Tɛ́ngɛlɛ ni 'weli kɛn a we 'duniya jáa wè
5
1 A siɛn ó siɛn 'tɛ́ngɛ ki nɛ̄ Zezi wi yē Kirisi wè,
wi yē Kulocɛliɛ pùɔa.
A Tuufɔli wi 'siɛn ó siɛn dɛ́ni wè,
Tuufɔli wi pùɔ wè,
wi nɛ̂ siɛn dɛ́ni wè míɛnib.
2 A Kulocɛliɛ 'weli dɛ́ni wè,
a weli nɛ lúru wi kajuudiʔɛlɛ mɛ́ gèle,
kire ki bé ki yaʔa weli- ki cɛ́n dí Kulocɛliɛ pìile pe 'weli dɛ́ni wè.
3 Nɛ́ ki cɛ́n,
a Kulocɛliɛ 'weli dɛ́ni wè,
weli 'yɛli bè wi kajuudiʔɛlɛ cò gèle.
Wi kajuudiʔɛlɛ ke wè tugoroʔc.
4 Nɛ́ ki cɛ́n a siɛn wiī Kulocɛliɛ pùɔ wè,
wi nɛ̂ fànʔa taa duniya nɛ̄ wèd.
Weli tɛ́ngɛlɛ lire nɛ̂ ki yaʔa weli nɛ̂ fànʔa taa duniya nɛ̄ wè.
5 Bɛ̀ sí ki yē gè,
ŋáa sí wī wi 'duniya jáa wè ?
Wire yákuɔ wī ŋàa wi 'tɛ́ngɛ ki nɛ̄ nɛ́ jo Zezi wiī Kulocɛliɛ Jaa wè.
6 Zezi Kirisi wire wī ŋàa wi 'pɛn nɛ́ luʔɔ ní gè nɛ́ sìsiɛn ní gè.
Kiì cɛ́nì nyaa luʔɔ yákuɔ ní wi 'pɛnʔ,
kire bɛ̀ʔ,
luʔɔ nɛ́ sìsiɛn ní wi 'pɛne.
Á Kulocɛliɛ Pìle niī nɛ ki nyu nɛ láʔala,
nɛ́ ki cɛ́n Pìle lè ni yē kányiʔɛf.
7 Peli taanri bīɛlɛ pe ki tìí nɛ láʔala:
8 Kulocɛliɛ Pìle lè,
nɛ́ luʔɔ ní gè,
nɛ́ sìsiɛn ní gè.
Pe taanri pe mìɛni yē sɔ̀nginuro nɛ̄ nɛ́ pìye ní.
9 Weli nìɛ yéri siɛnnɛ siɛnrɛ nɛ̄ dè dàa pe 'juu nɛ̀ láʔa dè,
nɛ̀ sí ki yaʔa dàa Kulocɛliɛ 'juu nɛ̀ láʔa dè,
tire nyɛ́nì kpúʔɔ nɛ̀ tóri.
Tire yē dàa wi 'juu nɛ̀ ceri wi Jaa wuʔu nɛ̄ gèg.
10 Ŋàa wi 'tɛ́ngɛ Kulocɛliɛ Jaa nɛ̄ wè,
siɛnrɛ dáà Kulocɛliɛ 'juu nɛ̀ láʔa dè,
ti nɛ̂ kò wi nī.
Nɛ̀ ki yaʔa,
ŋàa wiì tɛ́ngɛ Kulocɛliɛ siɛnrɛ nɛ̄ dèʔ,
wire nɛ̂ ki nyaa majo Kulocɛliɛ wi 'finɛ wī,
nɛ́ ki cɛ́n dàa Kulocɛliɛ 'juu nɛ̀ láʔa wi Jaa wuʔu nɛ̄ gè,
wiì tɛ́ngɛ ti nɛ̄ʔ.
11 Siɛnrɛ dáà ti nyɛ́nì juu nɛ̀ láʔa:
Kulocɛliɛ nyɛ́nì bànguɔ sìi kɛn wè weli mɛ́;
kire sìi ŋáà wi 'kɔ́n wi Jaa mɛ́ wèh.
12 Ŋàa mɛ́ Jaafɔli wi yē wè,
sìi wi yē wi mɛ́.
Ŋìi sí mɛ́ Kulocɛliɛ Jaa wi wè yē wèʔ,
sìi wi wè wi mɛ́ʔi.
Sɔ̀ngirɔ taʔadiʔɛ gáà gī tɛ́ngɛfɔlilɔ mɛ́ bèle
13 Yeli bálì ye 'tɛ́ngɛ Kulocɛliɛ Jaa wi míʔɛ nɛ̄ gè,
mi nyɛ́nì siɛnrɛ dáà sɛbɛ dè yeli mɛ́ kire ga buu yeli- ki cɛ́n yeli nyɛ́nì bànguɔ sìi taa wèj.
14 Ki n'gɛ sɔ̀ngirɔ taʔadiʔɛ gáà gī weli mɛ́ Kulocɛliɛ yiʔɛ mɛ́ gè:
a weli 'yɛgɛ káà náari nɛ̀ yɛli nɛ́ wi nyɛ́ni kaala ní lè,
wi bé lúʔu weli mɛ́.
15 Bɛ̀ weli 'ki cɛ́n wiī nɛ lúru weli mɛ́ wè,
a weli 'yakaa náari wi mɛ́ wè,
weli 'ki cɛ́n míɛni wi bé ki kɛn weli mɛ́ nɛ̀ yɛli nɛ́ gàa ní weli náari gè.
16 A wàa 'wi siinyɛni nyaa ŋàa wi kapiile kpínʔini lè nàa ni wè nɛ waa kùu mɛ́ wèʔ,
wi de náari wi siinyɛni mɛ́ wè.
Bà Kulocɛliɛ bé sìi kɛn wè wi mɛ́,
a ki 'nyaa kányiʔɛ,
kapiile náà wi kpínʔini lè,
ni wè nɛ waa kùu mɛ́ wèʔ.
Nɛ̀ sí ki yaʔa kapiile láà yē baa nàa ni waa kùu mɛ́ wèk.
Kire kapiile lire wuʔu bɛ̀ʔ mi nɛ nyu nɛ́ jo yeri náari wèʔ.
17 Kolimɔ pi mìɛni yē kapiile,
nɛ̀ ki yaʔa kapiʔile ke mìɛni bɛ̀ʔ kiyē nɛ waa kùu mɛ́ wèʔ.
18 Weli nyɛ́nì ki cɛ́n,
ŋàa wī Kulocɛliɛ pùɔ wè,
wi nɛ̌ kò de kapiʔile kpínʔiniʔ.
Nɛ́ ki cɛ́n Kulocɛliɛ Jaa wiī nɛ wi wéli;
Sìpiiwe wiǐ gbɛ̀ nɔ̀ wi nɛ̄ʔ.
19 Weli 'ki cɛ́n weli yē Kulocɛliɛ pìilel,
á duniya wi mìɛni yē Sìpiiwe fànʔa láara gè.
20 Weli nyɛ́nì ki cɛ́n míɛni,
Kulocɛliɛ Jaa wi pɛ́nì sícilimɛ kɛn bè weli mɛ́,
kire ga buu weli- gbɛ̀ kányiʔɛ Kulocɛliɛ cɛ́n wè.
Weli sí yē pínɛnɛ nɛ́ wi ní ŋàa wi yē kányiʔɛ Kulocɛliɛ wè,
bɛ̀ weli yē pínɛnɛ nɛ́ wi Jaa Zezi Kirisi ní wè.
Zezi wire yē kányiʔɛ Kulocɛliɛ,
wire wī bànguɔ sìi wèm.
21 Mi pìile,
ye- yìye cò yasunro nɛ̄ dè !