2
1 Nɛ pìile,
mi 'siɛnrɛ dáà sɛbɛ dè yeli mɛ́ kire ga buu ye fǎga ní de kapiʔile kpínʔiniʔ.
Nɛ̀ ki yaʔa,
a ki sí nyaa wàa 'kapiile kpíʔile wè,
kàsuluwo yē weli mɛ́ Tuufɔli yiʔɛ mɛ́ gè,
Zezi Kirisi wè,
wire ŋáà wī sínwɛ wèa.
2 Wire tíimɛ wi 'weli kapiʔile kàsulugo kakuɔrɔ kpíʔile dèb.
Nɛ̀ ki yaʔa wiì ki kpíʔile weli yákuɔ mɛ́ʔ;
duniya wi mìɛni kapiʔile kɛnmɛ nɛ̄ wi 'ki kpíʔilec.
Kajuudiɛlɛ náà ni nyu dɛ́nigɛ wuʔu nɛ̄ gè
3 Ki n'gɛ kɛnmɛ bíì nɛ̄ weli bé ki cɛ́n a ki yē weli 'Zezi Kirisi cɛ́n wè:
kire gī a weli nɛ lúru wi kajuudiʔɛlɛ mɛ́ gèled.
4 Ŋìi wi 'jo wire 'wi cɛ́n wè,
nɛ̀ ki yaʔa wiì wi kajuudiʔɛlɛ cò gèleʔ,
wiī káfinɛvinɛwɛ;
kányiʔɛ wè wi fungo nī gèʔ.
5 Ki sí n'gɛ,
siɛn ó siɛn wi 'wi siɛnrɛ cò dè,
wiī nɛ ki tìí Kulocɛliɛ dɛ́nigɛ ki 'wi fungo sɔ́migɔ gè nɛ̀ nyì.
Kire ki bé ki yaʔa weli- ki cɛ́n weli yē pínɛnɛ nɛ́ wi níe.
6 A siɛn ó siɛn 'jo wire yē pínɛwɛ nɛ́ Kulocɛliɛ ní wèf,
wi 'yɛli bèri tári kanumɔ nɛ̄ bè bɛ̀ Zezi Kirisi wi yé tánʔa wè.
7 Nɛ siinyɛninɛ,
yeli bálì ye 'mi dɛ́ni bèle,
kajuudiɛlɛ fɔnnɔ bɛ̀ʔ nàa mi 'sɛbɛ yeli mɛ́ lèʔ,
nɛ̀ ki yaʔa kajuudiɛlɛ liɛlɛ nī nàa yeli 'taa lè nɛ̀ ki líɛ baa ki sélimɛ nɛ̄ bè.
Kire kajuudiɛlɛ liɛlɛ náà lè,
lire nī siɛnrɛ dè dàa yeli 'lúʔu dèg.
8 Nɛ̀ sí ki yaʔa kajuudiɛlɛ fɔnnɔ nī cígini nàa mi 'sɛbɛ yeli mɛ́ lè.
Zezi Kirisi wi 'tánʔa nɛ̀ yɛli nɛ́ kire kányiʔɛ ní gè;
yeli míɛni nɛ tári nɛ yɛligi nɛ́ ki ní.
Nɛ́ ki cɛ́n yebilige ki nyɛ́ni tóri,
á kányiʔɛ kpìɛnmɛ piī nɛ càanná nɛ kúuh.
9 A siɛn ó siɛn 'jo wire yē kpìɛnmɛ nɛ̄,
nɛ̀ ki yaʔa wi siinyɛni wi 'wi biɛn wè,
kire siɛn wiī nɛ tíin yebilige nī.
10 A siɛn ó siɛn sí ki yaʔa a wi siinyɛni wi 'wi dɛ́ni wè,
kire siɛn wiī kòriwo kpìɛnmɛ nɛ̄;
yakaa wè baaʔ gàa nɛ̄ wi bé kúrugo bè tuu gèʔi.
11 Nɛ̀ ki yaʔa ŋàa wi 'ki yaʔa a wi siinyɛni wi 'wi biɛn wè,
wire yē yebilige nī,
wiī nɛ tári yebilige nī.
Wi nɛ̌ wi káridiʔɛ cɛ́n gèʔ baa wiī nɛ waa wèʔ,
nɛ́ ki cɛ́n yebilige ki 'wi kpíʔile a wi 'kò fúɔn.
12 Nɛ pìile,
mi 'siɛnrɛ dáà sɛbɛ dè yeli mɛ́ nɛ́ ki cɛ́n yeli kapiʔile kàsulugo ki 'suɔ Zezi Kirisi míʔɛ kɛnmɛ nɛ̄ bèj.
13 Tuufɔlilɔ,
mi 'siɛnrɛ dáà sɛbɛ dè yeli mɛ́ nɛ́ ki cɛ́n ŋàa wi tíi nɛ̀ puu baa wè ki sélimɛ nɛ̄ bè,
yeli nyɛ́nì wi cɛ́n.
Nàgapunminɔ,
mi 'siɛnrɛ dáà sɛbɛ dè yeli mɛ́ nɛ́ ki cɛ́n yeli nyɛ́nì fànʔa taa Sìpiiwe nɛ̄ wèk.
14 Mi 'ki sɛbɛ yeli mɛ́,
pìile,
nɛ́ ki cɛ́n yeli nyɛ́nì Tuufɔli cɛ́n wè.
Mi 'ki sɛbɛ yeli mɛ́,
tuufɔlilɔ,
nɛ́ ki cɛ́n ŋàa wi tíi nɛ̀ puu baa wè ki sélimɛ nɛ̄ bè,
yeli nyɛ́nì wi cɛ́n.
Mi 'ki sɛbɛ yeli mɛ́,
nàgapunminɔ,
nɛ́ ki cɛ́n yeli yē nɛ́ ŋɔri ní,
a Kulocɛliɛ siɛnrɛ tiī kòriro yeli nī,
a yeli 'Sìpiiwe jáa wè.
15 Ye fǎga duniya yaʔa wè wi- yeli dɛ́niʔ,
nɛ́ gàa gī duniya nī wèʔ.
A duniya wi 'siɛn ŋíì dɛ́ni wè,
Tuufɔli dɛ́nigɛ ki wè wi fungo nī gèʔ.
16 Ye- ki wéli gàa gī duniya nī wè:
céri kanɛdanʔana gèle,
nɛ́ nyapigele kanɛdanʔana ní gèle,
nɛ́ nàgbuʔɔrɔ dè lɔri kɔli mɛ́ gèl.
Tire dáà ti mìɛni tiì kɔ́n Tuufɔli mɛ́ wèʔ,
tire nɛ kɔ́ngi duniya nī wī.
17 Nɛ̀ sí ki yaʔa,
duniya wiī nɛ tóri wī nɛ́ wi kanɛdanʔana ní gèle.
Ŋàa sí wiī nɛ Kulocɛliɛ nyɛ́ni kaala kpínʔini lè,
wire yē sìi nɛ̄ súuri lɛ̀lɛ ó lɛ̀lɛ nī.
Kasɔminɔ lè Kirisi leguulo wuʔu nɛ̄ gè
18 Mi pìile,
làzɛnnɛ lire nī nàa lè.
Yeli cé ki lúʔu nɛ́ jo dí Kirisi leguuwo wi bága pɛnm.
Bɛ̀ ki yē ŋɔ̀ wè,
Kirisi leguulo nìʔɛnɛ yē bile.
Kire nɛ̄ weli nyɛ́nì ki cɛ́n làzɛnnɛ lire ni nyɛ́nì nɔ̀.
19 Kirisi leguulo bálì bèle,
pe 'yiri weli sunʔɔmɔ nī.
Nɛ̀ ki yaʔa,
kányiʔɛ nɛ̄ gè,
piyè cé puu weli wuuloʔ.
Nɛ́ ki cɛ́n a pe yé puu weli wuulo bèle,
pe cî kò nɛ́ weli ní.
Ki 'nyaa,
pe sí yiri weli sunʔɔmɔ nī bè,
kire ga buu ki- fílige bè cɛ́n pe mìɛni wè weli wuuloʔ.
20 Gàa ki 'yeli kúɔ bèle,
Kirisi ŋáà wī tiɛlɛ fùn wè,
wi nyɛ́nì Kulocɛliɛ Pìle tìrige lè yeli nɛ̄n.
Kire nɛ̄ yeli ye mìɛni nyɛ́nì kányiʔɛ cɛ́n gè.
21 A mi 'siɛnrɛ dáà sɛbɛ dè yeli mɛ́ dè,
kiì nyaa majo yeli sì kányiʔɛ cɛ́n gè wīʔ.
Yeli nyɛ́nì ki cɛ́n,
yeli 'ki cɛ́n míɛni káfinɛrɛ wè nɛ yigi kányiʔɛ nī gèʔ.
22 Ŋáa sí wī káfinɛrɛfɔli wè ?
Ŋàa wi 'cíi nɛ́ jo Zezi wi wè Kirisi wèʔ,
wire wī.
Kire siɛn wi yē Kirisi leguuwo wī,
ŋàa wi 'cíi Tuufɔli nɛ̄ wè nɛ́ Jaafɔli ní wè.
23 Siɛn ŋáà wi 'cíi nɛ́ jo Zezi wi wè Jaafɔli wèʔ,
Tuufɔli míɛni wi wè nɛ́ wi níʔ.
Siɛn ŋáà wi 'fɔ̀li Zezi nɛ̄ wè,
nɛ́ jo wiī Kulocɛliɛ Jaa wè,
Tuufɔli míɛni wi yē nɛ́ wi ní.
24 Kire nɛ̄,
gàa yeli tíi nɛ̀ lúʔu baa ki sélimɛ nɛ̄ bè,
ye- kire yaʔa ki- kò yeli nī.
A ki yē bɛ̀ gè,
siɛnrɛ dáà yeli tíi nɛ̀ lúʔu baa ki sélimɛ nɛ̄ bè,
a tiī kòriro yeli nī bèle,
yeli míɛni bé puu kòrilo Jaafɔli nɛ́ Tuufɔli nī wè.
25 Nyafɛnigɛ gáà Jaafɔli wi 'kpíʔile weli mɛ́ gè,
kire gī bànguɔ sìi wèo.
26 Kele gálì gèle mi 'ke sɛbɛ bàli wuʔu nɛ̄ pe caa bè yeli fáanni bè pùunni wè.
27 Gàa ki 'yeli kúɔ bèle,
Kirisi wi nyɛ́nì Kulocɛliɛ Pìle tìrige lè yeli nɛ̄ a ni 'kò kòrilo yeli nī.
Kire nɛ̄ yeli màakuu ní wè ki nɛ̄ siɛn wáà wiiyɛ de yeli tɛnmɛʔ,
bɛ̀ Kulocɛliɛ Pìle niī nɛ yeli tɛnmɛ nɛ kúu lè.
Á ni tɛnmɛnɛ ni sí yē kányiʔɛ;
ni wè finɛnɛ wèʔ.
Kire nɛ̄ ye- puu kòriyaʔala Kirisi nī wè,
majo bɛ̀ Kulocɛliɛ Pìle ni 'yeli tɛnmɛ yeri ki kpínʔini gè.
Kulocɛliɛ pìile piyē nɛ kasingele kpínʔini