Birayima tɛ́ngɛlɛ wori dè
4
1 Gíi sí we bé juu weli tuuliʔɛ Birayima wori nɛ̄ dè ?
Gáa wi cé taa wire wè ?
2 A ki yē kakpiʔiligele ke cé Birayima kpíʔile wè siɛnsinwɛ Kulocɛliɛ yiʔɛ mɛ́ gè,
wi bé gbɛ̀ de nàgbuʔɔrɔ kpínʔini ki wori nɛ̄ dè,
nɛ̀ sí ki taa wiǐ gbɛ̀ kire kpíʔile Kulocɛliɛ yiʔɛ mɛ́ gèʔ.
3 Ki 'nyaa Kulocɛliɛ siɛnsɛbɛrɛ ti 'ki juu nɛ́ jo:
Birayima wi 'tɛ́ngɛ Kulocɛliɛ nɛ̄ wè,
a Kulocɛliɛ wi 'wi tɔ́ri siɛnsinwɛa.
4 Nɛ̀ sí ki taa siɛn ŋáà wi 'baara kúɔ dè,
wi sàri wi wè tɔ́ri wi mɛ́ bɛ̀ kpuʔɔrɔ tíɛlɛʔ,
wi 'yɛli nɛ́ wi ní,
wi wuu wī.
5 Nɛ̀ sí ki taa siɛn ŋáà wiì baara kúɔ wèʔ,
nɛ́ sí jáa nɛ̀ tɛ́ngɛ ki nɛ̄ dí Kulocɛliɛ wire wi nyɛ́ni siɛnkoliwo tɔ́ri wè siɛnsinwɛ wè,
Kulocɛliɛ wi nɛ̂ kire siɛn tɔ́ri wè siɛnsinwɛ wi tɛ́ngɛlɛ lire kɛnmɛ nɛ̄ bè.
6 Tire Dawuda wi cé juu nɛ́ jo siɛn ŋáà Kulocɛliɛ wi sî tɔ́ri siɛnsinwɛ nɛ̀ ki yaʔa siɛn wi kakpiʔiligele kɛnmɛ bɛ̀ wi sî wéli wèʔ,
kire siɛn wi wuʔu kiī tànʔa.
Ti 'jo:
7 Siɛnnɛ bílì Kulocɛliɛ
wi 'pe kakolido wuʔu yaʔa gè
a ki 'kúɔ wè,
nɛ́ bìli kapiʔile
Kulocɛliɛ wi 'láʔa gèle,
peli wuʔu kiī tànʔa.
8 Siɛn ŋáà Kàfɔli wi ní wè
wi kapiʔile tɔ́ri gèleʔ,
wire wuʔu kiī tànʔab
9 Kire fundaanra dáà dè kɛnɛkɛnɛfɔlilɔ yákuɔ wori dī lé,
dí bìli piyè kɛnɛkɛnɛ kpíʔile wèʔ,
pe liɛlɛ yē baa nɛ̀ pínɛ lé ?
Kire sí we 'juu nɛ̀ kúɔ gè,
nɛ́ jo dí Kulocɛliɛ wi 'Birayima tɔ́ri wè siɛnsinwɛ wi tɛ́ngɛlɛ lire kɛnmɛ nɛ̄ bè.
10 Mɛni sí kire kpíʔile nɛ̀ síɛ ?
Bà wi cé kɛnɛkɛnɛ kpíʔile wè lé,
dí bà wiì cé fìɛ kɛnɛkɛnɛ wèʔ ?
Kiì kpíʔile kɛnɛkɛnɛ kpíʔileguɔrɔ kàduʔumɛʔ,
ki 'nyaa wi 'puu nɛ tíin wiì cé fìɛ kɛnɛkɛnɛ kpíʔile wèʔ.
11 Kire kàduʔumɛ wi cé nɛ́ kɛ́nì kɛnɛkɛnɛ kpíʔile wè a wi 'kò wi mɛ́ fìɛ nɛ̀ ki tìɛ wiī siɛnsinwɛ tɛ́ngɛlɛ kɛnmɛ nɛ̄ bè,
bɛ̀ wiì cé fìɛ kɛnɛkɛnɛ kpíʔile wèʔ.
A kire 'ki kɛn a Birayima wi 'kò tɛ́ngɛfɔlilɔ pe mìɛni tuu wè,
a siɛn wiì cɛ́nì kɛnɛkɛnɛ kpíʔile wèʔ.
Kulocɛliɛ wi nɛ̂ pe mìɛni tɔ́ri bèle siɛnsinminɛ.
12 Bìli pe 'kɛnɛkɛnɛ kpíʔile wè,
Birayima wiī pe tuu nɛ̀ pínɛ,
kiì sí kò majo bìli nɛ̄ kɛnɛkɛnɛ míʔɛ ki yē gè peli yákuɔlɔʔ.
Ki 'nyaa bìli pe nyɛ́ni tɛ́ngɛlɛ koligo tári gè bɛ̀ Birayima tíɛlɛ wè bà wi 'puu nɛ tíin wiì cé fìɛ kɛnɛkɛnɛ kpíʔile wè,
peli tuu wī nɛ̀ pínɛ.
Tɛ́ngɛlɛ ni 'Kulocɛliɛ nyafɛnigɛ ki sìɛrɛ kɔ̀n dè
13 Nyafɛnigɛ gáà Kulocɛliɛ wi cé líɛ Birayima mɛ́ wè nɛ́ wi siimɛ tùlugo wuulo ní bèle,
nɛ́ jo dí wire bága duniya kɛn wè pe mɛ́ wi- puu pe kɔrigɔ gèc,
kire sì nyaa majo Fànʔa Siɛnrɛ ti tánʔagɛnjɛ̀nmɛ kɛnmɛ nɛ̄ wīʔ.
ʔéʔe,
kire bɛ̀ʔ,
ki 'nyaa Kulocɛliɛ wi 'wi tɔ́ri siɛnsinwɛ tɛ́ngɛlɛ lire kɛnmɛ nɛ̄ bè.
14 A kire 'laa wè,
bàli pe je ga kɔrigɔ lìi gè,
a ki yē Fànʔa Siɛnrɛ tánʔagɛnjɛ̀nmɛ pi je ga pe tìɛ bèle,
nyùgo ní wè tíin tɛ́ngɛlɛ nɛ̄ lèʔ,
nɛ̀ pínɛ nyafɛnigɛ ki siɛnrɛ ti 'kò wíra wī.
15 Nɛ̀ taʔa gíi nɛ̄,
Fànʔa Siɛnrɛ dè,
a siɛn wè ti koliyo tári yè,
kiī nɛ báan nɛ́ Kulocɛliɛ funyɛrigɛ ní.
Nɛ̀ sí ki taa a Fànʔa Siɛnrɛ tiì cé puu baa wèʔ,
kolimɔ wori míɛni sǐ cî puu baaʔ.
16 Kire kɛnmɛ nɛ̄,
a siɛn 'tɛ́ngɛ Kulocɛliɛ nɛ̄ wè wi bé nyafɛnigɛ ki sìɛrɛ taa dè,
ti- puu Kulocɛliɛ kpuʔɔrɔ dè,
dí nyafɛnigɛ ki- sí puu baa ki nyɔgɔlɔ nī gèle Birayima siimɛ tùlugo wuulo pe mìɛni mɛ́ bèle.
Ki fǎga yéri yákuɔ bìli mɛ́ Fànʔa Siɛnrɛ ti 'kɛn dèʔd,
ki 'nyaa bìli pe 'tɛ́ngɛ majo bɛ̀ Birayima cé tɛ́ngɛ wè,
Birayima wè we mìɛni tuuliʔɛ gè,
peli wuʔu gī nɛ̀ pínɛ.
17 Ki 'nyaa Kulocɛliɛ siɛnsɛbɛrɛ ti 'ki juu nɛ́ jo:
Mi 'muɔ tɛ́ngɛ ma puu siɛnnɛ feliye nìʔɛnɛ tuuliʔɛe.
Wiī weli tuuliʔɛ Kulocɛliɛ yiʔɛ mɛ́ gè,
Kulocɛliɛ wire nɛ̄ wi cé tɛ́ngɛ,
Kulocɛliɛ ŋáà wi nyɛ́ni kúbilo nyɛ́gi bèle,
níɛ yɛrɛ yeri dè dàa ti wè bile dèʔ,
ti- yigif.
18 Birayima wi cé wi sɔ̀ngirɔ taʔa dè yakaa nɛ̄ nɛ̀ ki yaʔa sɔ̀ngirɔ taʔadiʔɛ sì 'puu baaʔ,
a wi 'tɛ́ngɛ Kulocɛliɛ nɛ̄ wè,
a ki pɛ́nì kpíʔile a wi 'kò kùlogolo siɛnfeliye nìʔɛyɛ tuuliʔɛ,
nɛ̀ yɛli nɛ́ siɛnrɛ dáà Kulocɛliɛ wi cé juu wi mɛ́ dè,
nɛ́ jo:
Bɛ̀ muɔ siimɛ pi bága puu nìʔɛbɛ kire kɛnmɛ nɛ̄ bèg.
19 Birayima yiɛziʔile ke 'puu yiʔɛlɛ dabataan,
nɛ̀ sí ki taa kire sì cé wi tɛ́ngɛlɛ kúɔ lèʔ bɛ̀ ki 'nyaa wi céri ti cé fùrɔ nɛ̀ kúɔ dèʔ,
nɛ̀ pínɛ Sara wi cesiʔi ki cé tɔ́n.
20 Kire nɛ́ ki mìɛni ní,
wiì cé káaliyɛ le wìi nī Kulocɛliɛ nyafɛnigɛ ki wori nɛ̄ dèʔ.
Wi cé nɛ́ cɛ́nì ŋɔri le tɛ́ngɛlɛ nī lè wī,
nɛ̀ kpuʔɔrɔ taʔa Kulocɛliɛ nɛ̄ wè.
21 Wi cé tɛ́ngɛ ki nɛ̄ nɛ̀ láʔa dí a Kulocɛliɛ wi 'nyuɔ fɛ̀ni kaala níì nɛ̄ lè,
wi bé jáa bè ni kpíʔile.
22 Kire sí gī,
ki 'juu nɛ́ jo Kulocɛliɛ wi 'Birayima tɔ́ri wè siɛnsinwɛ wi tɛ́ngɛlɛ lire kɛnmɛ nɛ̄ bè.
23 Siɛnrɛ dáà sí ti 'sɛbɛ nɛ́ jo,
Kulocɛliɛ wi 'wi tɔ́ri siɛnsinwɛ wè,
Birayima wire yákuɔ mɛ́ bɛ̀ʔ ki siɛnrɛ ti 'juuʔ.
24 Ki 'nyaa ti 'juu weli mɛ́ nɛ̀ pínɛ,
weli bálì we 'tɛ́ngɛ Kulocɛliɛ nɛ̄ wè wire ŋáà wi 'we Kàfɔli Zezi nyɛ́ wè nɛ̀ yige kúbilo nī bèle.
Weli míɛni bèle,
Kulocɛliɛ wi bága weli tɔ́ri kire felige.
25 Kulocɛliɛ wi cé Zezi kɛn wè kùu mɛ́ wè weli kakolido tire kɛnmɛ nɛ̄,
nɛ́ sí ń'nɛ̀ koli nɛ̀ wi nyɛ́ nɛ̀ yige kúbilo nī bèle,
gìi ki bé tí wi- weli kpíʔile weli- puu sínminɛ Kulocɛliɛ yiʔɛ mɛ́ gè.