ राएज करोईया अऊ एही कस कोनोच मधे कर पद ले बड़खा नांव देहीस, जेहर सिरीप एही लोक में नही बलकी अवईया लोक में लेहल जाही। 22 अऊ परमेसवर हर सब जाएत ला मसीह कर गोड़ तरी कएर देहीस अऊ ओके सब जाएत कर ऊपरे कलिसीया बर मुखिया ठहराईस 23 अऊ ए कलिसीया हर ओकर देंह लागे, अऊ ओकर भरपूरी मसीह कती ले आथे जेहर अपनेच ले सबेच चीज ला पूराथे।