Kulocɛliɛ wi 'yanyige nyɔ́gɔ wire nɛ́ weli sunʔɔmɔ ní bè
5
1 Kire sí gī,
bɛ̀ weli 'kò sínminɛ Kulocɛliɛ yiʔɛ mɛ́ gè tɛ́ngɛlɛ fànʔa nɛ̄ gè,
weli yē yanyige nɛ̄ nɛ́ Kulocɛliɛ ní wè weli Kàfɔli Zezi Kirisi wire nyúmɔ nī bè.
2 Wire nyúmɔ nī bè nɛ́ tɛ́ngɛlɛ kɛnmɛ bè,
weli 'Kulocɛliɛ kpuʔɔrɔ taa dè.
Nɛ̀ pínɛ weli nɛ fundaanra kpínʔini nɛ̀ taʔa gíi nɛ̄,
sɔ̀ngirɔ taʔadiʔɛ yē weli mɛ́,
weli bága Kulocɛliɛ wi kpuɔmɔ nyaa bè.
3 Bè fàri kire nɛ̄ gè,
weli nɛ fundaanra kpínʔini weli wuʔɔyɔ yi kiyɛ nī yè,
nɛ̀ taʔa gíi nɛ̄,
weli 'ki cɛ́n wuʔɔgɔ kiī nɛ kpàricogo kanʔa siɛn mɛ́.
4 Kpàricogo kiī nɛ báan nɛ́ lèbaanna ní,
lèbaanna ni nɛ̂ sí sɔ̀ngirɔ taʔadiʔɛ kɛn siɛn mɛ́.
5 Sɔ̀ngirɔ taʔadiʔɛ ki wè siɛn fáanniʔ.
Nɛ̀ taʔa gíi nɛ̄,
Kulocɛliɛ wi 'wi dɛ́nigɛ le gè nìʔɛgɛ weli funyɔ nī yè wi Pìle ni fànʔa nɛ̄ gè,
Pìle náà wi 'kɛn weli mɛ́ lè.
6 Ki 'nyaa bà weli 'puu nɛ tíin ŋɔri fùn wè,
a ki 'nyaa lɛ̀lɛ níì Kulocɛliɛ wi cé tìɛ lè,
a Kirisi wi 'kùu bàli pe wè fìʔɛ́ Kulocɛliɛ nɛ̄ wèʔ peli kɛnmɛ nɛ̄.
7 Kiī kpíʔilebinʔɛ siɛn kùu siɛnsinwɛ kɛnmɛ nɛ̄ bè.
Dùʔɔ siɛn nɛ̂ yéri ki nɛ̄ bè kùu kacɛ̀ngɛfɔli kɛnmɛ nɛ̄.
8 Nɛ̀ sí ki taa Kulocɛliɛ wi 'ki tìɛ weli nɛ̄ mɛni weli woli ni 'kpúʔɔ wire mɛ́ wè:
ki 'nyaa bà weli 'puu nɛ tíin kapiigbiʔilile bèle,
a Kirisi wi 'kùu weli kɛnmɛ nɛ̄.
9 Bè ní cɛ tàa taʔa tire nɛ̄ dè,
wi 'weli pàli nìʔɛnɛ kpíʔile a weli 'kò siɛnsinminɛ píra ŋáà nī wè wi sìsiɛn fànʔa nɛ̄ gè,
bà sí wi bága weli suɔ Kulocɛliɛ fundanʔanigɛ mɛ́ gè.
10 Ki 'nyaa weli 'puu Kulocɛliɛ leguulo wī,
á wi sí weli juu nɛ̀ taʔala wìi nɛ̄ bɛ̀ wi Jaa wi 'kùu weli kɛnmɛ nɛ̄ bè.
Bɛ̀ sí wi 'weli juu nɛ̀ taʔala wìi nɛ̄ wè,
káaliyɛ wè ki nīʔ,
weli bága suɔ bɛ̀ wiī sìi nɛ̄ wè !
11 Bè ní fàri kire nɛ̄ gè,
weli nɛ fundaanra kpínʔini bɛ̀ weli yē Kulocɛliɛ wuulo bèle weli Kàfɔli Zezi Kirisi nyúmɔ nī bè.
Wire wi 'weli juu nɛ̀ taʔala píra ŋáà nī wè weli nɛ́ Kulocɛliɛ ní wè.
Adama wè nɛ́ Kirisi ní wè
12 Bɛ̀ ki 'nyaa kapiile ni 'jíin duniya nī wè siɛn nigbe kɛnmɛ nɛ̄ bè,
á kùu míɛni wi 'jíin kapiile kɛnmɛ nɛ̄ bèa,
a kire 'ki kɛn a kùu wi 'nɔ̀ siɛnnɛ pe mìɛni nɛ̄,
nɛ̀ taʔa gíi nɛ̄,
siɛnnɛ pe mìɛni nyɛ́nì kapiile kpíʔile.
13 Ki 'nyaa sɛ́ni nɛ́ Fànʔa Siɛnrɛ ti- pɛn dè,
kapiile ni 'puu bile nɛ̀ kúɔ duniya nī wè,
nɛ̀ sí ki taa kàyuʔu sì puu nɛ nyu kapiile nɛ̄ lèʔ,
bà Fànʔa Siɛnrɛ tiì cé fìɛ puu baa wèʔ.
14 Nɛ̀ sí ki líɛ Adama lɛ̀lɛ nī lè fúɔ nɛ̀ sɛ́nì nɔ̀ Misa lɛ̀lɛ nɛ̄ lè,
kùu wi 'puu nɛ wi fànʔa kpúɔn gè nɛ pínɛ bìli nɛ̄ piyè cé kapiile kpíʔile majo bɛ̀ Adama tíɛlɛ wè wire ŋáà wiì cé yéri nɛ̀ lúʔu Kulocɛliɛ nɛ̄ wèʔ.
Siɛn ŋáà wi yé je ga pɛn wè,
Adama wire wi 'puu nɛ ki siɛn wi kɛnmɛ tìí bè.
15 Nɛ̀ sí ki taa Adama wi sìnluʔumɔ piǐ cɛ gbɛ̀ tɔ́nminɔ nɛ́ Kulocɛliɛ kpuʔɔrɔ ní dèʔ,
yakɛngɛ gáà wi 'kɛn waʔanɛ gèʔ.
A ki nɛ́ cɛ́nì nyaa siɛnnɛ 'kùu nìʔɛnɛ siɛn nigbe sìnluʔumɔ pire kɛnmɛ nɛ̄ bè,
Kulocɛliɛ kacɛ̀ngɛ ki 'kpúʔɔ nɛ̀ fáala;
a wi 'kpuʔɔrɔ kpíʔile siɛnniʔɛnɛ mɛ́ wi kacɛ̀ngɛ kire kɛnmɛ nɛ̄ bè,
siɛn nigbe kɛnmɛ nɛ̄,
wire wī Zezi Kirisi wè.
16 Kulocɛliɛ yakɛngɛ ki sí wè nugo nɛ́ ŋàa ní wi 'kapiile kpíʔile lèʔ.
Nɛ̀ taʔa gíi nɛ̄,
kire siɛn wi sìnluʔumɔ pi 'pɛn nɛ́ kàyuʔu ní.
Nɛ̀ sí ki taa Kulocɛliɛ wi yakɛngɛ ki 'siɛnnɛ yige bèle pe tuudiʔɛlɛ nìʔɛgɛlɛ nī gèle,
nɛ̀ pe kpíʔile siɛnsinminɛ.
17 Bɛ̀ ki 'nyaa kùu wi pɛ́ni fànʔa kpúɔn siɛnnɛ nɛ̄ bèle siɛn nigbe sìnluʔumɔ kɛnmɛ nɛ̄ bè,
bà míɛni Kulocɛliɛ kpuʔɔrɔ ti 'kpúʔɔ nɛ̀ fáala,
a weli 'wi sínmɛ yakɛngɛ taa gè waʔanɛ.
Bìli pe 'kire taa gè,
pe bága de pe sìi tári wè de kire nàdanʔana tári Zezi Kirisi wire nigbe fànʔa nɛ̄ gè.
18 Kire nɛ̄,
ye sí ki cɛ́n,
bɛ̀ ki 'nyaa siɛn nigbe kakoligo ki 'tí a kàyuʔu 'tuu siɛnnɛ pe mìɛni nɛ̄ bèle,
bà míɛni siɛn nigbe sínmɛ kakpiʔilile kɛnmɛ nɛ̄ bè,
a wi 'siɛnnɛ pe mìɛni juu nɛ̀ yige,
pe- gbɛ̀ sìi taa wè.
19 Bɛ̀ ki 'nyaa siɛn nigbe sìnluʔumɔ pi 'kpíʔile kaala a siɛnniʔɛnɛ 'kò kapiigbiʔilile bèle,
bà míɛni siɛn nigbe ŋáà wi 'yéri nɛ̀ lúʔu wè,
wire kɛnmɛ nɛ̄ bè Kulocɛliɛ wi bága siɛnniʔɛnɛ tɔ́ri siɛnsinminɛ.
20 Nɛ̀ sí ki taa Fànʔa Siɛnrɛ ti 'pɛn gìi ki bé tí kakolido ti- niʔɛ;
bà sí kapiile ni 'niʔɛ lè,
a Kulocɛliɛ kacɛ̀ngɛ míɛni ki ń'nɛ̀ kpúʔɔ nɛ̀ fáala.
21 Gìi ki bé tí,
a kapiile ni cɛ́ni ni fànʔa kpúɔn gè nɛ́ kùu ní wè yo,
Kulocɛliɛ kpuʔɔrɔ tiī nɛ ti baara kúu dè wi weli tɔ́ri sínminɛ wi yiʔɛ mɛ́ gè,
nɛ bànguɔ sìi kanʔa wè weli mɛ́ weli Kàfɔli Zezi Kirisi wire nyúmɔ nī bè.