Korɛntiyé 1 1

Sɛbɛ péliwe ŋáà Pɔli 'tórigo Korɛntiyé mɛ́ bèle

Korɛntiyé péliwe

Pɔli nɛ́ Sɔsitɛni síɛrilɛ lè

1 Mi wè, nɛ̀ yɛli nɛ́ Kulocɛliɛ nyɛ́ni kaala ní lè, Kulocɛliɛ wi 'mi yeri mi- puu Zezi tundunwɔ. Mi nɛ́ we siinyɛni Sɔsitɛni ní wè, 2 weli 'siɛnrɛ dáà sɛbɛ dè bè tórigo mɛ́ lè Kulocɛliɛ woli lè, nàa nī baa Korɛnti kàʔa mɛ́ gè, peli bálì bīɛlɛ wàlidɛngɛlɛ Zezi Kirisi wuulo bèle, á piyē nɛ pe ye Kulocɛliɛ wuulo bèle, nɛ̀ fàri siɛnnɛ bílì pe mìɛni bīɛlɛ pe nyɛ́ni weli Kàfɔli Zezi Kirisi wi míʔɛ yeri gè tiʔɛ ó tiʔɛ nī wè. Wiī pe nɛ ní weli Kàfɔli nɛ̀ pínɛ. 3 Weli Tuu Kulocɛliɛ nɛ́ Kàfɔli Zezi Kirisi nɛ́ wi yanyige ki- puu yeli nɛ̄.

Pɔli wi 'Kulocɛliɛ síɛri wè Korɛntiyé wuʔu nɛ̄ gè

4 Mi nɛ Kulocɛliɛ síɛri wè súuri yeli wuʔu nɛ̄ gè, Kulocɛliɛ kpuʔɔrɔ dáà yeli 'taa Zezi Kirisi nyúmɔ nī bè. 5 Ki 'nyaa Zezi Kirisi wire kɛnmɛ nɛ̄ bè, yeli 'yɛrɛ felide ti mìɛni taa dè, gìi cɛ ki 'siɛnrɛ ti mìɛni kúɔ nɛ́ kacɛ́nnɛ ni mìɛni ní lè. 6 Nɛ́ ki cɛ́n kele gílì weli 'juu wori nɛ̄ dè, ki siɛnrɛ ti 'tɛ́nidiʔɛ kɔ̀n yeli funyɔ nī yè. 7 A kire 'ki kɛn Kulocɛliɛ yakɛngɛ káà fáala sì yeli laaʔ, yeli bálì ye nyɛ́ni weli Kàfɔli Zezi Kirisi wi lɛ̀lɛ siri lè, lɛ̀lɛ níì nī wi bága pa wìi tìɛ wè. 8 Wire míɛni wi bága ŋɔri nyɔ́gɔ yeli nī fúɔ bè sa nɔ̀ ki kúɔmɔ nɛ̄ bè, ye- puu tiɛlɛ fùn weli Kàfɔli Zezi Kirisi wi gè. 9 Kulocɛliɛ wiī baa wi nyayerigele nī gèle, wire ŋáà wi 'weli yeri we- puu pínɛnyɛnigɛ nɛ̄ nɛ́ wi Jaa Zezi Kirisi ní wè, weli wè.

Wàlimɛ yē Korɛnti tɛ́ngɛfɔlilɔ sunʔɔmɔ nī bè

10 Nɛ siinyɛninɛ, mi sí nɛ yeli fiɛn wī, weli Kàfɔli Zezi wire míʔɛ ki kɛnmɛ nɛ̄ bè: Ye- tí siɛnrɛ ti- puu ye mìɛni mɛ́ nuro, ye fǎga tí wàlimɛ jíin yeli sunʔɔmɔ nī bèʔ, yeri nyu yeri lúru yìye mɛ́ cɛngɛ, sɔ̀ngirɔ ti- puu ye mɛ́ nuro. 11 Nɛ siinyɛninɛ, dìi mi 'lúʔu Kulowe saʔa wuulo mɛ́ bèle yeli kɔli mɛ́ gè, pe 'jo kàsii yē baa yeli sunʔɔmɔ nī bè. 12 Mi siɛnrɛ ti kɔri wi n'ŋɛ: wàa nɛ̂ jo: «Mi wè, ní mi yē,» ŋìi nɛ̂ jo: «Apolɔsi ní mi yē,» ŋìi nɛ̂ jo: « ní mi yē,» ŋìi nɛ̂ jo: «Kirisi ní mi yē.»

13 Kirisi wiī tílawa lé ? Pɔli wire lé pe 'kóri nɛ̄ gè yeli kɛnmɛ nɛ̄ bè ? Á kire 'laa, Pɔli míʔɛ nɛ̄ lé yeli wè ? 14 Mi nɛ Kulocɛliɛ síɛri wè bɛ̀ mi sì yeli wáà batiize wèʔ, nɛ̀ yiri Kirisipusi nɛ́ Gayusi peli yákuɔ nī. 15 Ki fǎa ga nyaa yeli wáà ga ki juu bé jo mi míʔɛ nɛ̄ yeli nyɛ́nì batɛmi kpíʔile wèʔ. 16 ʔaan, je mi mi 'Sitefanasi saʔa wuulo batiize bèle ! Sɛnminɛ bèle, mi sì cɛ́nʔ ga mi ń'nɛ̀ wàa batiizeʔ. 17 Kirisi wiì mi tun mi de siɛnnɛ batiize wīʔ; ʔéʔe, wi 'mi tun mi de jáari dè wī. Mi sì wè ti nyu nɛ́ sìnjiligele siɛnjuuro ní wīʔ, kire ga buu Kirisi ki wori ti fǎga puu nyùgo fùnʔ.

Zezi Kirisi wire wī Kulocɛliɛ fànʔa gè nɛ́ wi sìnjilige gè

18 Ki 'nyaa siɛnjaarirɛ siɛnrɛ tiī bɛ̀ kàalafɔlilɔ siɛnrɛ tíɛlɛ bìli mɛ́ pe waa cúʔɔgoligo nī gè, nɛ̀ sí ki taa weli bálì we 'suɔlɔ taa lè, tiī weli mɛ́ Kulocɛliɛ fànʔa wī. 19 Kire nɛ̄ ti 'ki juu nɛ́ jo:

M'bága kacɛ́nminɛ pe kacɛ́nnɛ cúʔɔ lè,

bé sí sícilile pe sícilige tɔ́n gè.

20 Siɛn síciliwe wire yē sé ? wiī sé ? Ŋàa wi jáa bèri kele kìí gèle bile duniya nī wè, wiī sé ? Duniya ŋáà wi sícilige kiī sé ? Kulocɛliɛ wiì kàala yɛ̀gɛ ki nī lé ? 21 Bɛ̀ sí ki 'nyaa duniya wuulo bèle nɛ́ pe sìnjilige ki mìɛni ní gè, piyè Kulocɛliɛ cɛ́n wèʔ wi sìnjilige kakpiʔiligele nī gèle wè, a ki sí Kulocɛliɛ dɛ́ni wè wi- tɛ́ngɛfɔlilɔ suɔ bèle wi siɛnrɛ tire kɛnmɛ nɛ̄ bè, dàa pe 'jo tiī kàalafɔlilɔ siɛnrɛ dè. 22 Ki 'nyaa, Zuufulo pe 'jo macɛn peli 'yɛli bè nyaa, a Girɛki wuulo 'jo sìnjilige wori peli 'cɛ́n. 23 Weli bèle, ŋáà pe 'kóri nɛ̄ gè, wire Kataanna wori tire weli nɛ jáari; tiī kúrugodiɛlɛ Zuufulo mɛ́ bèle, nɛ́ sí ní kàalafɔlilɔ siɛnrɛ siɛnnɛ mɛ́ bèle. 24 Nɛ̀ sí ki taa bìli Kulocɛliɛ wi 'yeri bèle, Zuufulo yo, Girɛki wuulo yo, peli mɛ́ bèle, Kirisi wire wī Kulocɛliɛ fànʔa gè nɛ́ Kulocɛliɛ sícilige gè. 25 Nɛ́ ki cɛ́n Kulocɛliɛ kàala ke 'cìlige nɛ̀ tóri siɛnnɛ sícilige nɛ̄ gè, nɛ̀ pínɛ Kulocɛliɛ ŋɔrifun kɛnmɛ piī nɛ́ ŋɔri ní nɛ̀ tóri siɛnnɛ ŋɔri nɛ̄ dè.

26 Nɛ siinyɛninɛ, ye- sɔ̀ngi ye taa nɛ́ Kulocɛliɛ kayerile ní lè bɛ̀ wi 'yeli yeri bèle. Ye- ki cɛ́n, nɛ̀ yɛli nɛ́ siɛnnɛ kɛnmɛ ní bè, siɛnsicilile pe wè nìʔɛnɛʔ, fànʔafɔlilɔ pe wè nìʔɛnɛʔ, míɛyɛfɔlilɔ pe wè sáaʔ. 27 Nɛ̀ sí ki taa bìli siɛnnɛ pe sɔ̀ngí piyē ledomɔfɔlilɔ duniya nī wè, Kulocɛliɛ wi 'pe nyíɛnɛ nɛ̀ kɔ̀n nɛ̀ fìɛrɛ tɔ́n siɛnsicilile nɛ̄ bèle. Bìli sí bīɛlɛ ŋɔrifunfɔlilɔ duniya nī wè, a wi 'pe nyíɛnɛ nɛ̀ kɔ̀n nɛ̀ fìɛrɛ tɔ́n ŋɔrifɔlilɔ nɛ̄ bèle. 28 Nɛ̀ pínɛ gìi ní pe wè tɔ́ri duniya nī wèʔ, nɛ́ gìi siɛnnɛ piyē nɛ cúɔnnɔ duniya nī wè, nɛ́ yɛgɛ gíì pe wè tɔ́ri yafiɛn wèʔ, a Kulocɛliɛ wi 'ti líɛ nɛ̀ dìi cúʔɔ dè, dàa ní duniya wuulo piyē nɛ tɔ́ri dè. 29 Kire ki 'tí siɛn wáà fáala sǐ gbɛ̀ nàgbuʔɔrɔ kpíʔile Kulocɛliɛ yiʔɛ mɛ́ gèʔ. 30 Kulocɛliɛ wire fànʔa nɛ̄ yeli yē pínɛnɛ nɛ́ Zezi Kirisi ní wè, Zezi wire sí wi pɛ́nì kò weli sìnjilige gè, gàa ki 'kɔ́n Kulocɛliɛ mɛ́ wè, nɛ́ weli kpíʔile a weli 'kò sínminɛ, nɛ ní wàlidɛngɛlɛ Kulocɛliɛ mɛ́ wè, nɛ̀ weli suɔ nɛ̀ yige ki nī. 31 Kire nɛ̄: «A siɛn ŋíì je de nàgbuʔɔrɔ kpínʔini, wiri ti kpínʔini bɛ̀ wire yē nɛ́ Kàfɔli ní wè.» Bɛ̀ ti 'juu baa Kulocɛliɛ siɛnsɛbɛrɛ nī dè.