ईफिसि 3

परमेसवर कर बड़खा योजना

1 मंए पऊलूस, एही सब कर चलते तुमन गएर एहूदी मन बर परभू ईसू मसीह कर कएदी हवों। 2 परमेसवर हर अनुगरह कर जे सुघर खभेर ला तुंहर भलाई बर मोके सोंपीस हवे, ओकर बारे में तुमन फूरोंच में सुने हवा। 3 कि परमेसवर खुदेच ओ योजना कर भेद ला परकासन दुवारा मोके बताईस जेला मंए आगुवेच ले भावे-भाव लिख दारे हों। 4 तुमन एला पढ़िहा त खुद समझ जईहा कि मसीह कर ओ भेद कर बारे में मोर गियान केतना हवे। 5 परमेसवर हर पाछू कर पीढ़ी कर मईनसे मन ला एला नई बताईस बलकी अब पबितर आतमा कर जरिये अपन पबितर परेरीत अऊ अगमजानी मन कर ऊपरे एला परगट करीस। 6 परमेसवर कर योजना ए हवे कि सुघर खभेर में बिसवास करे कर दुवारा गएर एहूदी मन एहूदी मन कर संगे हकदार होए जाएं। ओमन दुनों एकेच देंह कर अंग लागें अऊ मसीह ईसू में बात-जबान कर हीसादार लागें।

7 मंए परमेसवर कर अनुगरह कर अनुसार ओ सुघर-खभेर कर सेवक बने हों, जेहर परमेसवर कर सामरथ ले मोके मिलीसे। 8 मंए सबेच पबितर मईनसे मन ले सबले छोटे हों, तबोले परमेसवर मोर ऊपरे अनुगरह करीस हवे कि मंए गएर एहूदी मन ला मसीह कर अन ठेकानी धन कर सुघर खभेर कर परचार करों 9 अऊ सब झेला परमेसवर कर योजना कर भेद ला फरी-फरी बताओं। परमेसवर जेहर संसार कर गढ़ोईया लागे ओहर धरती अगास बने कर आगु ले ओ भेद ला लूकाए के राखे रहीस। 10 तेमेकि अब कलिसीया कर दुवारा परमेसवर कर किसीम-किसीम कर गियान ला ओ सब सासन करोईया मन अऊ अधिकारी मन ला बताल जाए, जेमन सरग कर जघा में हवें। 11 एहर परमेसवर कर अमर काल कर योजना कर अनुसार होईस जेला ओहर परभू ईसू मसीह कर दुवारा पूरा करीस। 12 मसीह में हमर संगती अऊ मसीह में हमर बिसवास कर दुवारा बिगर डराए के अऊ भरोसा कर संगे परमेसवर कर आगु में आए सकत हन। 13 तेकर ले मंए तुमन ठे बिनती करथों कि जे दुख ला मंए तुमन कर चलते भोगत हों, ओला देख के तुमन अपन हिमेत ला झईन हारीहा; काबरकि एही दुख हर तुमन कर महिमा लागे।

मया में बढे बर पराथना

14 एकरे चाड़हे मंए तो सरग कर दाऊ कर आगु में ठेहुनाथों 15 जेकर दुवारा सरग अऊ धरती कर सबेच बंस मन कर नांव ला धरल जाथे। 16 मंए पराथना करत हों कि परमेसवर हर अपन महिमा कर धन ले अपन आतमा कर दुवारा तुमन के सामरथ देही तेमेकि तुमन कर भितरी मईनसे हर बजर होए जाही। 17 तेमे कि बिसवास कर जरिये मसीह तुमन कर हिरदे में बसे अऊ तुमन परमेसवर कर मया में जएर धरत अऊ बढ़त जईहा। 18 मंए पराथना करथों कि सब पबितर मईनसे मन कर संगे बढ़िहां ले समझ सका कि मसीह कर मया हर केतना चाकर, केतना लमा, केतना रोंट अऊ केतना गहील हवे। 19 तुमन मसीह कर ओ मया ला जाएन लेआ जेला तुमन अपन सब मधे कर गियान ले समझे बर नई सखीहा, तेमेकी तुमन परमेसवर कर सबेच भरपूरी ले भएर जावा। 20 अब ओ परमेसवर कर महिमा होवत रहे जेहर अईसन सामरथी हवे कि हमरे जेतना मांगथन अऊ सोचथन ओकर ले बगरा कएर सकथे, ए सब हर ओकर सामरथ कर अनुसार होथे जेहर हमर भीतरी में काम करथे। 21 कलिसीया में अऊ मसीह ईसू में ओकर महिमा पीढ़ी दर पीढ़ी अऊ जुग-जुग होवत रहे।