गलाती 1

गलाती इलाका कर कलिसीया बर

परेरीत पऊलूस कर लिखल चिठी

पऊलूस कर जोहार

1 मंए परेरीत पऊलूस, कोनो मईनसे मन कर जरिये न तो ककरो अधिकार ले ठहराल नई गए हों, बकिन ईसू मसीह अऊ दाऊ परमेसवर कर जरिये जेहर ईसू ला मरल में ले जीयाईस, ओमन कती ले मंए परेरीत ठहराल गए हों। 2 सबेच भाई मन कती ले जेमन मोर संगे हवें गलातिया इलाका कर कलिसीया मन बर ए चिठी ला लिखत हों।

3 दाऊ परमेसवर अऊ परभू ईसू मसीह कती ले तुमन के अनुगरह अऊ सांती मिलत रहे

4 जे संसार में हमरे जीयत हन ओहर एगोट बुरा संसार हवे अऊ ओमे ले हमके ला छोंड़ाए बर हमर दाऊ परमेसवर कर इछा कर अनुसार ईसू हर हमर पाप बरीक अपन जीव ला दे देहीस। 5 ओ परमेसवर कर इसतुती अऊ बड़ाई जुग-जुग होवत रहे। आमीन।

एकेच ठन सुघर खभेर हे

6 मोके अचमहों होथे कि परमेसवर जग ले तुमन एतेक हालू मूकेर गया जेहर तुमन के मसीह कर अनुगरह में बलाईस हे। तुमन अलगेच किसीम कर सुघर खभेर ला सुईन के ओकरेच कती चले लागे हवा। 7 बलकी अऊ दूसर किसीम कर सुघर खभेर तो हलेच नईए, बकिन एकर ले मंए ए गोएठ ला तुमन के बताथों कि कोनो मन एकस हवें जेमन तुमन के भरमुवाए देहत हे अऊ मसीह कर सुघर खभेर ला बिगाड़े बर चाहत हें। 8 अगर हमू मन आखिर सरग ले कोनो दूत हर भी आए के जे सुघर खभेर ला हमरे तुमन के सुनाए हवन, एला छोंएड़ के कोनो दूसर मधे कर सुघर खभेर ला सुनाही, त परमेसवर ओके सराप देही। 9 जईसने हमरे आगुवेच ले कहे दारे हन अऊ ओईसनेच अझरो ले फिर कहत हों कि अगर कोनो हर जे सुघर खभेर ला तुमन अपनाए हवा, ओला छोंएड़ के दूसरे मधे कर सुघर खभेर सुनाथे, त परमेसवर ओके सराप देही।

10 का मंए अब मईनसे मन ला मनाथों कि परमेसवर ला? अगर मंए मईनसे मन ला फुरमा करोईया रहतें, त अझेर तक मसीह कर दास नई होतें।

पऊलूस कईसे सुघर खभेर पाईस

11 ए भाई बहिन मन, मंए बताथों कि जे सुघर खभेर ला तुमन जग मंए परचार करे हों, ओहर कोनो मईनसे कर बुधी ले ना लागे। 12 काबरकि ए सुघर खभेर हर मोके कोनो मईनसे कती ले नई मिलीस हे, अऊ कोनो हर नई सिखाईस हवे, बलकी एकर परकासन हर ईसू मसीह कती ले मोके मिलीस हवे।

13 मोर आगु कर चाल-सहूर कर बारे में तुमन सुईन दारे हा कि, जब मंए एहूदी मत में रहें त परभू ईसू ला नई जानत रहें अऊ परमेसवर कर कलिसीया ला ढेरे सतात रहें अऊ नास करे कर कोसिस करत रहें। 14 मोर जाएत-खानी कर ढेरेच झेमन मोर उमर कर रहीन ओमन में ले मंए एहूदी रीती-रीवाज ला सबले बएड़-चएड़ के माने में उतसाहित रहें। 15 बकिन परमेसवर हर मोर दाई कर पेट भितरी ले मोके चून लेहीस अऊ अपन अनुगरह ले मोके बलाए लेहीस 16 अऊ जब ओकर इछा होईस त मोर ऊपरे अपन बेटा ला परगट करीस कि मंए गएर एहूदी मन में ओकर सुघर खभेर ला सुनाओं, त सुनाए बर कोनो मईनसे मन कर मंए सलाव नई लेहें 17 अऊ एरुसलेम सहर में ओमनोच जग नई गएं जेमन मोर ले आगु परेरीत रहीन, बकीन मंए तुरतेंच अरब देस में चईल देहें अऊ ऊहां ले फेर दमीसक सहर में फिर आएं। 18 तेकर तीन बछर कर पाछू मंए पतरस ठन मिले बर एरुसलेम सहर में गएं अऊ ओकर जग पंदरा दिन ले रुके रहें। 19 बकीन सबेच परेरीत मन में ले परभू कर भाई आकूब कर छोंएड़ अऊ ककरो जग नई मिलें। 20 मंए परमेसवर ला हाजीर जाएन के कहत हों कि जे बात ला मंए तुमन के लिखत हों, ओ बात हर झूठ नईए।

21 तेकर पाछू मंए सीरिया अऊ किलिकिया कर ईलाका में गएं। 22 बकीन एहूदिया इलाका कर कलिसीया मन कर बिसवासी मन मोके कभों नई देखे रहीन। 23 बलकी ओमन एतना सुनत रहीन कि “जेहर बिसवासी भाई बहिन मन ला आगु सतात रहीस, अब ओही हर ए बिसवास कर सुघर खभेर ला सुनात हवे, जेला आगु नास करे कर कोसिस करत रहीस” 24 अऊ ओमन मोर कारन परमेसवर कर महिमा करत रहीन।