3
1 Ye- ki wéli kɛnmɛ bíì nɛ̄ weli woli ni 'kpúʔɔ Tuufɔli mɛ́ wèa,
fúɔ a wiī nɛ weli yeri Kulocɛliɛ pìile.
Kányiʔɛ sí gī;
weli yē bɛ̀ !
Ki sí n'gɛ gàa nɛ̄ duniya siɛnnɛ piyè weli cɛ́n wèʔ:
duniya siɛnnɛ piyè Kulocɛliɛ cɛ́n wèʔb !
2 Nɛ siinyɛninɛ,
yeli bálì ye 'mi dɛ́ni bèle,
píra ŋáà nī wè,
weli yē Kulocɛliɛ pìile.
Kiì fìɛ tìɛ weli nɛ̄ʔ kɛnmɛ bíì nɛ̄ weli bága sa puu wèʔ.
Nɛ̀ ki yaʔa weli sí ki cɛ́n a Kirisi kɛ́nì wìi tìɛ wè,
á weli nɛ wi nyaʔa wè,
weli bága puu bɛ̀ wi tíɛlɛ,
nɛ́ ki cɛ́n weli bé wi nyaa kɛnmɛ bíì nɛ̄ wi yē wèc.
3 A kire sɔ̀ngirɔ taʔadiʔɛ yē siɛn ó siɛn mɛ́ wè,
wi nìɛ wìi cìile,
bɛ̀ Kirisi wi tíimɛ wi yē cìiliwe wè.
4 A siɛn ó siɛn nɛ kapiile kpínʔini lè,
wiī nɛ Kulocɛliɛ fànʔa siɛnrɛ cìʔí dè,
nɛ́ ki cɛ́n kapiile lè,
lire yē bè fànʔa siɛnrɛ cíi dè.
5 Yeli nyɛ́nì ki cɛ́n,
Zezi Kirisi wi 'pɛn bè kapiʔile láʔa gèle;
kapiile wè wi nī púloʔd.
6 Kire nɛ̄,
a siɛn ó siɛn nɛ kòrí nɛ́ wi ní wè,
kire siɛn wiǐ ní de kapiile kpínʔiniʔ.
A siɛn ó siɛn nɛ waa yiʔɛmɛ nɛ kapiile kpínʔini lè,
wiì Zezi Kirisi nyaa wèʔ,
wi míɛni sì wi cɛ́nʔ.
7 Mi pìile,
ye fǎga ki yaʔa wàa yeli fáanni bè pùunniʔ.
Siɛn ŋáà wi kasingele kpínʔini gèle,
wi yē sínwɛ,
majo bɛ̀ Zezi Kirisi wiī sínwɛ wè.
8 Ŋìi sí wiī nɛ kapiile kpínʔini lè,
wire yē Setɛni wuu.
Nɛ́ ki cɛ́n gbòdolilo kàfɔli wiī kapiigbiʔiliwe nɛ̀ líɛ baa ki sélimɛ nɛ̄ bè.
Kulocɛliɛ Jaa wi 'pɛn bè ba Setɛni wi kakpiʔiligele cúʔɔ gèlee.
9 Siɛn ó siɛn wī Kulocɛliɛ pùɔf wè,
wi wè nɛ waa yiʔɛmɛ nɛ kapiile kpínʔini lèʔ,
nɛ́ ki cɛ́n Kulocɛliɛ sìi wiī kire siɛn nī wè.
Kire nɛ̄ wiǐ ní gbɛ̀ jáa bè kapiile kpíʔileʔ,
nɛ́ ki cɛ́n wiī Kulocɛliɛ pùɔ.
10 Ki n'gɛ gàa ki 'Kulocɛliɛ pìile wàli bèle nɛ́ gbòdolilo kàfɔli wuulo ní bèle:
ŋàa wi wè nɛ kasingele kpínʔini gèleʔ,
kire ga laa,
a wi siinyɛni sì wi dɛ́ni wèʔ,
kire siɛn wè,
wi wè Kulocɛliɛ pùɔʔ.
Dɛ́nigɛ kire kiī nɛ tɛ́ngɛfɔli tìí wè
11 Ti sí n'dɛ tunduro siɛnrɛ dáà weli 'lúʔu wi mɛ́ dè nɛ̀ ki líɛ baa ki sélimɛ nɛ̄ bè,
tire dī weli 'yɛli bè wìye dɛ́nig.
12 Kiì yɛli we- puu bɛ̀ Kayɛn tíɛlɛʔ,
wire ŋáà wi 'puu Sìpiiwe wuu wè,
á wi 'wi cɔni kpúu wè.
Gáa sí nɛ́ wi cé wi kpúu ?
Wi kakpiʔiligele ke cé pii wī,
nɛ̀ ki yaʔa wi cɔni wuʔulo keli cé sính.
13 Mi siinyɛninɛ,
ye fǎga ki yaʔa ki- yeli fungo wúɔʔ a yeli 'duniya siɛnnɛ biɛn bèle.
14 A weli siinyɛninɛ pe 'weli dɛ́ni bèle,
kire nɛ ki tìí weli nyɛ́nì yiri kùu nī wè nɛ̀ jíin sìi nī wè.
Siɛn ŋáà mɛ́ dɛ́nigɛ ki wè baa gèʔ,
wiī kòriwo kùu nī wīi.
15 Siɛn ŋáà wi siinyɛni wi 'wi biɛn wè,
wire yē siɛnkpuuwoj;
yeli nyɛ́nì ki cɛ́n bànguɔ sìi wi wè kòriwo siɛnkpuuwo nī wèʔ.
16 Ki n'gɛ kɛnmɛ bíì nɛ̄ weli 'dɛ́nigɛ cɛ́n gè nɛ̀ síɛ wè:
Zezi Kirisi nyɛ́nì wi sìi kɛn wè weli kɛnmɛ nɛ̄.
Kire nɛ̄,
weli míɛni bèle,
weli 'yɛli bè gbòbori yaʔa bè weli sìi kɛn wè weli siinyɛninɛ kɛnmɛ nɛ̄ bèk.
17 A duniya lɔri tiī siɛn wáà mɛ́ wè,
á wi 'wi siinyɛni nyaa wè fuunmɔ nī bè,
a wi sí cíi,
nɛ́ wi fungo tɔ́n gè,
wiì nyinimɛ taa wi nɛ̄ wèʔ,
mɛni Kulocɛliɛ dɛ́nigɛ ki bé puu kòrigo bè síɛ wi fungo nī gè ?
18 Mi pìile,
weri dɛ́nigɛ tìí gè kakpiʔiligele nī nɛ́ kányiʔɛ ní;
ki fǎga buu siɛntaanra juulo yákuɔʔ.
19 Kire ki bé ki yaʔa dí weli- ki cɛ́n bè jo weli yē kányiʔɛ wuulo nɛ́ míɛni weli funyɔ yi bé nyígi Kulocɛliɛ yiʔɛ mɛ́ gè.
20 A ki sí yē weli funyɔ yiī nɛ dìgire nyu weli nɛ̄ wè,
weli 'ki cɛ́n Kulocɛliɛ wi nyɛ́nì kpúʔɔ nɛ̀ tóri weli funyɔ nɛ̄ yè.
Wi 'kele ke mìɛni cɛ́n.
21 Nɛ siinyɛninɛ,
yeli bálì ye 'mi dɛ́ni bèle,
a ki sí yē weli funyɔ yi wè nɛ dìgire nyu weli nɛ̄ wèʔ,
weli funyɔ yi bé puu nyíyɛ kányiʔɛ nɛ̄ Kulocɛliɛ yiʔɛ mɛ́ gè.
22 Nɛ́ míɛni weli bé ki taa wi mɛ́ gàa weli nɛ náari gè,
nɛ́ ki cɛ́n weli nɛ wi kajuudiʔɛlɛ cògí gèle níɛ ki míɛni kpínʔini gàa ki 'wi dɛ́ni gèl.
23 Wi kajuudiɛlɛ ni n'nɛ:
we- tɛ́ngɛ wi Jaa Zezi Kirisi wi míʔɛ nɛ̄ gè,
dí we- wìye dɛ́ni bè yɛli nɛ́ gàa ní wi 'juu nɛ̀ gbɛ̀ngɛ gè nɛ́ jo weri ki kpínʔini gèm.
24 Ŋàa wi 'wi kajuudiʔɛlɛ cò gèle,
wiī kòriwo Kulocɛliɛ nī,
á Kulocɛliɛ míɛni yē kòriwo wi nī.
Ki n'gɛ mɛni weli 'ki cɛ́n dí Kulocɛliɛ yē kòriwo weli nī bèle:
wi Pìle náà wi 'kɛn weli mɛ́ lè,
lire ni ki tìí weli nɛ̄.