कुलूसी 1

कुलूसी सहर कर कलिसीया बर

परेरीत पऊलूस कर लिखल चिठी

जोहार

1 मंए पऊलूस, जेहर परमेसवर कर ईछा ले मसीह ईसू कर परेरीत लागों, मोर कती ले अऊ हमर भाई तीमूथीयूस कती ले कुलूसी सहर कर भाई-बहिन मन बर, हमरे ए चिठी ला लिखत हवन जेमन पूरा मन ले मसीह कर ऊपरे बिसवास करोईया अऊ पबितर मईनसे लागें। 2 हमर दाऊ परमेसवर कती ले, तुमन के अनुगरह अऊ सांती मीलत रहे।

पऊलूस कर पराथना

3 हमरे तुमन बर हमेसा पराथना कएर के, अपन परभू ईसू मसीह कर दाऊ परमेसवर कर धनबाद करथी। 4 काबर कि हमन सुने हवन, कि मसीह ईसू कर ऊपरे तुमन कर बिसवास हवे अऊ तुमन परमेसवर कर सब पवितर मईनसे मन जग मया करथा। 5 ए सुघर खभेर जेहर सत बचन लागे जब ओहर तुमन जग पहुंचीस, त तुमन ओ असरा कर बारे में सुना जेला ओ सुघर खभेर हर लानथे। एकरले तुमन कर बिसवास अऊ मया हर तुमन जेकर असरा करथा ओमे टिकीस हवे, अऊ ओहर सरग में राखल हवे 6 ओ सुघर खभेर हर तुमन जग पहुंचीस हवे ओहर दुनिया में बढ़त जाथे। एहर ओइसने फर लानथे जेकस तुमन कर मझारे ओहीच घरी ले फल लानत रहीस जे दिन ले तुमन ओ सुघर खभेर कर बारे में सुना अऊ परमेसवर कर अनुगरह कर बारे में समझा। 7 तुमन ए सुघर खभेर ला मोर संगे, सेवा करोईया संगता इपफरास जग ले पाए हवा, जेहर हमर कती ले मसीह कर बिसवास लाईक सेवक हवे। 8 ओहर तुमन कर मया जेला पबितर आतमा हर देहिस हवे, ओकर बारे में हमके ला बताईसे।

आतमिक जिनगी में बढेबर पराथना

9 एकर बर जे दीन ले हमरे तुमन कर बारे में एला सुने हवन, ओ दिन ले हमरे तुमन बर पराथना अऊ बिनती परमेसवर जग करतेच ही कि, तुमन सबेच आतमिक बुदधी अऊ समझ कर संगे परमेसवर कर ईछा ला चीन जावा। 10 तेमेकी तुमन कर चाल-चलन हर परभू कर लाईक होए जाए अऊ सब कती ले तुमन परभू ला हमेसा खूस करा अऊ तुमन में सबेच सुघर काम कर फर फएर के तुमन परमेसवर कर चिनहारी में बढ़त जावा। 11 अऊ ओकर महिमा कर सकती कर अनुसार, सबेच सामरथ ले बजर होवत जावा, तेमेकी तुमन में खुसी कर संगे सब मधे कर धीरज अऊ सहन सकती देखाए सका। 12 अऊ दाऊ परमेसवर कर धनबाद करते रहा, जेहर हमन के एकर लाईक बनाईसे, कि तुमन इंजोर कर राएज में, पबितर लोग मन कर संगे हकदार होए जावा। 13 ओही परमेसवर हर हमन के, अंधार कर सकती ले छोंड़ाए के, अपन दुलरुवा बेटा कर राएज में लानीस। 14 ओ दुलरुवा बेटा कर चलते हमके ला पाप ले छूटकारा, मने कि पाप कर छमा मिलथे।

मसीह कर महानता

15 ओही मसीह हर परमेसवर कर सही रूप हवे जेला कोनो नई देख सके; ओहर जमो सिरजे ले महान हवे। 16 काबर कि ओकरे दुवारा सब जाएत हर बनाल गईसे, ओ सब जाएत जेहर सरग में चाहे धरती में हवे, देखल चाहे बिगर देखल चीज, सिंहासन चाहे राएज, सासन करोईया चाहे अधिकारी, सबेच जाएत हर ओकरे दुवारा बनावल गईसे अऊ ओकरेच बर बनावल गईसे। 17 ओही हर सब जाएत ला बनाए कर आगु रहीस अऊ ओही में सब जाएत हर टिके रथे। 18 मसीह हर कलीसीया कर मुड़ी लागे अऊ कलीसिया हर ओकर देंह लागे, ओहीच हर पहिलो लागे अऊ मरल में ले आगु जी उठईया ओहीच हर लागे, तेमेकी सबेच बात में ओहर मूखीया ठहरे। 19 काबर कि परमेसवर के एही हर बढ़िहां लागीस, कि अपन सबेच सुभाव हर ओकर में रहे। 20 परमेसवर हर मसीह कर कुरूस में बहावल लहू कर चलते, अपन सांती ला देके, सबेच जाएत ला, चाहे ओहर सरग कर रहे, चाहे धरती कर, मसीह कर चलते अपन संगे मेल-मिलाप कएर लेहीस।

21 एक समय रहीस, जेघनी तुमन परमेसवर ले ढेरेच दुरिहां होए गए रहा। तुमन अपन गलत सोंच अऊ काम कर चलते, ओकर बएरी होए गए रहा। 22 तबो ले मसीह हर अपन देंह कर मिरतू कर चलते तुमन कर संगे मेल- मिलाप कएर लेहीस, तेमेकी ओहर तुमन के अपन आगु में पबितर, बेकसूर अऊ निरदोस बनाए के ओकर आगु में ठडुवाए देही 23 एहर तब होही जब तुमन अपन बिसवास में माढ़े रईहा अऊ अटल बने रईहा अऊ जे आसरा तुमन के सुनल सुघर खभेर ले मिलथे, ओला झईन छोड़ीहा। ओ सुघर खभेर कर परचार अगास कर खालहे, सबेच दुनिया में करल गईसे अऊ मंए पऊलूस ओकर सेवक बने हों।

पऊलुस कलीसिया कर सेवा करथे

24 जे दूख मंए तुमन बर उठाथों, अब मंए ओही दूख में खूसी मनाथों अऊ कलिसीया जेहर मसीह कर देंह लागे ओकर बर जे दूख ला मसीह हर सहीस ओमे सामिल होए के ओला मंए अपन देंह में पूरा करथों। 25 परमेसवर कर देहल जिमा कर अनुसार मंए ए कलीसीया कर सेवक बने हवों, तेमेकी मंए परमेसवर कर बचन ला पूरा-पूरा तुमन के बताए सकों। 26 एहर ओ भेद लागे, जेला ओहर जूग-जूग अऊ पीढ़ी- पीढ़ी ले लूकाए के राखे रहीस, बकीन अब एला परमेसवर हर अपन पबितर मईनसे मन कर ऊपरे परगट करीसे। 27 ओमन ठे परमेसवर हर एला देखाए बर चाहत रहीस कि ओ भेद कर महिमा कर कीमत गएर एहूदी मन कर मझारे हवे अऊ ओ भेद एहर लागे कि मसीह तुमन में रथे अऊ परमेस्वर कर महिमा पाए बर ओही हर हमर एगोट असरा हवे। 28 हमरे सबेच गियान कर संगे सब झन के चेताके अऊ सीखाए के मसीह कस परचार करथन; तेमेकी हमरे सब झन ला मसीह में सिद्ध बनाए सकी। 29 ए उदेस बर मंए जीव जहान लगाए के, मसीह कर सामरथ कर अनुसार ढेरेच मेहनत करथों अऊ ओ सामरथ हर मोर भितरी काम करथे।