ईफिसि 2

अनुगरह कर दुवारा उधार मिलथे

1 तुमन तो आगु अपराध अऊ पाप कर चलते आतमिक रूप ले मरल रहा। 2 तुमन तो पहिले ए संसार कर रीती में पाप करत जिनगी जियत रहा अऊ अगास कर आतमिक सकती कर ऊपरे राएज करोईया कर अगींया ला मानत रहा, जेहर आएज ले जेमन अगींया ला नई माने तेमन कर भितरी में काम करत हवे। 3 हमू मन आगु ओमन कस रहेन, अऊ अपन देंह कर पाप करे कर इछा अऊ जेकस अपन देंह हर मांगथे, ओकर अनुसार मन मरजी कर जिनगी जीयत रहेन। एही कस जिनगी जीए कर चलते हमू मन आने झेमन कस अपन सुभाव ले परमेसवर कर बड़खा डंड कर पवईया रहेन।

4 बकिन परमेसवर हर ढेरेच दया ले भरल हवे, अऊ अपन ढेरेच बगरा मया कर कारन जेकर चलते ओहर हमर ठे मया करीस 5 जब हमरे अपन अपराध कर चलते मरल रहेन, त हमू मन ला मसीह कर संगे जीयाईस। (परमेसवर कर अनुगरह ले तुमन कर उदधार होईस हवे) 6 ओहर हमके ला मसीह कर संगे जीयाईस अऊ सरग कर जघा में मसीह ईसू कर संगे बईठारीस 7 तेमेकी ओहर अवईया जुग कर सब लोग मन ला अपन अनुगरह कर अन ठेकानी समपती ला देखाही जेला ओहर अपन दया ले मसीह ईसू में हमर ऊपरे परगट करीस हे। 8 काबरकि परमेसवर हर अनुगरह ले बिसवास कर दुवारा तुमन कर उदधार करीस हे अऊ एहर तुमन कर अपन कती ले नई होईस हवे बलकी एहर परमेसवर कर दान लागे। 9 उदधार हर मईनसे कर अपन करम करे कर चलते नई होईसे तेमेकी कोनो मईनसे हर घमंड झईन करे। 10 काबरकि परमेसवर अपन हांथ ले हमके गढ़ीस हवे। ओहर हमके मसीह ईसू में सिरजीस हवे, तेमेकी ओ सब सुघर काम-बूता ला करत रही, जेला परमेसवर हर आगु ले तियार कएर के राखे रहीस।

हमरे सब झन मसीह में एक हन

11 एकर ले तुमन सुरता करा कि जनम ले तुमन गएर एहूदी रहा अऊ जेमन देंह में मईनसे मन कर करल खतना कर चलते अपन आप ला खतना वाला कथें अऊ ओमन तुमन ला बिगर खतना वाला कथें। 12 ओ घनी तुमन बिगर मसीह कर जियत रहा अऊ इसराईल कर बिरादरी ले अलग करल गए रहा। परमेसवर जे बात-जबान कर करार ला देहीस ओला नई जानत रहा अऊ ए दुनिया में बिगर असरा कर अऊ बिगर परमेसवर कर रहा। 13 बकिन अब तुमन मसीह ईसू में मेराए गए हवा। एक समय तुमन परमेसवर ले दुरीहां रहा, अब मसीह कर लहू कर जरिये ढेरेच ठांवें होए गए हा।

14 काबरकि हमर मेल-जोल करोईया ओही हर लागे। एहूदी अऊ गएर एहूदी मन कर मझारे दुसमनी कर हता रहीस तेला ओहर ओदाएर देहीस अऊ दुनो मन ला आपस में मेराए देहीस। 15 ओहर अपन देंह ला कुरूस में चघाए के समुचा कानहूंन कर अगींया अऊ विधी ला मेटाए देहीस तेमे कि दुनो दल ला जेमन मसीह में मेराए गईन हवें, ओमन में ले एगोट नांवा मईनसे सिरजीस अऊ ओमन के आपस में मेल-जोल कराए देहीस। 16 अऊ कुरूस ऊपर अपन मीरतू कर दुवारा ओमन कर बएर ला नास करीस, अऊ एकरे जरिये दुनो मन ला एक देंह बनाए के परमेसवर जग मेल करुवाए देहीस। 17 मसीह हर आए के, तुमन ला जेमन दुरीहां रहा अऊ ओहू मन ला जेमन ठांवे रहीन, दुनों मन ला मेल-जोल करोईया सुघर-खभेर सुनाईस। 18 काबरकि ओकरेच दुवारा एके ठे पबितर आतमा कर जरिये दाऊ ठन हमन दुनों पहुंच सकत हन। 19 तेकर ले तुमन जेमन गएर एहूदी लागा अब परदेसी ना लागा, अऊ डेड़हारो ना लागा। बलकी पबितर मन कर संगी सवदेसी अऊ परमेसवर कर परिवार कर होए गए हवा। 20 तुमन एकस घर हवा जेमन परेरीत अऊ अगमजानी मन कर नेंव कर ऊपरे बनाए गए हवा अऊ ओ घर कर सबले खास पखना ईसू मसीह हर खुद लागे। 21 जेहर सब घर ला एक संगे जोड़थे अऊ परभू में एगोट पबितर मंदिर बनत जात हवे। 22 जेमे तुंहूच मन पवितर आतमा कर दुवारा परमेसवर कर रहे कर जगहा होए बर एक संगे बनावल जात हवा।