परभू कर दुबारा अवाई बर तियार रईहा
5
1 ए भाई बहिन मन,
कब ओ जुआर अऊ दिन हर आही,
ओकर बारे में लिखे कर जरूरत नईए।
2 काबरकि तुमन बढ़िहां ले जानथा कि जेकस चोर हर राती आथे,
ओही कस परभू कर दिन हर आही।
3 जे घनी मईनसे मन कहत होहीं कि,
“सांती हवे अऊ सब नगदे-नगद हवें” ओही घनी ओमन कर ऊपरे अचाकन बिनास आए जाही जेकस आसापती सवांगीन कर उपरे अचाकन दुख आथे अऊ ओमन नई बांचहीं।
4 बकिन ए भाई बहिन मन,
तुमन तो अंधार में नई हवा कि परभू कर दिन हर तुमन कर जिनगी में चोर कस आए जाही अऊ तुमन अचमहों झईन होईहा।
5 काबरकि तुमन तो सब झन इंजोर कर लईका अऊ दिन कर लईका हवा,
हमरे राती कर लईका अऊ अंधार कर लईका ना लागी।
6 एकरे ले हमरे आने झन कस सूतत नई रही,
बकिन जागत अऊ सवाचेती रही।
7 काबरकि जेमन सूतथें ओमन रातीए सूतथें अऊ जेमन मतवार होथें,
ओमन रातीए पीके मतवार होथें।
8 बकिन हमरे तो दिन कर हवन,
एकर ले हमरे सवाचेती रहबो। हमरे छाती कर कवच कर रूप में बिसवास अऊ मया ला पहिर लेबो,
अऊ टोपी कर रूप में उदधार कर असरा ला पहिर लेबो।
9 काबरकि परमेसवर हर हमके डंड भोगे बर नई चुनीसे,
बलकी हमर परभू ईसू मसीह कर जरिये उदधार ला पाए बर हमके चुनीस हे।
10 ईसू हर हमर बरीक मरीस हवे तेमेकि हमरे चाहे जीयत रही चाहे मरे रही,
जब ओ आही त हमरे ओकर संगे हमेसा रहबो।
11 एकर ले एक-दूसर झन ला उतसाहित करा अऊ एक दूसर ला आगु बड़हे में मदेत करा,
जेकस कि तुमन अझेर करत हवा।
ए चिठी कर आखरी उपदेस
12 ए भाई बहिन मन,
जेमन परभू बरीक मेहनत करथें अऊ परभू में कईसे जिनगी जीये बर हवे,
ओला तुमन के सीखाथें,
ओमन कर माएन-मरजाद करा।
13 ओमन बढ़िहां काम करथें एकरले मया कर संगे ओमन कर ढेरेच आदर करा अऊ आपस में मिल जुईल के रहा।
14 ए भाई-बहिन मन,
हमरे तुमन के समझाथी कि कोड़िहा मन ला चेतावा,
डरपोकवा मन ला हिमेत देआ,
लोरभोसवा मन कर मदेत करा,
सब झन बर सहंतरा देखावा।
15 ए बात कर धियान देआ कि कोनो बुराई कर पलटा बुराई झईन करें,
बकिन हमेसा एक-दूसर बर अऊ सब मईनसे मन बर भलाई करे कर कोसिस करें।
16 हमेसा खुस रहा।
17 हमेसा पराथना करतेच रहा।
18 सबेच हालत में परमेसवर कर धनबाद करा,
काबरकि जेमन परभू ईसू मसीह कर अपन हवें ओमन बर परमेसवर कर एही इछा हवे।
19 पबितर आतमा ला हमर जिनगी में काम करे ले झईन रोका।
20 अगमबानी मन ला अनभनिया झईन समझा।
21 बकिन सबेच बात मन ला तजबीज लेआ अऊ जेहर बढ़िहां हवे,
ओला धईर लेआ।
22 सबेच मधे कर बुराई ले बांचे रहा।
ए चिठी कर आखरी जोहार
23 अब सांती देवईया परमेसवर हर,
खुद तुमन ला समुचा पबितर करे अऊ तुमन कर देंह,
परान अऊ आतमा हर,
हमर परभू ईसू मसीह कर आए जुआर ले बिगर कसूर कर रहे बर हमर मदेत करे।
24 परमेसवर हर तुमन के बलाईस हवे ओहर भरोसा कर लाईक हवे अऊ ओहर एहीच कस करही।