ईसू कर खास चेला मन कर काम कर बखान
ए किताब कर बारे में दम अकन गोएठ
ए किताब ला बईध लूका हर अपन संगता थियुफिलूस बरीक लिखीस। ए किताब हर नांवा करार कर एतिहासिक किताब हवे। ईसू मसीह कर सरग जवाई कर पाछू ओकर चेला मन ला का-का होईस अऊ ओमन कर जिनगी हर कईसे बदलीस, एकर बारे में ए किताब हर परगट करथे। ईसू कर सरग जाए कर पाछू चेला मन ला लागीस कि हमरे अकेला होए गएन। ओमन डर अऊ निरासा में पईर गईन अऊ सोंचत रहीन कि अब ओमन कर अगुवाई कोन करही। बकीन परमेसवर हर अपन जबान कर अनुसार पबितर आतमा ला भेजीस। ओहर डरात रहीन तेमन कर जिनगी ला हिमेत ले भरीस। ओकर सामरथ अऊ अगुवाई ले चेला मन अपन सेवकाई कर ओर करीन; चिनह चमतकार अऊ अचमहों कर काम कर दुवारा परभू अपन बचन ला बजर करत रहीस।
चेला मन सोंचत रहीन कि सुघर-खभेर हर सिरीप एहूदी मन बर लागे, गएर एहूदी मन बर ना लागे। ए किताब में पवितर आतमा हर ए परगट करीस कि परमेसवर ककरो मूंह देखी नई करे ओ सुघर-खभेर ला अपन खास चेला मन कर दुवारा गएर एहूदी मन जग पहुंचाईस। ए किताब में पऊलूस कर बारे में देखथन जेहर आगु मसीही मन कर विरोधी रहीस अऊ परमेसवर हर ओकर मन ला बदलीस। तेकर ओहर परभू कर खास चेला बएन के गएर एहूदी मन बर इंजोर बनीस अऊ ओमन जग सुघर-खभेर सुनाईस। ओहर तीन दाएर सेवकाई बरीक पानी जहाज में ढेरे तान गईस अऊ ओकर जरिये ढेरेच मसीह मंडली कर सुरुवात होईस।
ए किताब ला पढ़े ले निरासा, डर अऊ अकेलापन में परल मईनसे मन ला असरा अऊ हिमेत देवईया एगोट बढ़िहां संगता कर चिनहारी जरूर मिलही। ओहर पबितर आतमा लागे। ओकर अगुवाई ले चलोईया मन कर जिनगी हर आसीस ले भएर जाही। एकर ले ए किताब ला मन लगाए के पएढ़ लेआ।
ए खास चेला मन कर काम हर खालहे लिखल भाग में बांटल हे
एरुसलेम सहर में सुघर-खभेर ला बताथे 1:1-8
एहूदिया अऊ सामरीया में सुघर-खभेर ला बताथे 8:4-12:25
सुघर-खभेर सुनाए बर पऊलूस कर पहिलो सफर 13:1-14:28
एरुसलेम सहर में खास चेला मन ठान लेते 15:1-35
सुघर-खभेर सुनाए बर पऊलूस कर दूसर सफर 15:36-18:22
सुघर-खभेर सुनाए बर पऊलूस कर तीसर सफर 18:23-21:16
पऊलूस ला एरुसलेम में धरुवाथे 21:17-23:22
पऊलूस हर कएसरीया सहर में जाथे 23:23-26:32
पऊलूस ला रोम देस में ले जाथे 27:1-28:31