Siɛn ŋáà nɛ̄ Kulocɛliɛ 'ki yaʔa gè, fundaanra siɛn wī
32
1 Dawuda sícilimɛ ŋúnugo gīa.
Wire ŋáà nɛ̄ Kulocɛliɛ 'wi tuudiɛlɛ yaʔa lè
nɛ́ wi kapiʔile kàsulugo suɔ gè, wi wuʔu kiī tànʔa !
2 Wire ŋáà wī Yewe wi wè nɛ tɔ́ri nɛ́ wi kolimɔ ní bèʔb,
nɛ́ míɛni káfinɛrɛ wè baa wi sɔ̀ngirɔ nī dèʔ, wi wuʔu kiī tànʔa !
3 Bà mi yé pìiri wè, a mi céri ti 'waʔa
mi kɔnwaara tire kɛnmɛ nɛ̄ cɛnguɔmɔ cɛngɛ ó cɛngɛ.
4 Pìlige nɛ́ cɛnvugo muɔ kɔli ki 'mi seri nɛ̀ lúbugo mi nɛ̄.
Mi céri ti 'fùrɔ, ti tùnmɔ piī nɛ nyɛni nɛ yigi
majo yafɛnidɛ dī gbìnʔɛ lɛ̀lɛ nī lè. Ye‑ ŋɔ́ cɛ̀.
5 Mi 'mi kapiile juu lè nɛ̀ tìɛ muɔ nɛ̄; mi sì mi kolimɔ làrigɛ bèʔ.
A mi 'ki juu nɛ́ jo: «M'bé yéri mi tuudiɛlɛ nɛ̄ lè Yewe yiʔɛ mɛ́.»
Kire nɛ̄ a muɔ 'mi kolimɔ yaʔa bè mi nɛ̄. Ye‑ ŋɔ́ cɛ̀.
6 Kire kɛnmɛ nɛ̄ siɛn ó siɛn ŋáà wi 'wìi puɔ muɔ nɛ̄ wè,
wi 'yɛli bèri muɔ náari làjɛnnɛ nī lè.
A lakpoliyo yi kɛ́nì je wi lìi wè, yiǐ gbɛ̀ wi taa jòʔ.
7 Muɔ yē mi làridiʔɛ; muɔ nɛ mi wéli
kire ga buu funbiɛnrɛ fǎga mi taaʔ.
Muɔ nɛ mi mári nɛ́ suɔlɔ ŋúnuyɔ ní. Ye‑ ŋɔ́ cɛ̀.
8 A muɔ 'ki juu m'mɛ́ nɛ́ jo: «M'bé muɔ tɛnmɛ,
m'bé muɔ tìɛ koligo nɛ̄ gè gàa muɔ 'yɛli bè líɛ gè.
Mi nyapigele kiyē muɔ nɛ̄; m'béri nyu de tìí muɔ nɛ̄.»
9 Ye fǎga puu ledoro bɛ̀ sunʔɔ nɛ́ sèfɛnnɛ tíɛlɛ lèʔ,
nyàa yiì cìlige yi funyɔ nī yèʔ,
nyàa pe 'yɛli bèri kàrigí nɛ́ gàrifii ní nɛ́ màʔagɛlɛ ní
kire ga buu yiri lúru, yi fǎga koligo yaʔa gèʔc.
10 Wuʔɔgboliniʔɛyɛ nɛ siɛnpiiwe siri wè,
nɛ̀ sí ki yaʔa ŋàa wi 'wi sɔ̀ngirɔ taʔa dè Yewe nɛ̄ wè,
wi bé wire màʔa bè suʔu nɛ́ wi bànguɔ dɛ́nigɛ ní gè.
11 Yeli bèle siɛnsinminɛ bèle, ye‑ puu fundaanra nɛ̄,
yeri fundaanra kpínʔini Yewe nī !
Yeri fundaanra yékpuʔulo wáari, yeli mìɛni bálì funyɔ yi 'sín yè !