आने परेरित मन पऊलूस कर मरजाद करथें
2
1 मंए चऊदा बछर कर पाछू, बरनबास कर संगे फेर ले एरुसलेम सहर में गएन अऊ तीतुस ला भी अपन संगे लेते गएन। 2 मोके परभू कर परकासन मिलीस तेकरले मंए उहां गयें; अऊ जे सुघर खभेर ला मंए गएर एहूदी मन जग परचार करथों, ओही ला मंए ओमन के बताए देहें, बकिन येरुसलेम कलीसिया कर मुखिया मन ला एके झे में बताए देहें। तेमेकि मोर ए घनी कर आखिर पाछू घनी कर कुदा धांवा हर अनभनिया झईन होए जाए। 3 अऊ ओमन मोर बात ला माएन लेहीन तेकर ले तीतुस भाई ला भी जेहर मोर संगे संगे रहीस अऊ ओहर युनानी लागे, तबोले ओके ला खतना करुवाए बर जिधाई नई करीन। 4 ए सब बात हर ओ ठगलबरा भाई मन कर कारन उठीस हवे, जेमन मसीह ईसू में जे अजादी हर हमके मिलीसे ओकर भेद लेहे बर हमर मझारे कले कस मेराए गए रहीन; तेमेकि हमके गुलाम बनाए सकें। 5 बकिन हमरे तो एको घरी ओमन कर कबजा में नई रहेन, काबरकि सुघर खभेर कर सचाई हर तुमन में बनल रहे।6 बकीन येरुसलेम कलिसीया कर मुखिया मन मोर परचार कर बारे में काही नई कहीन, (ओमन चाहे कईसनोच रहीन, मोके ओमन ले कांही मतलब नईए काबरकि परमेसवर हर ककरो मुंह-देखी नई करे) 7 बलकी ओमन देखीन कि जेकस एहूदी मन ला सुघर खभेर सुनाए बर पतरस के सोंपल गईस हे, ओईसनेच गएर एहूदी मन ला सुघर खभेर सुनाए बर परभू हर मंहू के सोंपीस हवे। 8 (काबरकि जे परमेसवर हर पतरस ला खतना करल एहूदी मन बर परेरित कर रूप में काम करे कर सकती देहीस, ओही हर मंहूच के गएर एहूदी मन बर परेरित कर रूप में काम करे कर सकती देहीस) 9 अऊ जब आकूब, पतरस अऊ एहूना जेमन कलिसीया कर खुंटा मानल जात रहीन, ओ अनुगरह ला जाएन गईन जेहर मोके मिले रहीस, त ओमन मोके अऊ बरनबास भाई के अपन संगे राखीन, कि हमरे गएर एहूदी मन जग काम करबो अऊ ओमन एहूदी मन कर मझारे काम करहीं। 10 ओमन एतनेच कहीन कि गरीब मन ला झईन भुलईहा अऊ एहीच बूता ला करे बर मंए खुदेच उतसुक रहें।
पऊलूस पतरस ला डांटीस
11 बकिन जब पतरस हर अंताकिया सहर में आईस, त मंए खुल के ओकर सामना करें, काबरकि ओहर गलती करे रहीस। 12 एकरले जब पतरस हर पहिलो दाएर आईस, त गएर एहूदी मन कर संगे खात पीयत रहीस। बकीन जब आकूब कर इहां ले तनिक झेमन आईन, त एहूदी मन ले डराए के पतरस हर पाछू घुचे लागीस अऊ ओमन जग ले अलगे होए लागीस, काबरकि ओमन कहत रहीन कि सबेच बिसवासी मन ला, खतना करुवाए बर जरूरी हवे। 13 ओकर संगे संगे आने एहूदी मन ए कपट में पतरस कर साथ देहीन अऊ इहां तक कि बरनबास भाई हर भी ओमन कर कपट में पईर गईस। 14 जब मंए देखें कि ओमन सुघर खभेर कर सचाई कर अनुसार नई चलत हें, त मंए सब झे कर आगु में पतरस ला कहें कि “जब तंए एहूदी होए के भी गएर एहूदी मन कस जिनगी जीयत हस त फेर गएर एहूदी मन ला एहूदी मन कस चले बर तंए जोर जबरजसती काबर करथस?”
बिसवास करे ले उदधार मिलथे
15 हमरे तो जनम ले एहूदी हवन; अऊ पापी गएर एहूदी मन ले नई हन। 16 तबो ले हमन एला जानथन कि मूसा कर कानहूंन कर विधी ला पालन करे ले कोनो हर निरदोस नई होए सके, बलकी केवल मसीह ईसू कर ऊपरे बिसवास करे ले निरदोस होए सकत हवे। हमू मन निरदोस होए बर खुद मसीह में बिसवास करे हवन, बकीन कानहूंन कर विधी ले नहीं; काबरकि कानहूंन कर विधी ले ककरो जीव हर निरदोस नई होए सकही। 17 अगर हमरे मसीह कर ऊपरे बिसवास कएर के निरदोस ठहरे बर चाहत हवन, अऊ हमरे खुदेच पापी कहाबो त, का मसीह हर पाप कर बढ़ोईया हवे? कभों नहीं। 18 जेला मंए एक दाएर छोंएड़ दारे हों अगर मंए ओला फिरेच अपनाहुं त मंए खुदेच अपन आप ला अपराधी ठहराथों। 19 काबरकि मंए तो मूसा कर कानहूंन कर पालन करे कर कोसिस करत रहें, त मोके समझ में आईस कि एकर पालन करे ले मंए परमेसवर कर नजेर में निरदोस नई ठहेर सकों, बकिन ओही कानहूंन कर अधीन ले मंए निकेल आएं, तेमेकी मंए परमेसवर बरीक जीयत रहों।
20 मंए मसीह कर संगे कुरूस कर ऊपरे चघाल गए हों, अब मंए नई जियत हों, बकीन मोर में मसीह जियत हे; अऊ मंए जेहर अझेर देंह में जीयत हों, त खाली ओ बिसवास ले जीयत हों, जे बिसवास हर परमेसवर कर बेटा ऊपरे हवे; जेहर मोर ठन मया करीस अऊ मोर बर अपने आप ला दे देहीस। 21 मंए परमेसवर कर अनुगरह ला अनभनिया नई ठहराओं; काबरकि अगर कानहूंन कर जरिये परमेसवर कर संगे मेल मिलाप होतीस त मसीह हर अनभनिया मरीस।