Zan 1 1

Sɛbɛ péliwe ŋáà Zan 'sɛbɛ wè

Zan péliwe

Sìi siɛnrɛ wori dè

1 Gàa ki 'puu baa sélimɛ nɛ̄ bè,

gàa weli 'lúʔu gè,

nɛ́ gàa weli nyapigele ke 'nyaa gèle,

nɛ́ gàa weli 'sɔ́migɔ nɛ̀ wéli gè,

á weli kiyɛ yi 'cò ki nɛ̄ wè^a,

kire wuʔu weli nɛ jáari,

tire dáà dī sìi siɛnrɛ dè.

2 Wire ŋáà wi yē sìi wè,

wi 'wìi tìɛ a weli 'wi nyaa.

Kire nɛ̄ weli yē kinyaafɔlilɔ nɛ bànguɔ sìi wori nyu dè yeli mɛ́,

kire sìi ŋáà wi 'puu nɛ́ Tuufɔli ní wè nɛ́ pɛ́nì wìi tìɛ weli nɛ̄^b.

3 Gàa weli 'nyaa nɛ́ ki lúʔu gè,

weli nɛ ki jáari yeli ye míɛni mɛ́,

kire ga buu yeli míɛni yeli- puu pínɛnyɛnigɛ nɛ̄ nɛ́ weli ní.

Gìi sí gī baa gè,

weli yē pínɛnyɛnigɛ nɛ̄ nɛ́ Tuufɔli ní wè nɛ́ wi Jaa Zezi Kirisi ní wè^c.

4 Weli nɛ kele gálì sɛbɛ gèle yeli mɛ́ kire ga buu weli fundaanra ti- fori.

Kulocɛliɛ wiī kpìɛnmɛ

5 Tunduro siɛnrɛ dáà weli 'lúʔu Zezi Kirisi mɛ́ wè á weli nɛ ti nyu nɛ tìí yeli nɛ̄ wè,

tire dī Kulocɛliɛ wiī kpìɛnmɛ,

dí yebilige wè wi nī púloʔ^d.

6 A weli sí jo weli yē pínɛnyɛnigɛ nɛ̄ nɛ́ wi ní wè,

nɛ̀ sí ki taa a weli nɛ tári yebilige nī gè,

weli nɛ finɛnɛ wī,

weli wè nɛ tári kányiʔɛ nīʔ^e.

7 Nɛ̀ sí ki yaʔa,

a weli nɛ tári kpìɛnmɛ nī bè,

bɛ̀ Kulocɛliɛ wire tíimɛ yē kpìɛnmɛ nɛ̄ bè,

pínɛnyɛnigɛ yē weli sunʔɔmɔ nī,

á wi Jaa Zezi sìsiɛn kiī nɛ weli cìile weli kapiʔile ke mìɛni nɛ̄ gèle^f.

8 A weli sí jo kapiʔile wè weli nɛ̄ wèʔ,

weli nɛ wìye fáanni wī weli tíimɛ bèle.

Kányiʔɛ wè weli funyɔ nī yèʔ.

9 Nɛ̀ ki yaʔa a weli 'weli kapiʔile juu gèle nɛ̀ tìɛ wi nɛ̄ wè,

wi yē tɛ́ngɛmɛ siɛn nɛ́ ní sínwɛ bè weli kapiʔile láʔa gèle bè weli cìile weli kolimɔ pi mìɛni nɛ̄^g.

10 A weli sí ki juu nɛ́ jo weli sì kapiʔile kpíʔile wèʔ,

weli nɛ Kulocɛliɛ kpínʔini wè káfinɛvinɛwɛ;

wi siɛnrɛ ti wè weli funyɔ nī yèʔ.