बिसवास ले परमेसवर फुरमा होथे
3
1 ए भोंदुवा गलाती मन! कोन तुमन ला मोह लेहीस हवे? ईसू मसीह के कुरूस में चघाल गईस ओकर पूरा मतलब ला तुमन के तो फरी-फरी बताल गईस हवे। 2 मंए तुमन जग ले बस एतनेच जाने बर चाहत हों, कि तुमन पबितर आतमा ला का मूसा कर कानहूंन ले पाए रहा, अखीर बिसवास कर सुघर खभेर ले पाए रहा? 3 का तुमन अईसन भोंदुवा होए गए हवा, कि जे जिनगी ला तुमन पबितर आतमा कती ले ओर करे हवा, ओला अब अपन जांगर ले खतम करीहा? 4 तुमन एतेक दुख ला का अनभनिया भोगे हवा? ओहर तो कभों अनभनिया नईए। 5 परमेसवर तुमन ला पबितर आतमा देथे अऊ तुमन कर मझारे सामरथ कर काम करथे, का ओहर मूसा कर कानहूंन कर विधी ला मानथा तेकरले अईसना करथे? आखिर जे सुघर खभेर ला तुमन सुने हवा अऊ ओमे बिसवास करे हवा तेकरले अईसना करथे का?6 परमेसवर किताब मे एही कस लिखल हवे कि अबराहम हर परमेसवर कर ऊपरे बिसवास करीस तेकर चलते परमेसवर हर ओके निरदोस ठेहराईस। 7 त एला जाएन लेआ कि जेहर बिसवास करथे, ओही मन अबराहम कर सचा बंस लागें। 8 पबितर किताब में आगुवेच ले बताल रहीस कि परमेसवर हर गएर एहूदी मन ला बिसवास कर दुवारा निरदोस ठहराही। आगुवेच ले अबराहम के परमेसवर हर, ए सुघर खभेर ला सुनाए देहे रहीस कि “तोर चलते सबेच जाति कर लोग मन आसीस पाहीं।”a 9 एकर बर जेमन बिसवास करथें, ओमन बिसवास करोईया अबराहम कर संगे आसीस पाथें।
10 एकरले जेतना झेमन मूसा कर कानहूंन कर ऊपरे भरोसा रखथें, ओ सबेच झेमन सराप कर कबजा में हवें, काबरकि लिखल हवे कि “जे कोनो मूसा कर कानहूंन कर किताब में लिखल, सबेच बात ला मन लगाए के पालन नई करही, त ओकर ऊपर सराप परही।” 11 बकीन ए बात हर तो एकदम फरी हवे, कि कानहूंन कर जरिये परमेसवर कर नजेर में कोनो निरदोस नई ठहरहीं, काबरकि परमेसवर ला फुरमा करोईया मन बिसवास ले जीयत रहीं।
12 बकिन कानहूंन ला माने बर बिसवास कर जरूरत नईए, काबरकि जे कोनो हर कानहूंन कर पालन करही ओकर चलते ओहर जीयत रही। 13 मसीह हर खुद हमर सराप ला लेके, हमके ला मूसा कर कानहूंन कर सराप ले दाम देके छोंड़ाए लेहीस। काबरकि लिखल हवे “जे कोनो ला कठवा कर ऊपरे ठोंएक के टांगल जाथे, ओहर सरापीत हवे।” 14 एहर एकर बर होईस कि अबराहम कर आसीस, मसीह ईसू कर दुवारा गएर एहूदी मन जग पहुंचे, तेमेकी बिसवास कर जरिये हमरे ओ पबितर आतमा ला पाबो जेकर बात-जबान करल गईस हवे।
अबराहम कर बंस बर बात जबान
15 ए भाई-बहिन मन, मंए मईनसे मन कर चाल सहूर ले एगोट उदाहरन बताथों, कि जब मईनसे मन कर कोनो करार हर पकका होए जाथे, त कोनो ओला नई टाएल सके अऊ कोनो ओमे कांही बड़हाए नई सके। 16 ओही कस जे बात-जबान अबराहम अऊ ओकर बंस कर बेटा ला देहल गईस हवे, ओला कोनो नई टाएल सके अऊ कोनो ओमे कांही बड़हाए नई सके। पबितर किताब हर एला नई कहे कि, “संतान मन ला” जेकस कि ढेरेच झन कर बारे में कथे, बकिन एकेच झन कर बारे में कहीस हवे “संतान ला” अऊ ओही हर मसीह लागे। 17 मोर कहे कर मतलब ए हवे, कि जे करार ला परमेसवर हर आगुवेच ले पका कएर देहीस हवे, ओ करार कर चाएर सव तीस बछर कर पाछू, परमेसवर हर मूसा के कानहूंन देहीस, अऊ ए कानहूंन हर परमेसवर कर बात-जबान ला टारे नई सके, कि ओकर बात-जबान हर अनभनिया होए जाए। 18 काबरकि अगर हक हर मूसा कर कानहूंन ले मिलीस हवे, त बात-जबान ले नई मिल सके। बकिन अबराहम ला परमेसवर हर ए हक ला बात-जबान कर जरिये सेथिया देहे रहीस।
19 त फेर मूसा कर कानहूंन ला काबर देहल गईस हे? ओला तो पाप कर कारन पाछू देहे रहीस तेमेकि जे बंस कर बेटा बर बात-जबान देहे रहीस, ओकर आवत ले ओ कानहूंन हर बनल रहे। ओ कानहूंन हर सरग दूत कर जरिये एगोट अगुवा-मझुवा ठे ठहराल गईस। 20 अगुवा-मझुवा तो दुई झन कर मझारे होथे, बलकी परमेसवर तो एकेच ठनहवे।
21 त का मूसा कर कानहूंन हर परमेसवर कर बात-जबान कर बिरोध करथे? कभों नई! काबरकि अगर अईसन कानहूंन देहे रतीस, जेहर जिनगी दे सकतीस, त सहीच में ओ कानहूंन ले परमेसवर ला फुरमा कएर सकत हवे। 22 बकिन पबितर किताब हर एला बताईस हवे, कि सबेच झन मन पाप कर कबजा में हवें, तेमेकि ओ बात-जबान हर ईसू मसीह में बिसवास करे ले हमके मिलथे। 23 अऊ ए बिसवास कर आए कर आगुवेच ले मूसा कर कानहूंन हर हमर देख-रेख करत रहीस, अऊ ओ बिसवास जेहर परगट होए बर रहीस, ओकर आवत ले हमरे कानहूंन कर कबजा में रहेन। 24 एकर बर मूसा कर कानहूंन हर मसीह ठन पहुंचाए बर, हमर देख-रेख करोईया बनीस, तेमेकि हमरे बिसवास ले निरदोस ठहरी। 25 बकिन जब ए बिसवास आए गईस, त अब हमरे ए देख-रेख करोईया कर कबजा में नई हवन।
परमेसवर कर लईका-छऊआ मन
26 काबरकि मसीह ईसू में बिसवास कर जरिये तुमन सबेच झन परमेसवर कर लईका-छऊआ हवा। 27 अऊ तुमन में ले जेतना झन मसीह में बतीसमा लेहीन हे, ओमन मसीह ला पहिर लेहीन हवें, माने कि मसीह कर सुभाव ला अपनाए लेहीन हवें। 28 अब कोनो एहूदी नईए अऊ गएर एहूदी नईए, कोनो गुलाम नईए अऊ अजाद नईए, कोनो सवांग नईए अऊ सवांगीन नईए, काबरकि तुमन सबेच झन मसीह ईसू में एक हवा। 29 अऊ अगर तुमन मसीह कर हवा, त अबराहम कर संतान अऊ बात-जबान कर हकदार भी लागा।