Jànvaa siɛnjuulo bèle
4
1 Nɛ siinyɛninɛ,
yeli bálì ye 'mi dɛ́ni bèle,
yeli fǎga tɛ́ngɛ siɛnnɛ bálì pe mìɛni nɛ̄ bèle bàli pe 'jo Kulocɛliɛ Pìle ni nyu peli ní wèʔ.
Yeli 'yɛli bè pe siʔɛ bè wéli bè ki cɛ́n a ki yē Kulocɛliɛ Pìle niī pe nī.
Nɛ́ ki cɛ́n jànvaa siɛnjuulo sáamɛ nyɛ́nì jíin nɛ̀ cɛrigɛ duniya nī wèa.
2 Ki n'gɛ kɛnmɛ báà pire nɛ̄ yeli bé ki cɛ́n a ki yē Kulocɛliɛ Pìle niī siɛn nī wè:
a siɛn wi 'ki juu nɛ̀ láʔa nɛ́ jo Zezi Kirisi nyɛ́nì pɛn siɛn céri nī dè,
Kulocɛliɛ Pìle ni yē kire siɛn ŋáà nī wè.
3 Á ŋìi sí cíi bè ki juu láʔa bé jo dí Zezi wiì pɛn kire kɛnmɛ báà nɛ̄ bèʔ,
Kulocɛliɛ Pìle ni wè kire siɛn nī wèʔ.
Kire siɛn wiī Kirisi leguuwo wī.
Yeli cé ki lúʔu nɛ́ jo kire leguu ŋáà wi bága pɛn;
píra ŋáà nī wè,
wi sí yē bile duniya nī wè nɛ̀ kúɔ.
4 Nɛ̀ ki yaʔa,
yeli bálì bīɛlɛ mi pìile bèle,
yeli yē Kulocɛliɛ wuulo a yeli 'jànvaa siɛnjuulo bálì jáa bèleb.
Nɛ́ ki cɛ́n Kulocɛliɛ Pìle náà nī yeli nī bèle,
niī nɛ́ ŋɔri ní nɛ̀ tóri Kirisi leguuwo nɛ̄ wè ŋàa wī duniya nī wè.
5 Siɛnnɛ bálì bèle,
peli yē duniya wuulo,
kire nɛ̄ pe nìɛ nyu duniya juugɛnmɛ nɛ̄,
á duniya wuulo peli nìɛ lúru pe mɛ́.
6 Weli bèle,
weli yē Kulocɛliɛ wuulo.
Ŋàa wi 'Kulocɛliɛ cɛ́n wè,
wiī nɛ lúru weli mɛ́.
Ŋàa wi wè Kulocɛliɛ wuu wèʔ,
wi wè nɛ lúru weli mɛ́ʔ.
Bɛ̀ ki yē weli nɛ̂ ki cɛ́n a ki 'nyaa kányiʔɛ Pìle ni yē kire siɛn nī wè kire ga laa káfinɛrɛ pìle lèc.
Kulocɛliɛ wi yē dɛ́nigɛ
7 Nɛ siinyɛninɛ,
yeli bálì ye 'mi dɛ́ni bèle,
weli 'yɛli bè wìye dɛ́ni,
nɛ́ ki cɛ́n dɛ́nigɛ ki 'kɔ́n Kulocɛliɛ mɛ́.
Ŋàa mɛ́ dɛ́nigɛ yē wè,
wiī Kulocɛliɛ pùɔ;
wi nyɛ́nì Kulocɛliɛ cɛ́n.
8 Ŋàa sí wī dɛ́nigɛ wè wi mɛ́ wèʔ,
wiì Kulocɛliɛ cɛ́nʔ,
nɛ́ ki cɛ́n,
Kulocɛliɛ wi yē dɛ́nigɛ.
9 Kulocɛliɛ nyɛ́nì wi dɛ́nigɛ tìɛ gè weli nɛ̄ kɛnmɛ báà nɛ̄ bè:
Kulocɛliɛ nyɛ́nì wi Jaa nigbe tun wè náʔa duniya nī wè,
gìi ki bé tí weli- bànguɔ sìi taa wè wi kɛnmɛ nɛ̄ bèd.
10 Ki n'gɛ gàa gī dɛ́nigɛ gè:
kiì nyaa majo Kulocɛliɛ wire 'weli dɛ́ni wīʔ;
gìi gī baa gè,
weli bīɛlɛ we 'wi dɛ́ni.
Wire wi nyɛ́nì wi Jaa tun wè náʔa wi pa kò kakuɔrɔ weli kɛnmɛ nɛ̄ bè,
kapiʔile kàsulugo wori dèe.
11 Nɛ siinyɛninɛ,
a weli 'Kulocɛliɛ dɛ́ni wè kɛnmɛ báà nɛ̄ bè,
weli 'yɛli bè wìye dɛ́ni míɛni.
12 Siɛn fìɛ Kulocɛliɛ nyaa wè púloʔf.
Nɛ̀ sí ki yaʔa a weli 'wìye dɛ́ni wè,
Kulocɛliɛ wiī kòriwo weli nī,
á wi dɛ́nigɛ ki sɔ́migɔ nɛ̀ fori weli nī.
13 Kulocɛliɛ nyɛ́nì wi Pìle kɛn lè weli mɛ́,
kire ki 'ki yaʔa a weli 'ki cɛ́n weli yē kòrilo Kulocɛliɛ nī wè,
á wire míɛni yē kòriwo weli nī.
14 Weli nyɛ́nì ki nyaa nɛ́ weli nyapigele ní gèle níɛ ki nyu nɛ láʔala dí Tuufɔli wi nyɛ́nì wi Jaa tun wè wi pa kò duniya Suɔfɔlig.
15 A siɛn 'ki juu nɛ̀ láʔa nɛ́ jo dí Zezi wiī Kulocɛliɛ Jaa wè,
Kulocɛliɛ yē kòriwo kire siɛn nī wè,
á wire míɛni yē kòriwo Kulocɛliɛ nī wè.
16 Dɛ́nigɛ gáà gī Kulocɛliɛ mɛ́ weli kɔli mɛ́ gè,
weli nyɛ́nì ki cɛ́n nɛ̀ tɛ́ngɛ ki nɛ̄.
Kulocɛliɛ wi yē dɛ́nigɛ.
A siɛn ŋíì yē kòriwo dɛ́nigɛ nī gè,
wi yē kòriwo Kulocɛliɛ nī wè;
Kulocɛliɛ míɛni yē kòriwo kire siɛn nī wè.
17 Kire ki 'ki yaʔa a dɛ́nigɛ ki sɔ́migɔ nɛ̀ fori weli sunʔɔmɔ nī bè,
kire ga buu weli fǎga de fìʔɛ́ kàyuʔujuujɛngɛ nɛ̄ gèʔ,
nɛ́ ki cɛ́n bɛ̀ Zezi Kirisi wi yē kɛnmɛ bíì nɛ̄ bè,
weli míɛni yē bɛ̀ wi tíɛlɛ duniya nī wè.
18 Fíɛrɛ wè baa dɛ́nigɛ nī gèʔ,
nɛ́ ki cɛ́n dɛ́nigɛ gáà ki 'sɔ́migɔ nɛ̀ fori gè,
kiī nɛ fíɛrɛ cìrá dè.
A wiyē nɛ fìʔɛ́ wè,
kire nɛ ki tìí wiyē nɛ wuʔɔgɔ siri gè wī.
A ki sí nyaa mmɛ gè,
ŋàa wi fìʔɛ́ wuʔɔgɔ nɛ̄ gè,
dɛ́nigɛ kiì sɔ́migɔ nɛ̀ fori kire siɛn nī wèʔ.
19 Dɛ́nigɛ yē weli mɛ́,
nɛ́ ki cɛ́n weli we 'kíni nɛ̀ Kulocɛliɛ dɛ́ni wè.
20 A siɛn wáà 'ki juu nɛ́ jo,
«Kulocɛliɛ nyɛ́nì mi dɛ́ni wè»,
nɛ̀ ki yaʔa wi siinyɛni wi 'wi biɛn wè,
káfinɛvinɛwɛ wī.
Nɛ́ ki cɛ́n,
wi siinyɛni ŋáà wi nyaʔa wè,
a wire sì wi dɛ́ni wèʔ,
Kulocɛliɛ ŋáà wi wè nɛ nyaʔa wèʔ,
wire sǐ gbɛ̀ wi dɛ́niʔ.
21 Kajuudiɛlɛ ni n'nɛ nàa wi 'juu weli mɛ́ lè:
ŋàa Kulocɛliɛ 'wi dɛ́ni wè,
ki siɛn wi 'yɛli bè wi siinyɛni yaʔa wè wi- wi dɛ́ni míɛnih.