Kakpiʔiligele 18

Pɔli wi 'kɛ́ Korɛnti kàʔa mɛ́

(Kor1 1.1-9; 2.1-5; Kor2 11.5-12; 12.12, 13)

1 Kire kàduʔumɛ gè, a wi 'yiri Atɛni kàʔa wuulo táanni bèle, nɛ̀ kɛ́ Korɛnti kàʔa mɛ́. 2 A wi sɛ́nì Zuufunaguɔ wáà nyaa baa, pe 'puu nɛ wi ye Akiilasi; Pɔnti tɛ́nimɛ wuu wi 'puu. Wire cé péli nɛ̀ kɔ́n Italii kùlo mɛ́ nɛ̀ pɛn nɛ́ wi cuɔ ní wè Pirisiili wè. Ki 'nyaa Kulodi wi cé jo Zuufulo pe mìɛni pe- yiri kàʔa nī gè.

A Pɔli wi 'kɛ́ pe kúrugu. 3 Bɛ̀ ki 'nyaa pe baara ti 'puu nuro nɛ́ Pɔli wori ní dè, a Pɔli wi 'kò baa nɛ́ pe ní nɛ baara. Fɛ̀ni saaya pe 'puu nɛ kpínʔini. 4  cɛngɛ ó cɛndɛnigɛ cɛngɛ, wi nɛ̂ cé kɛ́ mɛ́ gè nɛ̀ sɛ́ni nyu nɛ́ Zuufulo ní bèle, peli nɛ́ Girɛkilɛ ní bèle; wi 'puu nɛ caa bè pe sɔ̀ngirɔ yiʔɛ dè wī, pe- tɛ́ngɛ Kàfɔli nɛ̄ wè.

5 Bà Timote nɛ́ Silasi pe cé kɛ́nì kɔ́n Maseduwani tɛ́nimɛ nī bè nɛ̀ pɛn bèle, a wi 'láʔa nɛ̀ kò nɛ Kulocɛliɛ siɛnrɛ nyu dè Zuufulo mɛ́ bèle, níɛ ti nyu nɛ láʔala pe nɛ̄ dí wè, wire wī Zezi wè. 6 Nɛ̀ sí ki taa bà Zuufulo pe cé cíi Pɔli siɛnrɛ nɛ̄ dè, nɛ́ yɛ̀ nɛ wi teri wè, a wi 'wi bururo yàʔara dè nɛ̀ wáa baa pe nɛ̄ nɛ́ pe yɛ: «Sɛnrɛ ti 'kò yeli nyùgo wori; mi wè, mi nyɛ́nì mi liɛlɛ kúɔ lè nɛ̀ láʔa yeli kɔli mɛ́ gè. Bɛ̀ ki yē ŋɔ̀ wè, mi nɛ waa siɛnnɛ kúrugu wī nɛ́ ní dè.»

7 Bà wi 'yiri baa kire tiʔɛ nī gè, a wi 'kɛ́ nàguɔ wáà tiʔɛ nī, pe 'puu nɛ wi ye Tiitusi Zusutusi; Kulocɛliɛ caavɔli wi 'puu ki nàguɔ ŋáà wè. Wi saʔa ki 'puu baa tɛnmɛzaʔa táanni gè. 8 Kirisipusi wè, kàfɔli wè, a wire 'tɛ́ngɛ Kàfɔli nɛ̄ wè nɛ́ wi saʔa wuulo pe mìɛni ní bèle. Korɛnti kàʔa siɛnniʔɛnɛ míɛni 'puu nɛ jíin tɛ́ngɛlɛ nī lè, níɛ wè bɛ̀ pe cé Pɔli siɛnrɛ lúʔu dè.

9 Cɛngɛ káà pìlige nī, a wi 'Pɔli yiʔɛ múgu gè nɛ́ kaala láà tìɛ wi nɛ̄ nɛ́ wi yɛ: «Fǎga de fìʔɛ́ʔ, puu mari muɔ siɛnrɛ nyu dè, fǎga tí bé muɔ nyuɔ tɔ́n gèʔ ! 10 Nɛ̀ taʔa gíi nɛ̄, mi yē nɛ́ muɔ ní; siɛn sì je nɔ̀ muɔ nɛ̄ʔ bè muɔ wuʔɔʔ, ki 'nyaa siɛnmɛ yē bile nìʔɛbɛ kàʔa gáà nī gè, mi wobo.»

11 A Pɔli wi 'kò baa nɛ́ pe ni nɛ̀ taa yiɛlɛ nɛ́ yeye kɔlini, nɛ pe tɛnmɛ Kulocɛliɛ siɛnrɛ nɛ̄ dè.

12 Lɛ̀lɛ níì nī Galiyɔn 'puu Akayi tɛ́nimɛ fànʔafɔli wè, a Zuufulo pe 'nyuɔ le Pɔli nɛ̄ wè nɛ̀ wi cò nɛ̀ kɛ́ kàyuʔujuudiʔɛ mɛ́ gè. 13 A pe sɛ́nì jo: «Nàguɔ ŋáà wiī nɛ ki caa bè siɛnnɛ sɔ̀ngirɔ yiʔɛ dè peri Kulocɛliɛ gbùʔɔrɔ́ wè ti yapiʔi nɛ̄ wī !»

14 Pɔli wi 'puu nɛ caa bè yakaa juu, nɛ̀ sí ki taa a Galiyɔn wi 'siɛnrɛ líɛ dè, nɛ̀ juu nɛ́ Zuufulo ní bèle nɛ́ pe yɛ: «Zuufulo yeli bèle, a ki yē kacuʔɔlɔ nàguɔ ŋáà wi cé kpíʔile lè, á kire 'laa kakoligo sìpiʔi gè, mi cî yeli siɛnrɛ lúʔu dè. 15 Bɛ̀ sí yeli kàsii wi nyùgo ki 'nyaa siɛnjuuro koligo wori wè, nɛ́ míɛyɛ, nɛ́ yeli tíimɛ fànʔa koligo kele ní gèle, kire nɛ̄ yeli wori dī tire dè; mi wè nɛ caa bè nyuɔ le kire kàyuʔu nī gèʔ.»

16 A wi 'fali nɛ̀ pe cìra nɛ̀ yige kàyuʔujuudiʔɛ nī gè.

17 A pe mìɛni pe sí fali nɛ̀ tuu tɛnmɛzaʔa kàfɔli nɛ̄ wè, Sɔsitɛni wè, nɛ̀ wi kpúɔn kàyuʔujuudiʔɛ yiʔɛ mɛ́ gè. A Galiyɔn wi 'píɛ, wiì nyuɔ le ti nīʔ.

Pɔli wi 'koli nɛ̀ kɛ́ Antiyɔsi kàʔa mɛ́

18 A wi ń'nɛ̀ kò baa nɛ̀ cɛnyɛ nìʔɛyɛ kúɔ Korɛnti kàʔa nī gè nɛ́ tɛ́ngɛfɔlilɔ ní bèle. A wi 'kúɔ nɛ́ jíin nī gè nɛ̀ kɛ́ Siirii kùlo mɛ́, wire nɛ́ Pirisiili nɛ́ Akiilasi. Bà pe kâ sɛ́nì jíin Sankire kàʔa nī gè, a Pɔli wi 'tí a pe 'wi nzìire celile dè. Ki 'nyaa wi cé ; kire sìɛrɛ tire wi cé kɔ̀n.

19 A pe sɛ́nì nɔ̀ Efɛzi kàʔa nɛ̄. A Pɔli wi 'láʔa wi kobinɛnyɛninɛ nɛ̄ bèle nɛ̀ kɛ́ mɛ́ gè nɛ̀ sɛ́nì juu nɛ́ Zuufulo ní bèle. 20 A pe 'yɛ̀ nɛ wi fiɛn nɛ́ wi yɛ wi- kò baa wi mɔgɔ nɛ́ peli ní; wiì yéri ki nɛ̄ʔ.

21 A wi 'yiri pe táanni nɛ́ pe yɛ: «M'bága koli bè pɛn náʔa yeli mɛ́ a Kulocɛliɛ fɔ̀li.» Nɛ́ jíin kɔ́rikpuʔɔ nī gè nɛ̀ yiri Efɛzi kàʔa nī gè.

22 A wi sɛ́nì tìgi Sezare kàʔa nī, nɛ̀ 'kɛ́ nɛ̀ sɛ́nì wuulo síɛri bèle Zerizalɛmi kàʔa mɛ́ gè. Bà wi 'kúɔ wè a wi 'kɛ́ Antiyɔsi kàʔa mɛ́. 23 A wi sɛ́nì lɛ̀lɛ láà kúɔ baa, nɛ́ kɛ́nì koli nɛ̀ yiri nɛ̀ kɛ́. Wi cé sùuri nɛ̀ tóri Galasi kùlo nī, nɛ́ Firizii tɛ́nimɛ ní bè, níɛ nyu nɛ lèbaanna nyɔ́gi pe mìɛni nī bèle tɛ́ngɛlɛ koligo nī gè.

Apolɔsi wi 'Kulocɛliɛ Siɛnrɛ juu dè Efɛzi nɛ́ Korɛntiyé kàaya nī

24 Zuufunaguɔ wáà cé kɛ́nì pɛn baa Efɛzi kàʔa mɛ́ gè. Pe 'puu nɛ wi ye Apolɔsi; Alɛgizandiri kàʔa wuu wi 'puu. Ki nàguɔ wi cé juu macɛ́n, nɛ̀ sɔ́migɔ dè nɛ̀ cɛ́n nɛ̀ pínɛ. 25 Wi cé tɛnmɛnɛ taa koligo nī gè, nɛ ní sícaʔawɛ nɛ siɛnnɛ tɛnmɛ bèle cìilige nɛ láʔala Zezi kele nɛ̄ gèle. Nɛ̀ sí ki taa wire yákuɔ wi cé cɛ́n. 26 Wi cé kɛ́ nɛ̀ sɛ́ni siɛnnɛ tɛnmɛ bèle fíɛrɛ fùn baa mɛ́ gè.

Bà Pirisiili nɛ́ Akiilasi peli kɛ́nì wi tɛnmɛnɛ lúʔu lè, a pe 'wi yeri nɛ̀ sɛ́nì yaʔa nɛ́ pìye ní, nɛ́ wi sɔ́migɔ nɛ̀ tìɛ Kulocɛliɛ koligo nɛ̄ gè, dìi wiì cé cɛ́n dèʔ.

27 Bà kári láa 'puu Apolɔsi nɛ̄ wè Akayi tɛ́nimɛ mɛ́ bè, a tɛ́ngɛfɔlilɔ pe 'yéri ki nɛ̄. A pe sí siɛnrɛ sɛbɛ nɛ̀ tórigo ki tiʔɛ tɛ́ngɛfɔlilɔ mɛ́ bèle, nɛ́ jo pe sa wi cò cɛ̀ngɛ.

Bà Apolɔsi wi sɛ́nì yiri wè, a ki tɔ̀ni nɛ̀ tɛ́ngɛfɔlilɔ sáʔa bèle kpuʔɔ, bàli nɛ̄ Kulocɛliɛ wi cé nyuɔ wè á pe 'jíin tɛ́ngɛlɛ nī lè. 28 Ki 'nyaa Apolɔsi wi 'puu nɛ Zuufulo pe pùunnidiʔɛlɛ tìí gèle pe nɛ̄ siɛnnɛ sunʔɔmɔ nī bè, nɛ nyu nɛ pe jàʔá siɛnjuuro nī dè. Wi 'puu nɛ ki tìí pe nɛ̄ nɛ láʔala Kulocɛliɛ siɛnsɛbɛrɛ nī dè dí Zezi wire wī wè.